Pawlpi bangzah? Hausa bangzah?

Pawlpi bangzah? Hausa bangzah?

Zogam khuate ah a tamzaw inn 50 pan inn 200 kikal kipha a, inn 200val apha khuate khuano lak ah khua gol pawl hita hi. I khuate neu in lian taleh biakna pawlpi tuamtuam i om kim ciat pian hi. A tawmpen RCM, Tuiphum, AG leh EBC cihte om kim pian hi.

Khua khat ah pawlpi 3, 4 leh a tamzaw ki om ciat cihtheih hi. Ahi zong in, khua khempeuh aneu a, agol zong in Hausa bel khat sang a tamzaw kinei lo hi.

Khuasung vaihawmna khat peuhpeuh ah Hausa upa makaihna tawh taangtha kuan nasep a kipan khuazangbup vai kihawm hi. Pawlpi min tawh khuazangbup ading na kisem thei a, ahih hang khuazangbup vai ki tuam vaihawm thei dihdih lo hi. Tuabang mah in, Hausa upa makaihna tawh pawlpi vaihawmna kihuh thei bek a, pawlpi vai ki vaihawm theilo hi.

Pawlpi bulphuh a Hausau upa nasep kisem theilo ahih hang, hausa upa makaihna tawh khuasung vaihawmna ah pawlpite kihel lo cihbang om theilo a, Khuazangbup vai hausa upa makaihna tawh vaihawm nasepna a gualzawhna ding in pawlpite’ hahpanna thupi mahmah hi. Khuasung buppi vai ah pawlpite’n keitawh kisai kei cihbang om theilo hi.

Tuabang a i khuasung ah pawlpi tuamtuam a om bangmah in i minam sung ah party 3 le 4 i om hi. Minam bup nasepna ah party leh biakna pawlpite a dinmun kibang hi a, minambup huam a vaihawm nasepna atuam ahi hi. Pawlpi in khausung vai a septheih mahbang in, Minambup vai party tawh tampi kisem thei a, Pawlpi in khuasungbup vai a huamkim theihloh bangmah in party khatbek in minambup huaikim zolo hi.

Minambup vai ah Hausa upa dinmun ala ding nakpitak i ki tangsam den hi. Mipi in zong hausa upa i neihtheih ding ban ah, khuakhat sung a hausa upa vaihawmna leh pawlpite kizopna model i minam sung ah minambup, gambup huam a i neitheih ding i kisam hi. Pau Khat Suan