Philippines gamsung aom Hotel khat meikang, mi 3 si, 23 liam

Philippines gamsung aom Hotel khat meikang, mi 3 si, 23 liam

Philippines gam ii Capital khuapi ahi Manila City sung aom Hotel khat meikang in mi 3 in sihlawh a, adangzong mi 23 liamgawp cih Reuters pan kiza hi. Tuni Sunday (March 18) in akang hi a, Hotel meikang pen anuailam panin huaisialua ahih manin, innkhumtung Rooftop ah Helicopter tawh pawlkhat ki nawnkhia uhhi ci’n kumpi thunei te’n genkhia hi.

Tua meikatna Hotel pen Waterfront Manila Pavilion kici a, High-rise Hotel and Casino Complex khat ahihi. Sunday zingsanglam in meikang akipan hi a, nai 9 sungbang meiphelh in kibuaikhop mahmah ciliang hi.

Tua Hotel meikatna hangin amasa in mi 4 sikhin ci’n kumpi thunei te’n agenkhiat uh hi a, ahi zongin zato panin mikhat sisuaklo ahih manin, asi pen mi 3 hi ci’n Metro Manila Development Authority acting chief Jojo Garcia in genkhia hi.

Tua asi mi 3 tepen Hotel sungah mei akat ciangin meikhu tawh ki bilhcip “suffocated” ahih manin, atuapsung ah meikhu tamlutlua in asi uh kici hi. Tualo aliam mi 23 tezong avek in Hospital ah kipuak in zatui kibawl uhhi ci’n Manila City’s Disaster Risk Reduction Chief asem laitak ahi Johnny Yu in genkhia hi.

Meikhu pen tamlua mahmah in, huihzong khauhmahmah hi. Huih leh meikhu pen buaihuai mahmah in, meiphelh Firefighter te adingin asungah a awkcipte ahonkhiat dandingpen hamsa saktuam mahmah hi ci’n Johnny Yu in Reporters te tungah genkhia hi.

Hih meikang Hotel pen innsang mahmah High-rise Building khat hi a, akigawm in inndawl 21 apha ahihi. Fire Authorities te genkhiatna ah meikuang akipatna pen Casino or Mezzanine Area panin akipan hiding in ki ummawh hi ci’n genkhia uhhi.

Hotel sungah a awkcip acimawh tepen anuailam ah kumsuk theinawnlo uh ahih manin, atungzangdawn ah ki kahtosakvet in, inntungdawn Rooftop panin Helicopter tawh pawlkhat ki nawnkhiathei hi. Metro Manila akici Cities 16 panin meiphelhding in kidelh kihuh ngeingai hi ci’n Manila’s Fire Department te’n genkhia hi.

Hihpen meikang ahuaisia mahmah “Major Fire” khat ahihi. Mi tampitak in meikhu dikngawhkha ahih manin zato ah kipuakpah uhhi ci’n Senior Fire Officer Marlon Banaag in genkhia hi.

Video: Three people were killed and 23 injured by a major hotel fire in the Philippine capital Manila on Sunday (Mar 18), with others plucked by helicopter from the rooftop of the building engulfed in thick black smoke, authorities said.

Sunday sunlam ciangin Philippines President Rodrigo Duterte inzong meikatna atunglam panin Helicopter khattawh kileh kawikawi in, Aerial Survey encianna nei cihi.

Philippines gamsung ah Building innpi tepen Safety Standards omlualo ahih manin, mei akat ciangin huaisiathei mahmah hi. Tunai abeisa tuahsiatna ahuaisia phadiak ahihleh 2015 kumin Manila khuapualam meikatna pen ahuaisia penpen ahihi. Tua Suburban Manila meikatna hangin mi 72 takin sihlawh uh a, ahuaisiapenpen “Deadliest Fire” in akiciamteh ahihi.

Nungkum December khasugn inzong Davao City aom Shopping Mall leh Call Center ah mei nasiatak in kanggawp ahih manin, mi 38 takin sihlawh uhhi.

More: Yangon thuthang: inn kicim, hotel meikang, gamdangsum tawh kiman

Nungkum June khasung inzong Manila City sung aom Resorts World Manila hotel-casino Complex sungah thautawi migilo te’n thagum tawh dona “Attack” nasiatak in bawl uh a, mi 37 takin sihlawh uhhi. Sawltak #zomidaily