Biakna pawlpi leh leitungthu – mihingdeihna hong kigawmluat ciang ~ Rev. Fr. Damian Dal

Biakna pawlpi leh leitungthu – mihingdeihna hong kigawmluat ciang ~ Rev. Fr. Damian Dal

(England kumpi Henry VIII leh Catholic Pawlpi thu, St Thomas More thu a tom in) England Tudor Kumpi uk hunsung ah kumpi nihna a hi, Henry VIII, uk sung in Church of England leh Pope hong kikhenin England reformation (Puahthakpawlpi ) hong piang khia a hihi.

Henry pen 1491 kum June 28 ni in Greenwich ah suak a, kum 11 a phak 1502 kum in a Upa Arthur in nusia a hihman in kumpi gamluah ding hongsuak hi. Tuazawh kum 7 ciang in a Pa Henry VII in hong nusia leuleu a hih man in, kum 18 a phak kum in kumpi hongsuak hi. A sawtlo in, a Upa Arthur zi, meigong Catherine of Aragon tawh hong kiteng uh a,tanuno Mary a nei uh hi. A cil lam hun lai in, Cardinal Thomas Wolsey pen a mah tang in, a huntam zaw, kumpivai a vansak man in, Wolsey in Lord Chancellor a kici, kumpi paizia thukhen ki-ukna lamlen makaipi 1515 kum in hong ngah hi.

Henry in laam leh sabeng a uuk ban ah, galsim zong a uukmahmah na dung zui in, Wolsey makaihna tawh Piantit(French) a masapen in hong sim uh hi. Hong gualzo uh a hih man in,Wolsey ulian makai siam khat a hih lam hong kilangh khia sak tuam hi. 1513 kum in Scotland gam hongzawh leuleu uh hang in, Piantit galdo pen a beitam leh upmawh bang in hong tantun melloh takteh, Henry’ ta pasal a deihna, hong khang semsem hi. Wolsey zakiat lam hong manawh ta in, Thomas More in a masa pen Layman Lord Chancellor hong sem hi.

A hizong Thomas Cromwell (Chief Minister) in kumpipa tawh khut kilen in, kumpimaban te tampi hong zom a hi hi. Henry in azi mengong Catherine tawh tanumeino, Mary, neizobek a hih man in, maakding hong sawm hi. Azi a hin-maakding pen Pope in a phal kei hi. A hizong Pope thu manglo in Anne Boleyn tenpih teitei a, Elizabeth kici tanumei khat mah hongnei veve hi. Tuabang teng hang in, Pope in Henry pen, pawlpi pualam koihna-khalna (ex-communicate) a pia hi.

Tua dungzui in, Henry in Parliament thukhun bawl-in Rome tawh kizopna hong botsat ta hi. Tuakhit teh, Wolsey zalaih Thomas Cromwell huhna tawh Church of England lutang in hong ding a, biakna pawlpi vaiteng a makhut sung ah a koihcip ta hi. Tapa neilo Anne Boleyn hong cimtak ta in, kumpipa tung citaklo cih mawhna tawh a gui-awklum sak hi.

Catholic upna a letcip nopmahmah hang in, upna langpang’(Protestant, reformer) a munmun ah hong khang ta a, pawlpi langpang German kumpi tawh a kizopnopna hangin, Cromwell makaih na tawh Anne of Cleves tawh hong kiteng leuleu hi.Tawmveil sung bek hong kiteng in, thusuak zolo a hihman in, Cromwell hong mawhsak in, sihna a pia hi. Tua bang teng tawh, a nuntaak sung in, zi guk ciang hong neihna sung ah,a maak leh sihna a piak baang teng tawh a tawpna ah a gamhluah ding, tapa khat hong nei demdam sam in 1547 January 28 in leitung hong nusia ta hi.

Protestants/ Reformers

Tudor kumpi hun kiim pawl mah in Catholic pawlpi thukhun leh upna te’ kiplet leh zungkha zolo German mi ex-clergy Martin Luther leh, Scotland pan ex-clergy mah John Knox cih tehong khangkhia a hihi. Martin Luther pen mikim phial in ih thei khin dinga, John Knox a hih leh Presbyterian Church(Church of Scotland) makaipa in kiciam teh a hihi. Hih te gel pen, taangthu paizia etkaak theih na ding in, a kigen khapak a hihi. Pasian leh pawlpi langpang ding pen miginalo/mihai/minautang mawkmawk hilo a,a pil/alian/asiam/aminthang zawdeuh tata hong hi kha thei hi, cihzong hongphawksak tuam hi.

St. Thomas More

Henry VIII kumpi in a lal sung in, upna hangin bawlsiatna a thuak mitampi takmah zong a om hi. Tua te lak ah Sir Thomas More Leh Bishop Fisher te a minthang phadiak hi. Sir Thomas pen kumpipa leh parliament ii a muan mahmah mipil Lord Chancellor a hi zong-in, kumpipa tatzia, gampai zia leh a upna kituak a saklohman leh a phadiak in Catholic pawlpi upna a keptintenna hang tawh Tower of London a kici, London Tower Bridge gei, kumpi huang sung ah ngawngtanhna-sihna thuak a hi hi. Sir Thomas More in sihna athuakma lian’ a nunung pen hun a, azakhempeuh a mulkim sakzo a minthang mah a kammal in: “Kumpipa nasemhoih khat ka hihi, a hizong Pasian kamasak zaw ding hi – I die the King’s good servant, but God’s first” a hi hi.

Pope Leo XIII in 1886 in misiangtho suahtheihna thupha (Beatification) a na pia a, Pope Pius XI in 1935 ciang in Sir Thomas More leh Bishop Fisher pen misiangtho Saint Thomas More and Saint John Fisher in a ciamteh hi. St Thomas More pen Lawyer khat hi a,‘the Saint of Conscience and integrity’ a ci zong om hi. Pope John Paul II in, 2000 kum in “ Heavenly patron of Statesman and Politicians”ci- in a taangko khia hi. St. Thomas More – Pray for us.

Behlapna

Nidang lai-in ih khantoh zawknang ci-in Mandalay Archdiocese khutnuai pan Diocese khat ih ngah nang ki lunggulh mahmah a, ki ngah takpi hi. Tua khit teh, ei leh ei ki makaih theih ding deihna tawh, Diocese khat mah kilunggulh leuleu a, Pasian in eisung pan, Bishop khat hong piak na dung zui in, ,Pasian nasem te pawlkhat leh thuzuite kikal ah kinopmawhna thu piangzo zahdong in ih hanciam phamahmah a, zong ihngah leuleu hi.

Ei deihna leh Pasian deihna kituak cih phot mai ding lobuang a dang gen huai nawnlo a hi hi. Diocese ih ngah hang’ Pasian in Bishop hong pia kei leh, Yangon, Mandalay diocese cihte bangin diocese dang pan bishop ten, hong makaih ding a hi lel ngel hi. Bangbang a hizong, deihteng ngahnung sang ah, Pasian tung’ lungdam kohding leh mihing te lampi tawnlo a, Pasian lampi totzawh ding lunggulh leh deihhuai a hihi.

Ih biak Topa’n ei a tuu te cing ding a hong piak, Bishop pa’ hong kepsak ding, mailam ah Pasian nasemding ih Diocese pan tampi hong piaknang leh nungzuihoih ih suahzawh tawntung nang’ thungetna ah, phawkciat ni. Rev Fr Damian Dal

A lunglut leh a simbeh nuamte ading Etkaak leh tomlaak na bulte:

1. Church history of Britain (BBC websites)
2. Catholic Encyclopidia
3. Wikipedia
4. The Tudor leh history of Thomas More.