Pasian bawl thupha naak

Pasian bawl thupha naak

A thupi leh i theihtheih sa khat tuni ngaihsun kik ni. Pasian in Adam bawl aa thupha pia pah lo hi. A zi dingin numei pia aa tua ciangin Pasian in thupha pia hi. Nupa a om limlim ciangin Pasian pen thupha a pia dingin a baihsa in om pah lian hi.

Tua hiaa nupa ki lem in a ki it te tungah thupha namkhat a hih kei leh namkhat om den hi. A masa pen in a tate in thumang hi. A tate uk zo hi. A tate in zahtak hi. A ki lem lo, thuzong a ki dong khol lo nupate sangin neih leh lam zong nei thei zaw hi.

A nuntakna sungah Pasian a phawk kei uh zong in thupha ngah uh hi. Banghanghiam cih leh nupa (inn kuan) a bawl Pasian hi aa tua inn kuan te ki lungtuak leh Pasian a lungdam mahmah hi. Thupha pia hi.

Khat guak a om laitak Adam pen Pasian in thupha pia lo in thukham pia hi. Nupa hong suah ciangin nuntak na nei khempeuh tungah uk theihna thupha pia ta hi.

Inn kuan sungah nopna, daihna, ki it ki lemna, hauhna, pilna, ma tutna, ngualzawhna, maitaina a om theih nadingin nu leh pa te kisam mahmah hi. Pasian in en cik sa mahmah hi. A gamla pi ah thupha i zon sangin Pasian in ih inn sungah thupha hong puak leh nuamzaw ding hi.

Nu (mother) khat leh Pa (father) khat ii pan munpen neu ngaihsut ding hi lo hi. Zong ki it in, ki lem in, Pasian zahtak nupa khat om leh Pasian bangzah in a lungkim in thupha a pia zen tam?

Tangval, nugak lai tak pen thukham tawh a nungta a hihi. Thukham palsat leng mawhsakna om pah hi. Zi leh Pasal na neih khit ciangin inn kuansung leh ta te a’ ding in thupha naak na hihi. Na thupha naak puahsiam in. Thupi ngaihsut in. Zangh siam in. Thupha naak na suahnop leh zi leh pasal nei in. Tuahileh mundang ah thupha zon kullo aa Pasian in a naakpan in thupha namcin hong luangsak ding hi. Lungdam! Siamsin Library