Tedim ICU Building khuambulte thungetna tawh apna kinei

Tedim ICU Building khuambulte thungetna tawh apna kinei

Tedim Zatopi Vaikin Panpih Committee makaihna tawh akilam laitak ahi Tedim ICU Building khuambulte thungetna tawh apna May 19, 2020 nai 1:00PM hunin kinei hi, cih thu kiza hi. Hih hun sungah pawlpi tuamtuam pan Biakna Sia pawlkhat kihelthei in State Hluttaw mipi palai Pu Thangkhup, Tedim gqm huam sung hausapipa AD U Hla Soe, Tedim Zatopi Siavuanpipa Dr. Zaw Myint Naing, Khuanu/Khuapate leh ZYA President Pa Gigin te zong kihel thei uh hi.

Siavuan lpipa in “A piakhia mimal kim tung leh a gel avaihawm mimal kim tungah lungdam mahmah hi. Kei theihna ciangah kum zalom sungah mipi hanciamna tawh mapang khawm a hih dan innpi lam pen Tedim Khuapi adingin a masapen zong ahihman in angtang huai mahmah hi” ci-in gen hi.

Khuambulte apna leh Lai Siangtho simna Rev. Suan Khen Mung leh Fr. John Deng Cin Khup in hong neihsak in, nasemte ading leh van leh nate apna Rev. Dr. Thuam Khan Thang in hong neihsak a, tawpna thupha piakna Rev. Thang Khawm Pau in hong neisak hi cih kiza hi.

ICU Building Committee Secretary ahi Rev. Vungh Suan Mung in “Building ading Kyats Tein 1000 val abei ding lakah Tein 700 val kingah khin ta a, ICU Building ihzawh ciang Kumpite tungah apna ki nei ding hi” ci-in gen a, President Pa Hang Khan Lian in ” inn dawl 2 hi dinga atungah lupna 4, akisap mahmah leh 8 akikoih theiding leh inn nuai pen VIP khan hi ding cih leh lupna tuni ciang pen 8 kingah khinta in 3 pen van leh na teng kimkhinta hi” ci-in Tedim Post tungah gen hi.

Tedim ICU Building pen May 12, 2020 ni in nasep akipan hi a, a manlang pen kha 2 sung ki zawh sawm hi cihzong kiza hi. Tedim Post

Etteh huai Saizang Khuabup

Tedim ICU Lam Na Ding Saizang Khuabup Mintawh Dangka 400000/-Tuni Piakna Nei… Tulainatna hang in ei zomi sung ah natna neite muntuamtuam ah kepnading kuaman hongdeih lohciang ICU inn neihzawh nading committee hong kipankhia aa,hivai ah panpih zawh nading saizang khuabup neihzahzah kikai khawm thiamthiam in ngahzahzah committee te tung ah tuni Hausapa tawh piakna nanei ung…. A vaihawm a geel a gim a tawl khempeuh Topan thupha tawh hongdimkik saktahen.