Abraham (Pastor) leh Mary (Pawlpi mi) holimna

Abraham (Pastor) leh Mary (Pawlpi mi) holimna

Mary (Innteeknu):  Aw sia nang hong vak ngam ta maw?

Abraham: Kei a ki sam mahmah te ah vak mah veng ee! Meltheih vai, biakna vai meeting tuamtuam te ah vak mah ingh.  A hi zong pelh theih mihon omna leh pawlpi mite inn-ah innvak (Home Visitation) bel peel cina luna lo buang vak lo ee, no zong ngap pha lo ci a hong za a hong vak hing.

Mary: Min’ a gen ciang ih siate innkuan lau phadiak uh vak ngam vet lo, a inn uh ah zong kuamah hong hawh kei un ci-in lai suang aci aa?

Abraham:  Kei lau lo in, aki dawm ee alau huai zia mipi theih ding ih genciang alau hong ki sa ahi zaw in um ingh.

Mary: Khut kong len thei dia leh sia?

Abraham: Khut bel ki len thei ee, sil kik pahpah ding cih dan hi lo hia?

Mary: Pawlpi pawlkhat bangin ih UPNA hi bang hun haksa ciang a zat ding hi ci-in, biakinn ah ki khawm veve hi lo maw? Ei pawlpi bel khak baih lua ki sa ing?

Abraham: Lai Siangtho sungah hong uk kumpi te thu na mang un a cih- ban ah, Biakpiak na sangin thuman na (Obedience ) ka deih zaw ci hi lo maw.  Upna zat ding hun hi ci-in, pawlpi te aki khop pih veve Pastor pawlkhat leh upa pawlkhat zong ki man hi lo maw!

Mary: Mi pawlkhat in- Antan thungetna zong zang veve ci hi lo maw? Ei bel Thu nangawn ngen ngam lo a bang ci ih hi tam?

Abraham: Thu bel ngen mah hang ee.  No innkuan in biakinn ih zawt lo zawh nangen lo maw? kumpi te in kham uh pen mi 10 tungsiah ahih man in, thunget kikhopna ah mi 20 val bang pha zel ih hih man in tua zong aki khak hi mah ee, Amah abia te in lungsim leh thumaan thutak tawh abia ding uh hi (Jhon. 4:24). Inn pan nasia tak in leitung bup ading thu ki ngen thei hi lo maw!

Mary: Ken maw sia, hih puulnatna pen huihlak tawn in pai hi lel ahih ciang, ei ki dop thei bang om mawk dinghiam Pasian thu hi ka ci aa?

Abraham: Khatna ah Pasian thu bel hi mah ee. Late 91:7 na bangah, “Na pangah mitul 1,nataklam khutah mi tul 10, hong tuk kha ding hi; ahih hangin tua in nang kiang nai hong neh lo ding hi”(1967 Tedim Kam) ah na ci hi.  Anihna ah ei ki dop ding zong na om hi.  Tu tung COVID-19 pen huih lak tawn lo ci uh hi.  Ki lawn khakna pan ki lawh hanhan thei ci uh hi.

Mary: Mi pawlkhat in tun’ aki umsak, a awngawng Pastor teng Pasian nasem teng dai ei, bu cip ei, lau mahmah uh ei aki ci nuam phial hi ven na hi het lo dan ai ve maw!

Abraham:  UPNA zat nading pen Biakna hangin  buaina om in, biakinn zuan peuhpeuh hong ki that ding cih, vauna, to-na (Challenge) bang hong om hi zenzen leh zat ding ahi hi.

Mary: Biakpiakna bel ki nei lo hi photphot ai ve maw?

Abraham: Biakpiakna zong maw ei Innkuan in ih inn ciat pan ki lui thei lua hi.

Mary: Mi sia te-pawlkhat in Nekhawm zong pawlpi mite innkim ah va pia hilo maw?

Abaraham: Lai Siangtho sungah Kei nong phawk nadingun na hih zelzel ta un cih hi a, nisim, kalsim, khasim, zong ci tuanlo ahih man in hih hun hoihloh sung Nekhawm ih ngawl hang Hell ki tun lawh lo ding hi.

Mary: Sia lungdam peuh mah ei mai nipi pan ko zong Innkuan in Biakpiakna na lui pah nung ei.

Abraham:  Lungdam mah ei le, thungen khawm ni maw! Topan’thupha hong pia ta hen! Amen. (Go Pau)