Philippines, Marawi City sungah migilo tetawh buaina hangin asi mi 103 phakhinta

Philippines, Marawi City sungah migilo tetawh buaina hangin asi mi 103 phakhinta

Philippines leitawlam aomm Marawi City sungah abeisa kalkhatsung kikapna leh buaina hangin asi pen mi 103 valkhinta hi ci’n Manila Standard te’n Sunday ni in pulakkhia uhhi.

Marawi City sungah IS galkapte leh Philippines kumpi galkapte kido ngekngek uh a, khuasung lampitung ahzong kikapna omzel ahih manin, asi lakah khuasungmi Civilian 27 bang kihel cihi.

Adang asi te lakah Philippines galkap leh palik 15 bang kihel uh a, IS Terrorist Maute Group paninzong mi 61 bang sikhin cihi. Tuateng avekin akigawm ciangin misi limlim pen luang 103 tak phakhinta cimawk hi.

Khuasungmi Civilian asi 27 lakah numei 3 leh naupang khatzong kihelkha uh a, University geikhat ah aluanghawm kimukhia hi.

Regional Military Spokesman Lieutenant Colonel Jo-ar Herrera in agenkhiatna ah Saturday ni in Rescue Operations kabawlna panun tua khuasungmite ii aluanghawm aki mukhia ahihi. Hih Terrorist tepen mihing lungsim pualo anti-people ahi uhhi ci’n genkhia hi.

Abeisa Tuesday ni in IS tetawh akizom migilo galkapte omna ahi Mindanao Island tungah Philippines president Rodrigo Duterte in Martial law atangko khiatciangin buaina hongki limpatmahmah ahihi.

Video etnopleh: Islamist militants kill civilians in fighting with Philippine forces

Philippines Star te genkhiatna ah kumpi galkapte leh Maute Terrorist te kikal ah a awkcip Christian mi 39 tezong ki honkhiathei cihi. Tuate hotkhiattheih nadingin apankhia pen Provincial Government ah Information Officer asem ahi Salma Jayne Tamano leh ameltheihte tungtawn in aki honkhiathei cihi.

Tuanu pen Muslim biakna hi a, amahleh alawmte khat ii huhna tawh galkidona ah a awkcip Christian mi 39 te ki honkhiathei hi. Muslim leh Christian te panlakkhopna tangthu hoihmahmah khat hi ci’n ki ciamteh hi.

More: Philippines khuasung ah zatep te thongsung ah kha 4 sung ki khumcipding

Tua Christian a awkcip mi 39 tepen nitampitak bangmah nekding omlo, sualtung ah bokcipden uh cimawk hi. Tua abukcipna vengsung tengah thautawi migilo te omden ahih manin nai 36 sungbang busuakcip uh a, bangmah nevetlo cimawk hi. ZD Sawltak #zomidaily