Pawlpi leh AANA

Pawlpi leh AANA

Hih thulu tawh kisai in ngaihsut ding leh ngaihsut huai thu tampi om kasa hi. Banghang hiam cihleh tu hun ciangin hi AANA cih kammal hangin leitung ki ukna lam ah hitaleh Pawlpi ki ukna lam ah hitaleh buaina tampi hong piang in, khat le khat ki telkhelhna, kimuhdahan leh kilangdona te piangsak hi. Tua AANA ih cih pen Kawl kammal ih kawm hi-a, Mikangpau in Authority (Thuneihna ) ahih kei leh Power (Thahatna) zong kici thei in ka umhi. Ahih leh “Pawlpi in AANA nei hi” ih cih teh tua AANA cih kammal ii deihna bulpi in bang hi ding hiam?

Hih AANA cih kammal pen akizang khial thei mahmah kammal khat ahihi. Adiakdiak in ei Kawlgam sunga teeng kawlgam mite aading phadiak in kitelkhial tawntung hi. Banghanghiam cih leh kum sawmguk sung phial galkap kumpi in hong uk a, tua ki ukna pen (AANA SHIN SANIT) kici hi. Tua ahih manin AANA cih kammal pen gammite lungtang sungah a hoihlam (positive sense) sangin a hoihlolam (negative sense) in kisang zaw hi. Mikhat in AANA nei akicih leh tua mipa pen mite tungah a ut bangbangin na asem thei pa, a lungsim sunga om bangbang kuama maitang enlo in asem thei pa-in kimu hi. Tua ahih manin mi tampi te’n tua thuneihna AANA pen hong iiplah in, hong lunggulh ta uhhi.

Tua hi-a, hih lungsimpuak pen Kauno (virus) bangin kizel in, ih Christian lungsim na ngawn hong tawknawi sak hi. Hih thu hangin Pawlpi sungah buaina tuamtuam hong piang hi. Hih thu hangin kipawlna sungah ki khenkhakna piang hi. Hih thu hang mah-in Christian akici Jesu nungzui te (Christocentric or Theocentric) Chirstu tungah kinga nawnlo, Jesu pen LAAIPI (Cetre) ah kikoih nawnlo in, (Anthropocentric or Ethnocentric) minam tung leh beh le phung tungah kingazaw ta hi. Christian te’n Christu mel pua nawnlo in leitung mel pua ta a, Gospel na ngawn pen political gospel, economic gospel, ethnical gospel ki suaksak mawkta hi. Hih pen adah huai mahmah thu khat ahihi.

Pawlpi tangthu tawmkhat nunghei in enkik leng, hih thu hang mah in AD 600 kiim Middle Ages akipat hun Pawl in Church leh State kikal, Westen Church leh Eastern Church kikal ah buaina pawl khat napiang ngei hi. Ahing zongin kamphatna tawh tua hun laitak a, Pawlpi sungah AANA anei, Pope Gregory the Great in, amah leh amah, “Servus Servorum” “Nasem te Nasempa” or “Sila te Silapa” ka hihi, ci-in SILA/NASEM min pua-in Pawlpi na kalsuanpih kik zo hi. Ahi zongin tua zawh a sawtlo The Late Middle Ages hun (kum 1378 pan 1417 hun) leuleu ciangin anti-pope kici hongpiang leuleu hi. Hunkhat sungin gam thum ah pope thum hong om mawk hi. Hih thupiang te pen thungeihnopna pan hongpiangkhia hi cileng kikhial lo kha ding hi.

Hih bang thu te pen Catholic Pawlpi in a tuah ngeisa thu ahih man in pilvang mahmah ta hi. Ahi zongin, tuma kum 500 kiim pan kipan in hong khang khia pawlpi tuamtuam te sungah zong hibang thu tampi tak tu in hong piang ahih man in a lungngaih huai mahmah thu khat ahihi. Gentehna in MBC pan ZBC, CBC, FBC, TBC, KBC cih ban in hong kikhen takteh Christian hong suaksak Baptism/Kituiphumna pen Minam leh AANA/Thuneihnopna in nawmvalh (nangvalh) ta ahih manin, Pasian leh Jesu min ih lawhlawh tei hangin Ethnocentric/Powercentric minam kipawlna mawkmawk bang kek khat hong suak ta hi. Hih bang thu te ei Catholic Pawlpi sungah hong lut khak loh ding zong kidawp huai mahmah hi. Banghang hiam cih leh Christian ih cih pen Jews leh Gentiles kigawm khawm ahihi.

Tua hi-a, AANA tawh kisai in, tu laitak ei Catholic Pawlpi honghilhna leh Pawlpi hong kalsuan pih zia in koici bang hi-a, tu laitak ei thuzui te bangci kalsuan ih hiam cih ei leh ei ih ki-et kik zelzel ding zonog thupi kasa hi. Hih tawh kisai in tulaitak a Alianbel Siampipa ahi, Pope Francis in St. Peter’ Tokhompi tung pan amasa penpen agen thu kong pulak nuam hi. “Certainly, Jesus Christ conferred power upon Peter, but what sort of power was it? Jesus’ three question to Peter about love are followed by three commands: feed my lambs, feed my sheep. Let us never forget that authentic power is service, and that the Pope too, when exercising power, must enter ever more fully into that service which has its radiant culmination on the Cross.” “Taktak in cileng, Topa Jesu in Peter tungah AANA/Power apia takpi mah hi, ahizong in tua AANA in bangci bang AANA hiam? Topa Jesu in Peter kiangah kei nong it hiam ci-in thum vei vilvel a dot khitteh, katuu te navak in, katuu te na cing in, katuu te kem in, cih thupiak namthum in nungzuih hi. Tua ahih manin tua AANA/Power akhiatna taktak pen Sepkhiatna/kipiakkhiatna ahih lam mangngilh ngei kei ni. Tua dung zui in, Pope zong ama tungah akipia AANA/Power azat ciangin, Singlamteh tungpan asangpen khuavakt tawh hong lahkhiat tua sepkhiatna, kipiakkhiatna tawh picing takin atawntung in asep ding ahihi.”

Hih mun ah Pope in Power cih kammal zanga, tua kammal pen ei pau AANA kici-in, akhiatna taktak pen septheihna/kipiakkhiatna, sepzawhna, thahatna cih bang dan in kikhia thei hi. Gentehna in Electric power ihcih ciangin meitha hatna hi-a, tua pen Volt(AC) ahih kei leh Watt(DC) tawh kilak hi. A power atam leh meitha hat kisi in, tua in meitang vamsak in, muntampi ah tangsak hi. Tua ahih manin Power ihcih pen thuneihna leh gualtungtuanna lam hi zawlo in, septheihna, sepzawhna leh thahatna lam hizaw hi.

Tua hi-a, Catholic Pawlpi sungah AANA nei ahi, Alianbel Siampipa mahmah in hibangin AANA/Power cih adeihna bulpi hong gen khin ahih manin, ei Catholic Pawlpi pen AANA tawh nasem te hilo in, Service/ (ASIKHAN)/SILA banga Sepkhiatna tawh nasem te ih hihi cih phawk kawm in, Christu bek mah mitsuan in Pasian gam leh ama minam aading a sem zo tawntung te ih hih ding ih ki hanthawn hi.

Chirstu sungah itna tawh,

Fr. Raphael Khuppi