Vondeih Kep Ding – 137 (Dimno’ Pa)

Vondeih Kep Ding – 137 (Dimno’ Pa)

Tawngno,

Tawngno aw, sih ding leh hin ding pen Pasian khut sungah om ahih hangin ei mahmah zong i kikep, i kikhual kul ding hi. Ahang in mihingte pen ganhingte tawh kibang lo-in nate theihtheihna, a sia leh a pha khentel theihna lungsim nei hi hang.

Lawm ngaihte ahih zenzen hangin i sung thu khempeuh gen gaih ding hi lo-a, Gmail leh Facebook’s password te zong genkhit pah ding hi lo hi. Lawm kingai ihi zong, nupa ihi zongin kitheih sak gaih loh ding, zatkhop loh ding na tampi om hi. Tuate i zatsiam kei leh i kikal ah buaina hong piang ding hi.

Lawhcing in midangte tungah i om zong angtang huai thu khat hi. Midangte tawh kitehkak in i omom sangin ei leh ei nisim in kitehkak in zanni sangin tuni in ka pil zawk mateng ci-in hamciam ding thupi zaw kha in um ing.

Pawlkhatte in a meelhoihna uh kiphatsak pih leuleu uh hi. Kipuahpuah, kizemzem napi-uh in ahi zongin tawmvei kal sungin a meelhoihna uh hong bei in, tomkaal sungin tul ziau lel uh hi. Pilna tawh a kizem hileng bei hun, siat hun leh tul hun cih om lo hi. Pilna pen kizemna hoih pen, kipuahna hoih pen in nei ding hi hang.

Pumpi tungah suang manpha tampi tawh i kizem sangin pilna tawh kizem leng lunggulh huai zaw sa ing. Tua suang manphate in kiphatsakna lungsim hong guan in mi hong enneu sak in kisai lopi-in hong simmawh sak thei hi. Hauhna sangin pilna pen deih huai zaw takpi hi.

Hat i cih ciangin mi bangzah vattuk zo cih hi lo-in, a tuk khinsa mi bangzah phon to kik zo, cih hisak in, itna nei i cih ciangin zong ei hong it khempeuh a vek in it kik zo cih hisak lo-in, ei hong mudah mite zong it kik zo, cihlam in a khiatna khia in la thei ta leng ut ing.

Hong it,
Na Pa