Jack Ma thugen khangnote ading

Jack Ma thugen khangnote ading

Billionaire Jack Ma in kum (15) sung ama nasepna tungtawnin amuh/tuah khak thu hopsotna hunpha khat Korea khangnote tawh May, 2015 sungin KBS te makaihna tawh nei khawm thei ngeingai uh hi. Tua hun sungin “ kum (20-60) kikal bang sem leng hoih ding a, bang ci om leng hoih ding hiam ” cih khangno khat dotna pen Jack Ma in anuai abangin na dawng hi.

Kum 20 na cin ma:
Lai hanciam in. Sang lai bek ahi lo mun khempeuh panin theihna na ngah zawh zahzah zong in! (Formal Education, non-formal eduction, and informal education)

Kum 30 na cin ma:
Company (ahkl) zum khat peuhpeuh ah nasep na kipat ding le company (ahkl) zum aneu theithei, nasepna phung aneu theithei-ah sem in. Company (ahkl) zum aliat luat leh amau sep ngei teng/ sepzia lui teng mah tawh kalsuan ding na hih manin nang ngaihsutna kizang kha ngei lo ding a, nang ngaihsutna peuhmah tawh sem kha ngei lo ding hi teh. Company neu khawng hi leh bel ngaihsutna tawh sepkhiatna hunpha ngah zawsop kha thei ding hi.

Haksatna pen bang ci bangin kantan zoding cih hamphatna na ngah ding hi. Na sepnop pen mah sem khading na hih manin nasep nuam na sa pah ding hi. Khasum sangin tuahkhak pilna (experience) bulphuh zaw in.

Sia hoih (mentor) zong in. kum 30 ka phakma-in bang zumah sem kha ding, bang company gol pipi-ah sem khading cih na ngaihsut sangin kua khutnuai-ah, kua sia hoih nuai-ah sem kha cih thupi zaw ding hi. Sia hoih tawh na kimuh leh sin khak/tuahkhak pilna (learning& experience) tampi ngah ding. Na pilna khang mahmah pah ding cihna hi. (Seek knowledge)

Kum 30-40:
Hih hun sungbel mikhut nuai-ah na sem laiding maw (ahkl) aituam nasepna/ sumbawlna tawh nasep kipan thakding cih ngaihsut hun hi ta hi. Kum 40 na cin khit leh bel aituam nasep kipatding hamsa ta ding hi. (Ownership, self)

Kum 40-50:
I hihtheihna, hihtheih zahzah, hihzawh bangbang ahi thei tantan guan/zon beh sawm ding. Nasep laihding ngaihsun nawn ken! Lawhcinna sangin lawhsapna lamah kimanawh zaw khading hi. (Uplift Capacity)

Kum 50-60:
Khangnote pantah in (Nurture, empower). Amau pen khanghamte sangin thuakzawh hatna nei zaw uh hi. Tang zang mahmah zaw uh hi. Haksatna phul ngam zaw uh hi. A lawhcin theih nadingun lam man lak ta peuh in. (Nurture generations)

Kum 60 na phak khit:
Nang ading bek sem ta in. Ni sa awi kawm in tawlnga hithiat lel in la, na sepzawh mahmah lai-in na hanciamna khempeuh meetbawl na-in tawlngak hun la in. (Relax)

Jack Ma tangthu tom:
Jack Ma pen September 10, 1964 ni-in Sen gam, Shanghai gamke khuano khatah suak hi. Kum 12 aphak in Radio a ngaihna tungtawn in mikang pau siam nuam mahmah hi. Tua ahih manin zingsang sim guahzu meikai in khuahun sia mahmah taleh zong mikang pau siam nuam lua ahih manin zingsang sim nai 5 sat ma ta-in Tourists (khualzin mi) te tunna Hotel mai-ah na tungkhin den hi.

Mikangte (khualzin mi) painopna khempeuh, adiakin a minthang munkhat ahi West Lake bualah sum bang mah la lo-in paipih kawikawi hi. A paipih thaman pen a paipihte’n mangpau hilh hi. A diakdiakin a paipihte pen European le American te tam phadeuh hi. Tua danin atha lawh khitteh sang paipan a, kum 9 sung tawntung mikang pau a sin ahi hi.

Sanglai lamah zong pil vengvang khol lo hi. Tansang (University) zom nuam ahih manin sanglut theih nading laivuanna kinei a, aphi leh Maths (ganaan) marks 120 lakah mark 1 bek ngah hi. Lamet om nawn lo ahih manin meileng tualah laibu puak kawikawi nasep pen apa’n zon sakin tua tengah sem hi. Nasep ding a dang zong, zong kawikawi mah ta leh kideih lo hi. Hotel ah sabuaithu nasep asiauh leh atun sang lo ahih manin kideih lo hi. Palik zumah nasep siau kik leuleu a, atha neusa lua ahih manun na nolh kik uh hi.

Tansang (University) sanglut theihna laivuan va phi leuleu a, ganaan mark 19 bek ngah leuleu hi. A zopnop Tansang zong zom thei tuan lo hi. Company (11) ah nasep asiauh hang nasep angahna munkhat bek zong om lo hi. Sengam ah amasapen akihong ahi KFC (American aksa kankeu) sai-ah mihing 24 in asiauh lakah amah sim loh mi 23 in nasep ngah hi. Ama’n a gen theih zel kammal khat in “mi gen bangbang um pah kei in la, khuak tawh ngaihsut khitteh um pan hi” cih ahi hi.

A thum veina taktak ciang bel tansang pilna (University) sang zom thei ta hi. Tan sang pil sinna a manciangin a kahna sang mahah mang lai sang sia sem hi. Nidang in Mang lai a-uk mahmah, mikangpau a siam nuam mahmah hi a, tua mikang pau a siamna hangin sangsia nasep a ngah ahi hi. Sangnaupang te’n zong laihilh siam sa uh a, sang naupang (mailam ciang naseppih ding) hau mahmah hi.

1994 kum pawlin (apian kum 29) Internet a kici amukhapa pen kum 15 sungin Internet vanzuak/lei nasepna ahi Alibaba Group tawh sum zon nasepna lian pi nei ahih manin tu-in billionaire pi dongah lawhcing toto mawk hi. US$ 60000 tawh akipat pen 2014 kum in US$ 230 billion nei hi. US$ 60000 zong ama neih hilo a, a mah a them khat, azi sum le lawmlegual te sum pawl khat tawh akipan ahi hi. Compiled by: Khup Sian Pau (Chief Editor, Siamsin Magazine Vol V) Note: A kicing zaw in nasim nopleh “Jack Ma” by “Kanyin Publications” ah nasim thei ding hi. Ref: Bamaw Theinphay, Jack Ma and Alibaba