US kumpi in Christmas hunsung Europe gamsung azinte kidopding vaikhak

US kumpi in agammi khualzin te Europe gamsung ah kidopding zaksakna nei

United States kumpi thunei te’n agammi te tungah Thursday ni in zaksakna nei a, Christmas leh New Year Holiday Season hunsung in Europe gamsung azinding te kidop huai mahmah hi, gitloh ngongtatna “Terrorist Threat” Warning khangsemsem hi ci’n zasak uhhi.

US kumpi thunei te’n agammi te akhualna in, European Cities sunga Extremist Attacks te kidopding azaksak zelzel uh ahihi. Abeisa hunsung inzong Festive Events hun ciangin buaina piangtheizel a, kidopkholh dingin zaksakna aneizel uh ahihi.

Nungkumsung December khasung inzong Germany, Berlin khuapi ah Christmas Market akicihna munah buaina pianggawp hi. Tuaban ah New Year’s Eve inzong Turkey, Istanbul khuapi aom Nightclub khatah buaina kizomto hi.

Germany, Berlin khuapi sung aom Christmas Market ah migilo te’n Truck mawtawpi khattawh nawkgawp ahih manin, mi 12 takin sihlawh uha, adangzong mi 48 bang liamgawp uhhi.

Tuakhitzawh asawtlo New Year’s Eve ciangin Turkey, Istanbul khuapi ah migilo te’n Nightclub khat simleuleu uh a, mi 39 takin sihlawh hi.

Nungdiak inzong Britain, Finland, France, Russia, Spain, Sweden cihte ah Al-Qaeda leh IS te gamtatna kiza zelzel ahih manin, hih migilo kipawlna tepen beisianglo in, gamtangtang lai uh cih kimuthei hi ci’n State Deparment te’n kidopding zasak uhhi.

Local Governments te’n gamsung ah Counterterrorism Operations pen aki zomsuakden hi a, mailam ah migilo te ngongtatna Terrorist Attacks aomkhakding ki patau mahmah hi ci’n Statement ah khahkhia uhhi.

More: Germany Christmas Market khat mawtawpi in phulphei, mi 12 si, 48 liam ~ ZD

Adiakdiak in US Citizens tepen ki nawngkaisak theizel ahih manin, migilo te’n bangmah theikhol saklo in hongsuam khakding uh kidop huaihi ci’n US kumpi thunei te’n agammi te kidopding in zaksakna nei uhhi. Sawltak #zomidaily