Kawlkai, aktui le kaphitang; Nang koi hizaw?
Khatvei lai inah mothak numei khat a inn ah a nu kiangah khitui luang sa in hong hawh hi. A nu kiangah “Nuntak haksatna, pasal le tate aading lung himawhna, nasep silbawl na ah lunggimna, tek le mo kikal kizopna, kimlepaam pan gensiatna cihte thuak zo nawn kei ingh. Ka gamtat luhek zia ding zong thei kei ing. Hi bang nuntakna zong cimtak ta ingh”
Khat ah hoihta hi, lemta hi ci’n lungkim ni cileng ahoihlo, alemlo buaina khat hong dawk zel, lunggimna ding hong om langlang zel. Ka cih na ding zong thei keng, hi bang nuntak zong baihsa keng” ci’n a dah akapna thu hong gen hi.
Nupi nu in paulo phunlo in a tanu anbuk lam ah hong paipih hi. Anbuk aa thuk tungah nupi nu in bel thum hong suangin tui hong sungsuk hi. Tawmvei khat hong hih ciangin, tui hong so ta ahih manin nupi nu in a masa bel ah kawlkai, a nihna ah aktui le a thumna ah kaphi tang hong khah suk hi.
Nupinu kam khat zong pau nai mahmah lo in a tanu tawh anbuk sungah hong tu nge’ungau uhi. Minute 20 ding bang hong bei ciangin, belte hong suankhia hi. Bel masa sungpan in kawlkai lakhia in kuang sung khat ah hong koih hi. Tua mah bangin aktui le kaphi tangte zong hong lakhia in kuang khat tuak ah a koih hi.
Tua khit ciangin a tanu lam hong kihei phei in
“Boih, bang mu na hia hong gen dih?” a tanu hong dong hi.
“Kawlkai, aktui le kaphi tang” ci’n a tanu in a dawngkik hi.
“Hiah hong neh phei inla, hih kawlkai na khut tawh lawng sin dih” ci’n a tanu hong sawl hi. Kawlkai ahih leh a nip lam a tanu in a thei hi.
Tuakhit ciangin nupi nu in a tanu kiangah “tua aktui e leh lawngsin aw leh” ci’n a sawl leuleu hi. “Khauh giuhgeuh veve hilo maw nu”
“A hawng sutam o leh” ci’n hongsawl leuleu hi.
Numei nu in a nu sawl bangin a hawng a khehkhiat aaleh aktui ciikte pen min ahih manin a khalh lam amu hi.
Tua khit ciangin nupi nu in” tua coffee tui tawm ciam sin aw leh” ci’n hongsawl leuleu hi.
Numei nu ahih leh nui hiuhiau kawmsa in a gimnam tui hiauhiau coffee tui a ciap kawmsa in “Nu, hite bang na cih nopna ahia?” ci’n anu hong dong hi.
Nupi nu in hi bangini a tanu dotnate hong dawngkik hi.
“Hih kawlkai, aktui, kaphi te in ahih leh akibangin tuiso sungah kikoih tek hi. A sakh, a khauh mahmah kawlkai pen tuiso sungah a tawmvei a om khit ciangin a nip, a nem khat in hong kikhel hi.
Aktui pen a kitap baih lam i theihsa ahi hi. A hawng paa dikdek khat in a tuicik te a dal ahi hi. Ahizongin tuiso sungah tawmvei a om khit ciangin a sungtawng zong a khauh lam ah hong kikhel hi.
Hih kaphi tangte ahih leh lamdang hi. Amaute tuiso sungah tawmvei a om sung bek na ngawn un tua tuiso khel zo uhi.”
“Boih aw, nang hiteng ah koi pen hizaw na hia? Haksatna, dahna khat na tuah ciangin nang koi ci puak, koi ci thukkik? Nang kawlkai maw, aktui maw, kaphi tang? Ngaihsun pha dih, nang koi pen hi zaw na hia?”
“Kawlkai bangin a khauh tawh akibat hangin, haksatna, buaina khat tuah ciangin a nip le a thakhauhna a khahsuah khat maw? Aktui bangin a tungin lungsim nem, lungsim diktat napi haksatna, buaina khat hangin a lungsim nem zolo, a thuak zolo khat maw?
Bangzah ta in nunnem, lungnem mah taleh sihna, dahna, supna cih haksatna khat peuh tuah khak ciangin a pua a hawngtuam kibang ma taleh a sungtawng ah a kikhel, a khauh, a kitambaih lungsim a nei khat maw? Ahih kei leh kaphi tang a bang khat maw? Kaphi tangin ama tungah siatna a tun hangin tua siatna tuiso pen hoihna tawh khelzo hi. Tui so semsem, a tuikhu namtui semsem sak hi.”
“A zenzen in nang pen kaphi tang bang na hih leh, na te hunte kikhel in haksa mah leh nangh na dinmun pen a hoih lam ah hei thei hi teh. Nai te pen zankhuamial bangin hong ziing in, haksat patauhna in second kisai bangin na lungtang hong saisai phial hileh na dinmun a sangna lamah na kappih zo diam? Na tuakkhakk haksakna pen koi ci lep sawm? Nang kawlkai maw, aktui maw, kaphi tang?
Khat veivei ciangin kimlepam kikhelna, hoihlohna hangin ei lungtang ikikhel sak kha thei hi. Kawlkai bangin kimlepaam hoihloh, lemlohna, haksat ze etna khat peuh hangin i lungsim thanem in lungkia in ki om kha thei hi. Aktui bangin kimlapaam kihelna, hoihlohna bangin ei mah mah zong ikikhel sawm pah hi.
A tungin a gamtat hoih, a diktat mikhat kimlepaam hoihlo khat hangin agamtat luhek hoihnate khahsuah in kimlepam khelna bangin kikhel thei hi. Ahizong kaphi tang bang ihih leh kimlepam bangzah ta in sia in a hoih kei mah zong, ei hangin tua kimlepaam, hunte a hoih lam ah a khel sak zo ding ihih ciat nading hanciam ni.
“You change the situation or the situation will change you” cih hi e.
Nk Khanno (zingsol)
Credit; original writer
Nang koi hizaw?
Comment piaknop aomleh...