Philippines galkapte leh thautawi migilo te kikap, mi 9 si

Philippines galkapte leh thautawi migilo te kikap, mi 9 si

Philippines gamsung ahzong IS migilo tetawh akizom “Abu Sayyaf” akici thautawi migilo honkhat om uhhi. Tua thautawi migilo te leh Philippines galkap te zanni Tuesday ni in kikapgawp uh a, mi 9 si cih AFP pan kiza hi. Asi mi 9 lakah Philippine security forces 4 kihel uh a, adang mi 5 tepen Abu Sayyaf thautawi migilo te ahi uhhi.

Philippines Officials te genkhiatna ah Bohol Island tungah Abu Sayyaf migilo mi 5 kikaplum in, Assault Rifle 4 leh apuakkhamthei Bomb nam khatzong kiman hi ci uhhi.

Hih Abu Sayyaf migilo tepen Philippines gam ii leitawlam aom Bohol Island tungah kigualzosak mahmah uh a, adiakdiak in gamdangmi Foreigners te mancip in sumtawh kitansak zelzel uhhi.

Tutung Abu Sayyaf migilo aki kaplumte lakah amakaipi khatzong kihel cihi. Tuapa pen Abu Rami ci’n kithei a, sumtawh kitatsakding in amatte uh Video kizaih in akhahkhiat uhciangin Mangpau tawh apauzelpa kici hi. Adang Mangpau asiamzong ommello cisawnsawn hi.

US leh Australia kumpi te’nzong Bohol Island leh Cebu Island te ah migilo “Terrorist Groups” te’n Kidnap bawlsawm cih zakna nei uh ahih manin, agammi te uhtung ah zaksakna Warning pia uh kici hi.

US Advisory khat ii genkhiatna ah Central Visayas aom Cebu leh Bohol Province sungah thautawi migilo te’n Kidnap bawlsawm cih US Embassy in thusim zakna kinei cihi.

Philippines galkap zong 4 takin sihlawh uh a, Military chief of staff General Eduardo Ano ii genna ah Abu Sayyaf tepen thauhoih tampi nanei uh a, ki limkaptuak mahmah cihi.

Tukum kipatlam in German Tourist khat hih Abu Sayyaf migilo te’n a ngawng tansak uhhi. Nungkumsung inzong Canadian Tourist mi 2 a nawng tansak uhhi.

Also read: Philippines ah IS migilo tetawh akizom te’n Germany gammi khat a ngawng tansak

Philippines kumpi inzong huamahmah uh a, kikaptuah zelzel uh himahleh bengsiangzo nailo uhhi. ZD Sawltak #zomidaily