Phuitong tongciam ~ Peter Suumpi

Phuitong tongciam ~ Peter Suumpi

Khatvei lai in khuapi khat ah aki-it mahmah lawm kingai nungak le tangval khat om hi. Tangval pa pen gal kidona ah maikuan ding ahi hi. Tangval pa galkap sung apai ma in anih un phuitong kung khat suan in kicaimna khat hong bawl uh hi. Akiciamna uh phuitong pen lui gei khat ah suan uh hi. Tangval pa pen galkap sung ah lut in nungak nu in tua phuitong ahin nading ahah kawm in tangval pa hong ciah kik ding hong ngak hi. Tua phuitong kung hong gol mah bang in tangval pa tung aa athuciam piak te zong hong kho semsem hi. Tangval pa galdona pan cidam in hong ciah kik nading nisim in nungak nu in thungen hi.

Gal abei hangin tangval pa hong ciah kik lo hi. Ahihang akicaimna mah bangin nungak nu in phuitong kung akhoi kawm in tangval pa hong ciah ding ngak khinkhian den hi. Kum nga sung vilvel tua bangin amah guak in angak hi.

Mi tampi te in lam-en nawndah ci in hehnem keei ta uh hi. Ni khat ni teitei ciang tangval pa hong ciah kik ding hi ci in nungak nu in um hi. Akum acing khin tua nungk nu anulepa in pasal guat ding vaihawm uh hi. Akiteen nidang azan ciang nungak nu a-inn uh pan paikhia sim hi. “Nulepa mai belmang zut nu” ci in anulpa in inn ah sam kik nawnlo uh hi. Alungsim akizo tawh akibang nungak nu in lui gei aa tua phuitong kung nuai ah bukno lam in hong teng hi.

Kum 10, kum 20 hun te hong kheng toto hi. Mi tampi te in hithu mangngilh khinta uh hi. Ahihang tangval pa hong ciah kik ding nungak nu in phuitong nuai ah tudong mah ngaklai hi. Aman lang mahmah akhe te hong dampai ta hi. Avom sitset asam te tun hong kang ta hi. Khanghamna ii ciaptehna ahi aguai te amaitang tung ah hong kikan zihziah ta hi. Ahihang tangval pa tawh akiciamna uh tuni dong pel lo hi. Nisuah pan nitum ding tua phuitong nuai ah nungak nu in ngak hi.

Ciampel lohna angpom in tangval pa hong ciah ding angakkawm in nungak nu tua phuitong nuai ah hong teeksih ta hi. Ama tangthu athei mipawl khat in tua phuitiong nuai ah aluang phum uh hi. Alamdang khat ah tua ni aa kipan khal, phalbi le tuk khua hun thum teng akikhel hang tua phuitong teh te vullo in zong pulhlo hi. Tua phuitong nuai ah akivui zawh kiimlepaam aa om hun te akhawlcip dide tawh kibang hi.

Tua ni aa kipan tua lui gei ah tangthu khat hong piang hi. Tua phuitong nuai ah hong kiciam lawm kingai khempeuh deihna uh tangtung in akiciamna uh zong kho takpi hi. Anuntakna sung uh ah zong kiteng kha takpi uh hi.

Aliim hoih singkung nuai khat ah ko khangno pawlkhat in Pu Tuan umcih in ka tu ngeingai uh hi. Pu Tuan pen tangthu hong gen na hangin gim mahmah le kilawm hi. Tui haikhat dawn in khatvei hong khuisa hi. Tangthu aman ciang Hau Lun ii khut te deihtak ka hum teta hi. Hau Lun in zong ka lungsim hong tel aitam aman zong ka khut kiptak hong len teta hi.

Ataktak in cileng Pu Tuan ii tangthu gen tua aa kangaih masak pen hilo hi. Hih kiimlepaam aa om khangno atamzaw pen Pu Tuan ii tangthu gen te ngai in akhangkhia vive ahi hi. Tuni aa kazak tangthu pen kei aading in khiatna hong nei mahmah mawk hi. Asawtlo in keizong galkap sung ah maikuang ding ka hihman ahi hi. Cik ciang ciahkik ding cih kithei khol theilo hi. Hua Lun in zong hong kha kei ning hong ci hi. Ka pai ciangin tua phuitong nuai ah thu na na ngetsak ning hong ci hi. Ahihang tangthu sung aa nungak nu dan in amah bel hai sam kenteh cihpen ka thei hi. Nuntakna vekpi khaam liang in itna lak ding kisam lo hi. Hithu bel ih lawm ngaih te in za leh alung uh nuam hetkei sam incin.

“Tua leh tua tangval pa kawh om aihia?”

Tua tangthu aman ciang tangthu ngai atamzaw dotdet dotna khat ahi hi. Tangthu ka ngaih masak ni aa kipan tuni dong hih dotna ka dot uh hangin Pu Tuan in alusing in nui hiuhiau den hi. Tua khitciang ateikhut la in tua mun pan hong paikhiat san pahpah hi.

• Gal sung ah tangval pa si hiding maw?
• Adang numei tawh kiteng maw?
• Gal sung ah liam in hong ciah zo nawnlo maw?

cih aa kipan ka ummawh kawikawi uh hi. Tangthu aman sim ka dotdet uh ahi hi. Khatve teitei ciang Pu Tuan in hong gen ding in ka lam en hi. Tua dotna pen ko lam-etna sang lunglut huai zaw tham ding in zong ka um uh hi.

“Hi dotna ken kong dawng mai dia?”

Aw ginna lam ka vek un ka en uh hi. Ko tawh akigual ka theihngeiloh uh khangno khat ahi hi. Amah pen Pu Tuan in tangthu hong gen akipat aa kipan ka gei nai uh ah atu ahi hi. Khualzin in singliim nuai ah atawlnga dan in ummawh ka hihman un atu-ung in ka thusim kha kei uh hi.

Ka vet un lunglut in ama lam ah ka mit teuh hong tung hi.

“Kei hong en zaw ding naivua, ka thugen ngai zaw ding?” “Na thugen ngai zaw ding”

Tua bang aa hong galho na hangin ka lungsim uh hong tei kikta hi. Ka theihnop mahmah uh thukhat kazak nading uh kum tampi ka ngak khin uh hi. Tua thupen dip kua litlit in ka ngai nuam uh hi.

“Imm … hunta in um ing. Ka nung hong zuisin khangno. Amah ka gen masak kul ding hi.”
Ateikhut tawh kinang in Pu Tuan hong dingto hi. Tua khangno pa zawn in phuitong kung omna lam ah paikhiat pih hi. Tua khangno pa zong na khempeuh athei khol dan in bang mah dong kikse lo in Pu Tuan ii nung hong zui pah ziau hi. Kei le Hau Lun zong ka khut uh kilen in anung uh ah ka zui sim uh hi.

Khua nawl lui gei aa phuitong kung nuai ah anih un khawl uh hi. Phuitong kung ahihleh niim dildial in anuai ah atehvul aa pulh teh khat zong omlo hi.

“Hih maw. Amau akiciam uh aa asuan uh?”

“Hei. Hih phuitong kung pen hi ei”

“Tua dan ahileh kei kua cih amasa pen in hong kithei sak ning maw”

Alim hoihna mun khat ah Pu Tuan tusak in khangna pa in gen hi.

“Ki theihsak se zong kul kei ei, tangthu ii tawpna hong gen masa phot phot dih ve”

Ko sangin Pu Tuan lawp zaw kaanlai hi. Khangno pa zong khatvei khuisa in gen hong kipan hi.

Tangval pa pen galsung ah asi hilo hi. Gal veng dong bang mah cilo in nungta hi. Gal veng ciang alawmnu tawh akiciamna mun ah hong ciah kik ding in alawmnu tawh kimu ta ding. Ahihang amah lungdam vetlo hi. Ahang pen galsung ah a omna agiahbuk uh gal te in atheih lohkal in buluh hi. Gal te adal kawm in tua khua aa te an ahuansak numei khat tautawh kap khial kha hi. Ahihang tua nu silo hi. Ahihang khetawng in om hi. Tangval pa zong hipen kei khialhna hang ahiciang anuntak sung kei man kavak ding hi ci in hong khentat hi.

Alawm galkap te in ama kamsait man zong hi ci in thoh uh hangin khialhna khat ka khialh khit ciang adang bang mah khial nuam nawn ke ing ciin thoh zawh in omlo hi. Tua nu teenpih in galsung ah si cihdan aa kithei sak nuam ahihciang aa tua phuitong nuai aa ama ciahkik ding angak alawmnu atheisaklo ahi hi.

Bang mah asem zolo tua numei akawi kawm in kum khat in kum khat hong bei toto hi. Asih zawh kum khat khit ciang adiary laibu a innkuan pih te in mu uh hi. Laibu sung ah phuitong kung tawh kiciamna abawlpih alawmnu nikhat bek zong amangngilh lohna thu, khialhna khat hang in a it mahmah alawmnu tawh akigam latna thu, asih dong in alawmnu alunggulhna thu te kigelh hi.

“Tua laibu pen hih ah” athong ip sung pan khangno pa in laibu khat hong lakhia hi.

“Kong gen ding omlai hi. Ka pa in asih madong alawm ngaihnu tung ah ciampello hi. Ka nu tengpih ing aci pong bek mah ahi hi. Unau itna dan, lawm le gual ki itna dan bek tawh amau om khawm uh hi. Kei pen amau ii hong kep naupang hing”

“Imm … nang zong lungnuam takin na pai in maw. Ama lungsim zong nang tawh ciampello in omkhawm den hi.”
Pu Tuan zong phuitong nuai lung nuam hetlo in takin khasiatna kammal pawlkhat hong gingkhia hi.

“Kong gen ding khat om lai hi.”

Athong ip sung pan bungno khat khangno pa in hong lakhia hi.

“Hi pen kei hong kem ka pa ii guhvui hi. Mun khat ah vuikhawm in ci in ka nu in hong vaikhak hi.”

“Hi sing nuia ah phum pah lel oo. Amah zong hinuai ah ka phum uh hi.”

Diary laibu le tangval pa guhvui phuitong kung nuai ah aphum khit ciang khangno pa paikhia hi. Pu Tuan ahileh tua singnuai ah tanglo in tu ngiungeu hi. Khuamui ahihiam meikhu hiam meikhu dan pawlkhat in lui gei le phuitong kung kimkot ah tawmvei hong tuam hi.

Hau Lun in ka khutpan hong kai in ciah ni u hong ci hi. Tua mun pan ciah ding in ka kitawi laitak un phuitong kung ii ahia lam gal ah khat le khat khut kilen in damdam aa apai liim khat ka mu hi. Kei bek amu khial ka hitam ci in Hau Lun kadot leh …

“Hita leh hita kei leh ‘amau gel’ nawng kai sakse kei oo”

Hau Lun kammal hangin ka mai hong tai hi. Amau zong alung uh leng lua zen ding hiven kei ding in ka kingaihsut ciang hehpih huai ka sa mahmah hi.

Asawt lo in keizong galsung ah maikuan ding ka hihi. Hau Lun in agensa mah bangin mawtaw gei ah hong khak loh hang in tua phuitong nuai ah kiciamna thu na ngen ding cih ka thei hi.

Kha khat khit ciang Hau Lun kiang pan laikhak kahh ka ngah hi. Lai sung ah Pu Tuan si cih thu, a ihmut suak aa si hi in sih nuam hi cih thu, amaitang tung ah maitai sa in si hi ci thu te kigelh hi.

Pu Tuan in asihma in Hau Lun kiang ah lai khat pia ngei ci hi. Akivui khit ciang simpat ding in vaikha hi. Pu Tuan in hun khat lai in mopawi ding in gelngei in mopa ding ahina thu atangtun lohna thu, ciam apello tua nungak nu ateenpih sawmna aading akisik kikna thu, tua khit ciang tua nungak nu akham zawhlohna aading zong akisikna thu, tua nungak nu angah zawhloh hangin kem ding ci in ahamciam na thu, hibang aa tangthu agengen na hang pen nikhat ni ciang tua tangval pa in phuitong nuai ah alawmnu in ngak cih thei in hong ciahkik theih nading ngimna ahihna thu, tu in ahileh amau tegel nuntakna ii gungal khat kigawm theita ahihman in ka lungkim mahmah hi cih thu te kigelh ci hi.

Kum tampi ka theih nopnop hih tangthu ii tawpna tu in ka thei ta hi. Tangval pa hita leh, nungak nu hita leh, Pu Tuan hita leh, tua khit ciang khuano aa numei nu hita leh avek un itna cihpen atel takpi te ahi uh hi. Itna pen itna tawh it uh aa itna tung ah aciampello mite ahi uhi. Tangthu avek in ka theih gaih khit ciang akigen theilo natna khat ka lungsim sung ah hong lut hi. Hau Lun ii hong laikhak na nuai ah PS in hibang in hong gelh hi. “U aw bang bang hang hita leh na thau mawk lot kei in maw.” Lungdam, Peter Suumpi (Source: NaingNaingSaNay)