Nusia Tani ~ Lian Tuang

Nusia Tani ~ Lian Tuang

“Khapi aw hong kia, hong kia” ci in Zomite in la i sak laitakin gam khangtote in Khapi tungah giahphual na satta uhi. Ahizongin Pasian hehpihna tawh khantohna tuihualpen Zomite sungah zong hong tungta hi. Zomite kikhangto mahmah a, leitung mipil misiamte tawh liangko kikimin na kisem theita hi.

Ahizongin gam khangtote din’mun le ei din’mun i etkak ciangin kikhai lua mahmah lai hi. Ei din’ mun tualniam lua mahmah ahimanin hong neumuh uhi. Zawng, Hai hong sa mahmah uhi. Gamkhangto te in “Banghangin hih zahin zawng nahi uh hiam” ci in dotna hong nei liang uhi.

Pilna siamna pawlkhatte ah amau tawh i kikim hangin amau i bat zawhlohna mun tam zaw tham hi. Hihzah a din’mun kilamdan theihna thu tampi om ding hi. Leitungah ki-ukna hunpi khen 5 in kikhen thei hi. 1). Van neihtanghun. 2). Sila neih hun. 3). Leitang neih hun. 4). Sumhaute thuneih hun. 5). Tangpi tangta hun leh Socialist hun ci in khen 5 khen 6 in kikhen thei hi.

Hun khatna sangin hun nihna ah kikhangto zaw a, hun nihna sangin hun thumna ah nuntakzia khangto zaw hi. Ahizongin ei Zomite in hih kikhel tohnate a banbanin kisin kha lo hi. Van neihtang hun panin tangpi tangta hun le Socialist hun ah tungto vat i himanin amaute zahin kipicing zo lo hi. Amaute in ahihleh khantohnate abanbanin nasik to ciatciat uhi.

Zomite i khantohna manlanglua ahimanin kipicing taktak zolo hi. Picing nailo ihimanin pil kisiamlo in hau isiam zo nailo hi. Zomi laithei mipil le sumlehpaai hau pawlkhatte in apilna a hauna uh kisak theihpih pah uhi. nuntak lui te mangngil uhi. Nulepa tungah sepding bawlding akilawm bangin semlo uhi. Ngeina hoihte thudonlo in simmawh neumuh uh a, zune sane in nuamsa uhi. Pheng gamtat gawp ahimanin apilna a hauna uh khangkhat zong a khom zolo mi tampi ki-om hi.

Kawlte, Vaite sungah pilna hauna khangkizomto tam mahmah hi. Amaute pen pildan hauhdan siam uhi. Apilna a hauhna in khansau sak hi. Ei Zomite i pilna i hauna zatsiamlo i himanin kikhansih zawsop hi. Mi pawlkhatin sum hau peuh leng sanggam kulkei, sum in i sanggam hi ci liang uhi. Ateek a guai a zawngkhal ni ciangin akem akhoi dingte kua hiam cih nangawn ngaihsun mello uhi.

Hihbang thu teng hangin kammal thak khat hong piang a ” Zomite in hauna pua zo lo in zawnna puazo zaw hi.” cih a hi hi. Hih kammal pen ei leh ei i kipiak hilo a, midangte hong piak ahi hi. Mai lam ah Zomite kammal sungpanin hih kammal a bei theihna dingin Zomi khempeuh in tavuan i nei hi. Lian Tuang