Philosopher, Inventor & Writer ~ Pau Khat Suan

Philosopher, Inventor & Writer ~ Pau Khat Suan

Philosopher, Inventor leh Writer i cihte pen thu ngaihsunte leh nathak abawlte cihna hi a, a min lawh a baihziau zah in a nasep a baihziau khollo, a hiziau hetlo ahi hi.

Philosopherte’ thugen a lamdang hetlo, i phawkkhak loh bek hi a i theihciang a hilel thu tampi om hi. I theihkhit ciang ahi lel ahih hang i theihma a i phawkkhak loh, ong phawksak kei le uh i theihloh ding thu hithei peuhmah hi. Amau’ tuabang thu a phawktheihna ding un thu tampi na ngaihsun, na sin, na enen uh a, tua khitciang a genkhiat uh thute hi in, amau’ gen za a i phawk ciang amau’ theihzah mah a thei i kisak leh nahi hetlo hi.

“Democracy” cih thu BC kum 200 kim laipek a a ngaihsun masa Greek mipilte’ ngaihsutna kum tulnih val khit tuhun ciang e’n zangthei nailo, theizo nailo lai zen hihang.

Nathak bawl, inventorte’ muhkhiat bawlkhiat nate zong a bawl khitteh a baihno khat, a hilel, a lamdang hiaulo tawh a kibat hang na hikhin hetlo hi. Gtn. Buangnai a nam tuamtuam a a kizangthei a suahna ding in Good Year i hanciamna pen thuneu deklo hi. Nisim a i zat meigit, meisah ong pianna ding, kaat, gas leh sik-huup zang a mei ong pianna ding a ngaihsun khia masate’ ngaihsutna pan a bawlkhiat pen thuneu hi hetlo hi.

Computer pen mimalkim zattheih ahi ding a ngaihsun khia a, tua mimalzat computer ahoih semsem ding a Window a phuankhiapa thuneu deklo a, leitung ah mihaupen suakzo hi.

Thu ngaihsun pilna neite’ ngaihsutna leh nathak bawlkhiate’ thugen leh bawlkhiat van leh nate a zatpih siamte mipil leh mi nuamsa suak uh a, mi tampi ading in phattuamna nangwn piangsak thei hi.

Lai at siam tampite Kawlte’n “Sayii saya” Mangte’n “Writer” ci hithiat hi. A taktak in lai hoih tuabang a atthei sayii saya (or) writer a hihna ding in thu bangzah ngaihsun a, lai bangzah sim, bangzah thei hiding cih ki ngaihsun ban zolo hi. Tampi a ngaihsut, a sin, a theih khitciang laibu, laigual hoih tuabang ong atkhia thei pan ahih lam phawkhuai peuhmah hi. Piaktheih hileh pahtawina, minphatna bang piakhuai tham uh hi.

Hihbang a kilawm kituak a a kipahtawi khollo, pahtawina a ngahlo mi thupi leh nasep thupi te ciapteh leh zahtak piakhuai asa kahi hi. Pau Khat Suan