Papi khatin azi midangtawh muangmawh ahih manin thatlumkha

Papi khatin azi midangtawh muangmawh ahih manin thatlumkha

Malaysia, Taiping khuasung ah pasal khatin azi midangtawh muangmawh ahih manin thatlumkha cih theStar pan kiza hi. Tua athahlupkhak azi pen kum 38 aphakhin khat hi a, pasal dangtawh muangmawh in abet, asat leh asihsuah ahihi.

Hihvai tawh kisai in palik thunei ahi Taiping OCPD Asst Comm Mohamad Taib in agenna ah Taiping, Matang vengsung ah Friday ni 9:15am hunpawl in thupiang cihi.

Azi pen apasal in asat khitciangin khuaphawklo ahih manin, Ambulance tawh Taiping Hospital ah amanlang in kipuak hi ci’n palik thuneipa’n genkhia hi.

Apasal pen pilna laitan neilo in, muhbangbang asemmi “labourer” khat ahihi. Azi pen pasaldang tawh muangmawh in asat, abet leh khua phawklo ahih manin, amahzong lunghimawh a, Kuala Sepetang Police Station ah vapai in palik te kiangah athupiang teng vagenkhia bilbel hi.

Azi pen alu nakliamlua ahih manin, akhuak sungah sisan lut hiding in ki ummawh a, Raja Permaisuri Bainun Hospital ah kipuaksawn hi. Ahi zongin Saturday nitaklam 9pm hunpawl in sisuak hi.

Palik thunei te genna ah asihkhit ciangin azi ii luanghawm pen Postmortem kibawl a, asihna ahangpen alu ah aliamma huaisialua in asi ci uhhi.

More: Hong Kong atanu thatlum in asemnen nupinu in zatui zang hiding kici

Tua asi nupinu ii apasal zong Police Station ah kikemsuak a, midangkhat liamsakna “Section 325 of the Penal Code” thukhun tawh kituak in thu kibawlding cihi. Tuaban ah mithat ci’n “Section 302 of the Penal Code” tawhzong thu kibawlding cih kiza hi. Sawltak #zomidaily