Pasal taktak pasal pil ~ Thang Siangh

Pasal taktak pasal pil ~ Thang Siangh

USA pen leitungah taanglai Rome kumpi mah bang hi-a, aneihloh khatbeek om lo hi. Leitung mihingte kidemna ahi pilna-lam kidemna, thahaatna-lam kidemna hauhna-lam kidemna tuamtuam zong akhelnono, a lamdangnono nei uh hi. California, Las Vegas acihna khua-ah nakhempeuh phial kim hi. Leitung mihing etding lahtheih khempeuh lak uh hi.

Kimawlna Tualpi lianmahmah khat om hi. Building lianpi sungah adei tuamtuam ah a muhnop namkim lahna om kawikawi hi.Kimawlna namkim a khawk a khawkin kinei hi. Pawi-en dingin mi tultul tampite pai uh hi. Pasal thahaat kidemna zong nei uh hi. Boxing kitupna pong 240 ciang agik pasal baan gaap kihual valval kitupna zong om hi. Khatpan a lawmpa tumpai hi. A khutlamto-in ‘ ken zo ing’ cidanin mipilam nga veva hi. Pahtawina a kawngah kiteengsak hi.

Tua khit ciangin pong-600 kiim pasal pi-6 pi-7 kim vive Apes-zawngkuh lampai bangin kaak laanglaangin hong pusuak leuleu hi. Tuate trailer-motor golmahmah kaisak uh hi. Pipa bungpite pi-12 a saang khau khungin tua tungah tamlawnzo kidem uh hi. Suangtum beemkim diameter pi-2.5′ pha ding sagih domin tausang tungah ngasak hi. Tua khempeuh a banbanin hihzo lel uh hi.

Singtan-singphuk haat leh asiam kidem uh hi. Hi bang kidemnate pen vaalkhong lo hi. Nuntak kivaakna nasepna ding phattuamna tampi piangsak hi. Cidamna leh thatang haatna khangsak seemsem hi.

Tua khit ciangin vandak zezua aa a tunglam bekbek a en mipite kamu uh hi. Tua te in inndawl varanda mai-a numeite en ahi uh hi. A pumtangin seel kikeuhlo-in om uh hi. Ahoihna teng kimu ahihmanin tua munuamin mihing miksihon bangin kiphul naunau hi. Mihing paktatte leh a kicianlote in tua bangmunah sumneih zahzah zang thei uh hi.

Tua khit ciangin Platform munkhatah Pasal Zangsau kidemna ci-in a ente pen numei kum-40 nuaisiah ding tampen hi. Pasal thahoih mahmah 8 hong pusuak hi. Kigual dimdiamin amau ngeina bangin hong laam uh hi. A lukhu aa kipan a tungaa puansilh khempeuh a banbanin a laamkawmin khatkhit khat suahkhia-in paikhiakhia uh hi. A pumgak sungnung leh sungten bek tawh hong omciangin pawi-en numeihonte lawplua kisa-in khutbeengin awngin kihot daapdaap uh hi. Tua munah pasal pawi-en tamlua lo hi.

A pumgak leh a sungten hong suahkhia petmah hi. Gol lah gol si, sau lah sau si, a pheipaang saatin kipeidaudau hi. Tua laitakin numei pawlkhat gonggawin kizawngkhia uh hi. Laamtawpin tawlkhat a pumtangin ding uh hi. Tua laitakin numeite in sum lot ziahziah uh hi. A tawpna-ah numeikhat dingin platform tungah kahto-a, a deihpen pen a kawngah kawi-in screen nunglamah ciahpih hi. Pasal taktak kidemna ahi hi.

Tua kidemna sungah a neupen letmat-8″ sau hi. A saupen letmat-10″ sau hi. Hih mite sungah ei Asia mite kihelzo ngeilo kha ding hi. Ahih hangin tua mipa pen leitungah a min kiza lo hi. Nobel Prize piak dingin ki nominate ngeilo hi. Leitung pasal minthang taktakte kua bangte hiding uh hiam?

Leitung minthanna tuamtuam tampi om hi. Gaalhang aa minthang om hi. Thatanghaat aa minthang om hi. Science lamtawh kisai mipil minthang om hi. Political siam ahi gam leh minam aading-a kikham-ngam Patriatic om hi. Pumpitung siamna tuamtuam tawh kisai cidamna lamah minthang om hi. Eite in bang minthanna ih teel ding hiam? Pasal-taktak bangci suah thei ding ihi

Pasian piak pasal-power

Pasian in mihing a bawlciangin Pasal bawlmasa hi. Amalim suunin bawl hi. Pasal-neih van khempeuh Pasian in nei hiam, cih thudotna pen thuthuk lua ahih ciangin ih kikum kei ding hi. Numei pen pasal nakguh panin bawl hi. Avante pasal tawh kibanglo hi. Pasal bangin Pasian-lim sunkhinlo hileh kilawm hi. Pasian in pasal saangin a niamzaw-ah koih hi. Pasal zahin power pialo hi.

Pasal pen a bawlsa nakhempeuh uk dingin sawl hi. Biakna Siampiza pia hi. Sisan tawh Mawhsuutna naseemsak hi. Numei lutang ci-in minguan hi. Israelte misimna khempeuhah pasal bek kisim hi. Numei leh naupang kinusia tawntung hi. Nungzuite hunin zong mipi kaihkhopna munah miphazah a gen ciangin pasal bekta kigen den hi. Topa in pasalte hong piak power pen saangmahmah hi. Tua power kizatsiam leh Pasal-taktak kisuakzo bek ahi hi.

“Ta pasal haute pen thal-um dimin thaltang pua mipa tawh kibang-a, a galte kongvangah dakngam ding uh hi.” ci-in pasal thupizia laisiangtho gelh kamsangte dongin gen uh hi.

Zomite i Pu i Pate zong pasal thupiseh minam ihi hi. ” Ka Nu tapa hi-ing,” kici ngei lo hi. ” Ka Pa tapa hi ing,” ci-in haksa thukhat peuh a omciangin pasal hihna tawh tha kila hi. Nuntakna nei khempeuh ” Apa” kithupiseh zaw hamtang hi.

Zomite pahtak pasalte

Taanglai-in samantheite, thautawi theite pasal taktakin kimu hi. Gaal-ai, tong, Sialkopgo zote pasal taktak in kimu hi. Siikkaang dolcial lamte pasal taktak in kimu hi. Phungsung bangkuasung vaanzo vaihawmzote pasal taktak kici hi.

Ei Zomite Ngeina tawh a khangkhia pasal taktakte in, amapianna Beh leh Phung thupisak hi. Sanggam huaisiam uh hi. Thu leh la tuamtuam a om ciangin, ama silehsa tawh kinaina zui-in dinmun la a, sanggamte aading kidalna lum bang ahi hi. Kulhpi bang ahi hi.

Numei tungah thuneihna

Zomite lakah Zilelte kineumuh mahmah hi. Mawnlel ci sese uh hi. Ama Pianna Nu leh Pa hih gawgaw a, a Sunghte neel hianghiang aa hopih om hi. A pianpih sanggamte ngotliapliap aa ho a, a zi ciangin sia leh pha khenlo dongin tuisiksaat abang pawlkhat om hi. Nu leh Pa thusimlo a, zite ekteh dek a kihta om hi.

Tua bang mite pen Mawnlel taktak ahi hi.Zibeel pasalte zong kineumuh mahmah aa ” Mawnbeel ” mah natangsak uh hi. Zomite in numei suan leh khak zui-in khangsimlo uh ahihciangin Mawnlelte pen hunkhat ciangin sanggamsel bangin hawmkai thei hi. Numei pen a kilawmzah sangaa pibawl pen in pasalte vaangkiamna ahi hi.

Numei cih bangbang cihmailel lawmlawm pen Mawn-lel sitmahmah ding hi.

APUALAM TAWH KIZOPNA-AH

Thumaanna

“Honesty is the Best Policy” Hih mikaang paunak pen mangngeilo ding hi. Khat sangaa tamzaw mihing omna khempeuh ah thumanna, cihtakna, kisam hi. Ciampello mihing pen pasalmuanhuai hihna namkhat ahi hi.

• Nupa kikaal paubaanglo ding hi. Pasal picing pasal taktakte pianzia ahihi.
• Guallel a lungkiatlaitak leh daupahun aa lungsim kilamdang tuanlomite pen pasalpil pasal lungtangpha ahi hi.
• Bangbang biakna ahizongin a pomlaitak biakna tungah thumanin citak pasal lungtang pha ahi hi.
• Gam leh minam puapaih ngeilote pasal taktak ahi hi.

Thumanna pen thatang haatna leh leitung minthanna khempeuh sangin manpha zaw hi.

Ka sangnaupang lai-in Sangsia-4 kanei uh hi. Amaulet subject tawh kisai-in ahun kilaih uh hi. Sia pawlkhatte pen amau uthunin hong pai dildial uh hi. Ahun maanin tung ngeilo hi.

Sia khat pen, amahun atunlian leh kongkhak sunglam akhe tawh hong sikto lian hi. Amah pen samphiahsa-in hong pai ngeilo hi. A puan kilhkhial ngeilo hi. A puanngawng bawllohin om ngeilo hi.

A inn a lote siangtho hi. Huansungah mehteh-mehgah ahunhunin kingah hi. A tuikuang niin ngeilo hi. Thumanna hangin mikhempeuh in zahtak hi. Degree sangpen sangin ama thumaanna in tawisang zaw hi.

Zii itna bangci zat ding

Tuteng “Zii nei leeng cih thulu hong laang mahmah hi. Numei a tamzaw pen a puakkhamlo bomtang ahi hi. Tua bomtang zangno a cingdingpen a pasal ahi hi. Zii it ding ngaihding cihpen gen phapha zong kisam kasa kei hi. Tua itna bangci zat ding, cih thupi zaw kasa hi.

Itna zangkhial kitam zaw a, bangkuasung, phungsung kitamkham tamzaw hi. Sanggam uu leh nau Nu leh Pa nunghei lo tam hi. Cihmawhhun ciang bekin sanggam omlam, nu leh pa omlam kiphawk thei hi. Cihmawh ciangin numeilam bek kicinglo hi. Sanggam dintuakna munah numeilamte hong kiguang ngam tuanlo hi. Ei tungaa tavuanlian neite mah ih khing ih sa a nepente hizaw leh nakhempeuh hoihpai pah deudeu hi.

Tuuhon lak aa ngianupa bangin pianpih sanggamte suanghik lawn bangin kikhenkek thei hi. Tate theihloh kalin nu leh pa te lukham tekh-dikdekin kap uh hi. Zuntui ektui siak a khitui-naptui tawh akhoi a keem nulehpa don lo-in, khatvei-beek a zun a ek a siaksaklo a sungte a khum a al amau neek taangin a piak ngam mawk u ciangin bangzah dipngek na ding hiam?

A teek kuan ciangin, amaugual khempeuh nupi pasal suakin amau masuanciat nawtin kikhenkek uh hi. A teekkuan ciangin nu leh tateng kop a, pianna pa kinawl khin hi. A Pa uh pen mival suaksak hi. A tate un zi hong nei a, amau mah bangin nu leh pa sanggam donlo-in a sungte bekmah tawh hong lungkim uh hi. Tua pen kua pattah hiam? Pasal in zi leh ta lammaan tawh pantah lo ahi hi. Thallam cilsiat eimau tung hong tuzel ding hi. Amau tat bangmah in, a nu a pate tung aa a bawl bangmah in amahun hong tungzel ding ahi hi.

Itna thakiam saklo a, Zi-gilo kam hubitzote pen pasalpil pasal picing ahi hi. Nu leh Pa, pianpih sanggamte itna kiamlo a, zi-iit na khotak neite pen pasal picing ahi hi. Zii leh innkuansung kigualnuamsak pasalte pen pasal picing pasal pil ahi hi. Sia leh pha khenlo lo a ” zite cih bang bang ” mangmawkte pen thal-um sungah thaltang omlo, galsim dinga kuankhia pasalhai tawh kibang hi.

Kamkaih khau khahsuah ken

Numei gilo khat uksangin gambup uknop thei zaw hi. Numei khat leh khat kibanglo hi. Nuntakna masuan lungpatau theilo, utut a omnuam om hi. Zuaugen haat om ding hi. Amah leh amah kiphatphat bangmahlo om ding hi. Guta om ding hi. Pasal omlo-in bangmah phuzolo kimanna siamna khatbeek neilo kiphasak pasal sai lala om ding hi. Migensia aa nitum om ding hi. Uisan a thadah a, puansilh nikten hoihbek tawh lungkim om ding hi. Pasal laingam om ding hi. Anhuan theilo kuangsawp theilo om ding hi. Pasal khatguak tawh lungkimlo zualzang om ding hi. Sum khol theilo a maneek tawntung om ding hi. A pasal bek ngai, a teek a khang huatsah om ding hi.

Hibang siahuai khempeuh lencipzo a, tuate munah itna a guangzo, numei migi a suaksakzo pasalte pen leitungah pasal thahaat pen leh pasalpil pasal cingtak pen ahi hi.

Pasalte in numei ngaihsutna khempeuh theihpih ding hi. Itna bulphuhin encik ding hi. Pukna lampi khempeuh khaktan ding hi. Masuan kalsuan zia ding ngimna khempeuh nupakopin kitheisak ding uh hi. Thusim omlo ding hi. Pasal sangaa thukhual zaw mailamthu ahoih khungthei zaw numei zong om hi. Numei ngaihsutna hoih khempeuh lei-ah kiasak mawk lo ding hi. Innkuan lamto ding ngaihsutna khempeuh kikumkhawm ding hi. Kikhenkhapna a piangsak ngaihsutna khempeuh nilkhia ding hi. Itna bulphuhin nakhempeuh sem ding hi.

Zii pen saatding leh velh ding hilo hi. Zuun ding leh puahding ahi hi. Pianpi haina leh zawngkhalnate simmawh zawh thawh ding hilo hi. Dom ding leh panpih ding ahi hi. Sangnaupang pillo a saatsaat siate a haimah ahi hi. Ziite pen sangnaupang bangmahin pantahin hilh ding hi. Khuttum leh ciang zang ngei kei in. Ahoih gamta ding thuhilh pelh ngei kei in. Na it mahmah khaipote nakhoi mah bangin khoi in. A tungaa om natna lungnote paihkhiat ding lau kei in. Numei uksiamte mipil mithahaat ahi hi. Mawnlelin dai ngeilo ding hi. Thang Siangh