Nupa (couple) kikal sumtuam neihna

Nupa (couple) kikal sumtuam neihna – Bank Join Account khat neihkhopna leh zatkhopna

Nupa bank tuamtak, sumtuam neih ding peel ding hoih hi. Bank Account na zi/ pasal i et/zat theihloh ding account nam te peel in. Nupa suahna cih pen Nang a khempeuh ama a hi a, Ama a khempeuh nangma a ahi hi. Tuate lakah neihlehlam leh bank account zong akihel ahi hi.

Nupa kikal Sumkholna Ban (Join Account) neihna in “ih sum” “ei sum” hongci sak a; “keima sum, ka sum, ka sepsa cih thu hong lutna pen khemna hi a; ki pumkhatlohna leh kilemlohna ahang lian pen khat ahi hi. BANK ah nupa kop in JOINT ACCOUNT neihkhopna in nangma sepsa teng ama a zong hi a, ama sepsa teng nangma a zong ahih lam kilangsak in, kipsak hi.

Nupa sung ah, Kua in tam thalawh zaw, kua in sum lut tam zaw a’keh, kua in sumlut omlo, kua in sum thalawhlo cih khen theih hilo a; neih khempeuh neihkhop ahih mahbangin, haksatna aom leh thuakkhop mah
ahi hi.

Bank ah Joing Account bawlkhopna in “ih sum lut, ih sum bei” cih thu kilangsak a; akimu, akithei ahi a, aki theithamlo sum beina ahi zongin nupa pumkhat suahna hong lomkhawm thu guipi khat ahi hi. Na sumzatna pen na zi/ pasal in hong thuakpih a, zatsiamlohna/ zatkhialhna aom leh na nupa un athuak khawm nahi uh hi. Ban sum honkhopna sum zat nading leh, sum lutte kikupkhopna hong piangsak a, lungsim hong khuituah den hi.

Nupa geel in azat khop tak khat I vanlei ki theihpihlo cih bang omlo a; anih in zangkhawm, kitheihpih khawm in, zatsim, bei sim, ngahsim cihbang (simgantat) cih limlim om theilo hi. Khat I theihpih loh ding van lei ding zong omlo suak a; nupa kizopna sung ah aom peelmawh kizopna zong ahi pah hi.

Bank ah Joint Account bawlkhopna leh zatkhopna in khatlehkhat kimuanna (trust) phungvuh sak tektek a, minih ki thukimkhopna tawh lungsim khat in sukzek ding lamlahna piangsak hi. Khat leh khat kimuanna (confidence) piangsak hi.

Bank atuamtuak tuam zatna in bang thu hong gen hiam? Aituam sum leh ban zattuakna in nupa kikal khat leh khat kimuanna leh kipum-apna omzo nailo ahihna kilangsak hi. Neihsa, neihlehlam gawmkhop lohna, tuamkhenna leh aituam neihna in, kigamlatna lam manawh zaw hi.

Nupa hihna sungah pumpi sakhat, lungsim sakhat a suah theih nading in neihsa banah, neih lai ding sumlehpaai zong aki pumkhat, munkhat pan zatkhopna in nupa sung ki punkhatna a’keh, kinaizawkna hong pia ahi hi. Sumlehpaai neihsa ah kipumkhatna pen hanciam theih thu ahi hi.

Bank atuamtuak a neisa nungak leh tangval khat nupa suakin pumkhat hong suah uh ciang a bank account uh zong pumkhat asiak ahi hi.

More: Nasum: Thupha maw? Samsiatna hi sak ding? ~ Khup Khen Thang

A Thupi pen ah ih neih khempeuh, eima nuntakna ciat zong Pasian hong piak hi a, ama kiang mah pan ahih lam ih manghilh loh ding thupi hi. Hih pen US gam sung ah zong; a diakdiak Tapidaw innkuan sung kivaipuak zia ahi hi. Disciple Kap Sian