Phavang’ Kialpi ~ Sia Do Khup

Phavang’ Kialpi ~ Sia Do Khup

PHAVANG’ KIALPI – Tulaitak tuk leh phalbi gamgi hun pen phavang’(vang pen eu sim in) kici a, anlui teng lah beita, anthak lah kila taktak nailo hun ahih manin “Phavang’ Kial kici hi.

KI-ITNA LAH HUN HI

Anpal zawdeuh a neite lo ah vaimin ngek peuh huan hulin khin niam pen ah mei tawh kigamsak a, kisu, kikhiah thei liamliam hi. Anpal kisim ngeingai hun, ki-itna lah hun kipiak kibah hun ahi hi.

ZOGAM AH KIAL TUNG

Nuntak khuasak zia hong kilaih mahmah a, nidangin lo kikho ciat ahih manin Zogam pen ankhing khamna gam hinapi tu-in sum zon lamsang vive tawh kivak tamzaw a lokho nawnlo khua tam ta hi.

Covid 19 leh gam buaina hong kigawm ciangin kuamah sum zong thei om nawnlo ahih manin Zogam ah kialpi tunga, tuktung ding cih lamet omlo sawnsawn hi, lo kho nawnlo tampi om hi.

LAMZANG KA MANGMATNA THU

August 26 ni zanin Lamzang ka mangmat zenzen hi. A khua uah ka pai a, ankhing sim nading ka zon leh “Aa Nangte longal an sim theih nading om nawn kei” hong kici mawk hi. Zingsang nai 3:00 AM in ka khanglo a, ihmu nawn loin USA ah Ph.D sin a om Rev.Thang Van Lian, ka hopih pah a, “Lamzang huh ni” ka ci hi. Kam khat zong hong nial loin “Vaihawm ni ei Pa” hong ci pah hi.

Ni thum sung bekbekin Lamzang huh nading tampi Topa in hong ngahsak hi. Lamzang suan gamdang a omte a pia nuam kituh liang uh hi.

I KHUA CIAT HUH NI MAW

Phavang’ kial hun pen i pu i pa ten ki-itna lah hunin zang uh a, nek tangtang mah kipia kikhen uh hi. Lamzang huh nadingin gamdang a te bek hiloin khua-ngak a cithei zawdeuhte zong kipia khia uh hi.

Tua mah bangin ei khuadang ten zong hanciam khawm ciat leng phavang’ kialpi i do zo ding hi. Covid 19 adingin i pia ciat a, i do zo ta hi. Kial adingin zong piakhia ding hanga phavang’ kialpi do zo ding hihang. Topa in Zogam thupha hong pia ta hen.

LAMZANG HUHNA NI 3 SUNGA NGAH MASAK TENG

• 1. Sia Van Lian $100
• 2. Pum Khai $100
• 3.Sumpi $100
• 4. Sia Go Van Ks.300,000
• 5. Niangsen Aussie Ks.500,000
• 6. Gmangno Ks.600,000 ( Ko khua bel hi kei, ka pute khua hi ci)
• 7.Sb Mung $ 200
• 8. Niang Ciin $100
• 9. Cing Nuam Kim $100
• 10. Go Khai antang puakna bei khempeuh
• 11. Khai Lek $100
• 12. Aa Nang $200
• 13. Kimpite unau Ks.650,000
• 14. Sia Lampi $300
• 15. Suih Lun $100
• 16. Ciang Khante nupa $100
• 17. Siampi $100
• 18. Evan. Joshua Cin K Piang Ks.100,000 (“Sia aw, na post ka muh ciang om thei keng, Ks.100,000 hong kihelsak in” ci mawk ei. Lungdam.
• 19. Nu Len Lun Niang $100
• 20. Sian Banzal (Malay-Lamzang) Ks.100,000 (Ko Malaysia lamah nong don loh, ci-in khasia nuam zawzen ei) A ban hong paipai lai inteh. Sia Do Khup