Pasian’ Khut Sung Ah
Singkung lopa lam pilna a nei botanists pawlkhat khualzin-a a paina vuah Scotland gam va tung uh hi. Lampi pan a et suk uh ciang lamkhang sinliin dang nuai khat ah cikmah-a a muh ngei nai loh uh singkung nam khat mu zenzen uh a lungdam mahmah uh hi. Tua singkung pen a neu liitleet khat hi-in, tua bang lam pilna nei ahih mah bangun, a min zong a kiphuak nai lo, singkung lopa namte’ laka ciaptehna zong a om nai lo a nam thak khat ahihna a muh phet mahun thei pah uh hi.
Tua singkung neu peuhmah botkhia-in a min phuaka limtaka kep ding sim loh thu dang om lo hi. Ahi zongin tua singkung pona pen sinliin dang nuai khat hi ciitciat ahih manin pai hak tuak mahmah hi. Tua laitakin a khuadak uh leh, a paam mahmah vuah gancing pasalno khat mu uh hi. Tua pa sam uh a, “Na kawng ah khau hong khih nungin, hua singkung va bot inla, hong kai to kikin sum tampi hong pia ding hi ung, na ut hiam?”a cih uh ciangin tua pa zong ut mahmahin lawp mahmah hi. A kawng ah khauhual khih dinga a kithawi uh ciangin a lungsim kikhel vat mawk hiam ah, “Na khawl pak phot un” ci-in a khualam ah va tai kik vingveng hi. Tua mite in zong a cih nadinguh thei lo-in lamdangsa-a a om laitakun hong tung kik pah bilbel-a amah guak hi lo-in mi dang khat hong tonpih hi. Amah tawh a mel uh kisuun-a, ahih hangin haamsuah zaw hi.
“Tu’n ka kawng ah khau hong khin unla va tuak suk ta ning ei. Den-a bel, a nuai ah ka om laitak peuh hong kai to kik nawn kei mawk leu cin, ci-a ka lung a himawh hi. Tu’n bel hih pa in ka kawnga khau kikhih a mong hong len peuh leh tuak suk ngam ta ding hi’ng. No pen hong thei ngei lo ka hih cianga muanhuai maw muanhuai lo kigen thei lo; hih bel ka pa hi-in ka neu-a kipan ka theih hi, amah muang ing.” ci hi.
I nuntakna ah i khaumong a len kua ahi hiam? A muanhuai lua mahmah i Pa ahi Pasian ahi hi. Khatveivei i pa in sinlinn dang khawng ah hong tuahsak hun zong om-a, i paina lampi a nal mahmah hun zong om hi. Khatveivei mihingte’ tuahkhak hatsatna lianpipi zong hong nawksak hun om-a, khatveivei lah lam phei dide a tawn bangin a nop mahmah hun zong om hi. Bangbang hi taleh, i lampi haksa-in lauhuai phial mah taleh, i hun leh i nite Ama’ khut sung ah om hi, cih lungmuang takin i um thei hi. I nuntakna khaumong a len Amah hi!
Mual lak guam lak sinliin dang ah i pai zongin hong itna-in hong len den hi. I thahatna leh i thuakzawhna ciang thei a, i hat lohna leh i thuak zawh lohna ciang zong thei hi. Guam sung ah i tuah suk ma-in i kah toh kik lam ciangin bang singkung tawh lungdam taka kah to kik ding cih zong thei khol khin hi. Hong makaihna bangbang zui-in a kul leh guam sung ah tuak suk taleng, i khut sung ah Ama’ thuphate tawi kawmsa-in kah to kik teiiteii ding cih i thei hi. Hih thu in hong kiniamkhiatsak-a, Pasian hong muang theisak-in lungmuan ding leh lungduai ding hong hilh hi.
A nopsak mahmahna mualtung pana a niamna guam sunga tuak suk ngei khat om-a, tua pa pen “Pasian’ lungsim tuak pa” a kici David ahi hi. A dinna leitang mahmah a liing tawh kibang zah dongin lungmuanna a om lo dinmun a tun laitakin, “Ka hunte/nite Na khut sung ah om hi” na ci hi (Late 31:15).
Thu-ummite in a tuah ngeisa uh hi a, nang leh kei’ ading zong ahi hi. A kikhel ngei lo Pasian’ kamciamte muangin, a diakdiakin Ama’ Tapa it Zeisu Khazih tungtawna i ngah hotkhiatna lungdamna thu tungtawnin Ama’ khut sung ah ka nuntakna I ap nak leh hong khahsuah ngei nawn lo ding hi, cih i thei hi.
Ka singlamteh puak a gih luat teh hih thu in hong hehnem hi. Ka nuntakna ngiat kimanna nei lo-in khiatna nei kei mai leh a kilawm hun ciangin hih thu mah in tha hong pia hi. Ka mai-a ka tuah ding thu bang hiam cih thei lo a a bingphut tawh ka kibat laitakin tua thu mah in hong thahatsak hi. Koi mun koi mun ka tunga, bangbang haksatna ka tuak zongin ka hunte ama’ khut sungah om, cih ka theihna in hong lungmuangsak hi. Ama’ khut sungah ka om laiteng a muanhuai-in hong kem ding hi. A vanglian khut-in hong hum hi. A itna khut-in hong makaih-in lam hong lak ding hi.
Rev. Zam Khat Kham
Comment piaknop aomleh...