Nute’ hong itna tawh kizom, kammal kilawm pawlkhat

Nute’ hong itna tawh kizom, kammal kilawm pawlkhat

Nute’ itna pen damna zatui hoihpen tawh kibang hi. Tua itna zatui pen thusim loh ding leh thaangzat dingin pammaih hi. Bang hang hiam cih leh tua itna zatui pen sum tawh lei zawh ding hi lo hi.

Nute’ hong itna a kilawm ciang khat, tate in i theih hangin, nute sungah i tel khit zawh loh itna laigil tampitak om lai hi.

I nute in i kisap hong theihpih den uh a, tua i kisap van khatpeuh i neih zawh nading hong hanciampih den uh hi.

Nute’ tung panin itna cingtaak i ngah mah bangin, tate’ tung panin zong itna cingtaak lahkik theih ding thupi/kisam hi.

Nute in hong thuhilhna pen i hoih nading hi den a, tate in nute thu i hilhkik pen bel ei leh ei i siat nading a vaihawm i hi lel hi.

Nute’ tung pana i ngah itna zah itna pen leitungah mu nawn lo ding ihih manin, nute’ itna thupi saanin zahtak ding kilawm hi.

Nute in hong khasiatsak leh i hoih nading deihna tawh hizaw a, tate in nute i khasiatsak leh bel i siat nading leh i daupailoh nading hi gige hi, cih tel ding hi pah hi.

A nu hai sa-in, a daipih ngam lo ta pawlkhat om thei hi. Tua bang na hih khak leh nang hangin na Nu in maizumna bangzah thuak ngei ding cih lungngai kik in.

Na nu adingin bangzah vei gimnatawlna thuak ta hiam? Na nu in hong paai ciil a kipan tuni ciang dong nang hangin bangzah gimna leh tawlna a thuak zen tam cih lungngai zel ve.

Nute’ tungah thupha bawlin, nute tung panin thupha tampi lamet ding kisam a, “Nute thupha” i taan lawh nading ngah lampi bawl khak ding hi lo hi.

Na nu hong itna zah itna hong pia zo ding leitungah om lo hi. Na nu lungkim/lungdam sak in.

Nute pen tate ading ahih nak leh na khempeuh ahihsak thei dingin, a kigingsa in om den uh hi. Tate’n e leh nute’ ading bangci kigin i hia?

Nute’n amau nek taang tate pia ngam mahmah uh a, ama nek taang nute a pia ngam “Ta” bel tawm mahmah ding hi.

Nute in a duh lo zong hi peuhmah loin, amau nek ding taang a lim thei teng hong pia uh a, tate in bel ei duh loh teng leh i kham val teng peuh nute i pia zaw sop thei hi. Tua pen nute’n hong it lua uh ahih manin phamawh nasa hetlo lai mawk uh hi.

Na zi hangin na nu mudah in simmawh kha kei in. Na zi-in, hong it mahmah ing a cih hangin na nu hong itna zah itna nang tungah hong nei zo tuan lo ding hi.

Nute’ hong itna gen zawh, gelh zawh ding hi kei mah ta leh, gengenin gelhgelh ding pen lunghiang thanem kei ni. Hi bang hihna pen nute’ tungah itna lahna leh pahtawina zong hi gige hi.

Na nu adam lai-in lungkim/lungdam sak in. Na kisik ngei kei ding hi.

Na nu’ lungkim/lungdamna tungah na cidam nading, na khansau nading leh na nopsak nading cihte tampitak kinga hi.davidtuang

Nute’ hong itna mah lian bel leh thuk bel sa’ng e.

Nute’ khempeuh tungah cidamna leh khansauna om hen la, tate khempeuh nute a it kim zo dingi Topa’n thupha hong pia ta hen. Amen! Khazih sungah, David Tuang