Itna hong kiamciang ~ Dong Mung

Itna hong kiamciang ~ Dong Mung

• 1). Nidang bangin hun kipia zo nawnlo,
• 2). Nidang bangin kihoho zo nawnlo,
• 3). Paulap gen ding hong tam mahmah ta,
• 4). Ama kiang i pai khak ding ciang midang khat peuh tonpih in kipai ta,
• 5). Ei ading kimanna neilo bangin kimu ta,
• 6). Ei deih bangin hong gamta theilo bangin kingaihsun ta,
• 7). Ei ading bekin kingaihsun ta ahih manin ama ading kiphawk kha zo nawnlo,
• 8). Ei maban bek mah thupi kisa in, ama ading hun peuhmah kinei zo nawnlo,
• 9). Ei hong huh theihna le hong sepsak theihna kimangngilh in, ei sepsakna le ei panpihna bek kiphawk ta,
• 10). Ei ading bek ki en ta a, ama ading bangmah ki awlmawh nawnlo!!!

Itna hong kiam leh mihingte i om dan le i gamtatna, i kampau dante hong kidang ziau pah lel mawk hi.

Mihing le mihing i ki-itna bek hilo, Pasian i itna zong tuamah bangin i ngaihsun hi.

I thungetna hong dawn ding bek kilunggulh a, ama ading bangmah i kipiakhia nuam nawn kei hi.

I pianthak cil lai in LST simna, Thungetna, Biakpiak kikhopnate i lawp mahmah a, sumpi piakna le 1/10 piakna ah i lawp mahmah hi.

Hunte hong pai toto in, ei le ei aa i lemtang pian ciang, kikhop ding nangawn hamsa i sa a, sumpi piakna le 1/10 piaknate zong ngeina bangin khasim tuazah cih danin i sem ziauziau thei hi.

Pasian i itna zong hong kiam semsem ciangin, Ama vai a i awlmawhna le i thupi simnate zong hong kiam mahmah mawk hi.

Hun ngah keng, buai lua ing, icih pen i paulap le i kamzat zangkhai hilel a, i thupi sim le manpha i sakte adingin i hun kipia zo mahmah lel hi.

Tu-in Pasian i itna kiam semsem ta hiam; i lawmngaihnu/pa i itna kiam semsem ta hiam; i lawmte i itna kiam semsem ta hiam, cihte pen na hun piakna le na masakna tawh kikhinkhai thei lua hi.

Mangmuhna 2

2 “Na gamtatna, na hanciamna, na thuakzawhna le mihoihlote na koihkhong lohna kong thei hi. Sawltak hilo napi amau le amau sawltak a kici mite sittel in a zuau genna teng uh na mukhia hi. 3 Kuhkalna le thuakzawhna na nei a, ka min hangin bah loin na hanciamna zong ka thei hi.

4 “Ahih hangin nong itna masa nusia khin na hih manin hih thu ah kong mawhsak hi. 5 Tua ahih manin na kiatma a na dinmun phawk in. Na mawhna kisikkik inla, a cil lai a na nasepte semkik in. Na kisik kei leh manlangtak in kong pai ding a, na meivak tunna ka hemkhia ding hi.

• Pasian kianga i itna masa khasuah loh nadingin hanciam kik ni.
• Lawm le gual kikal a i ki-itna masa khasuah loh nadingin hanciam kik ni.
• Lawm kingai kikal a i ki-itna masa khahsuah loh nading hanciam kik ni.

Note: Lawm kingai le lawmta kikal a ki-itna tawh kimemat in ei lam pan lungsim om nawnlo ahih leh zong siang taka kigen ding thupi mahmah hi. Ahi zongin thupha hong pia Pasian i itna bel khauhpai sak semsem ni. A thuphate bek delh a a buaibuai hilo zaw in thupha hong pia Pasian a masakte ihih nading hanciam ciat ni. Lungdam, DongMung