Malaysia, Puchong ah zatuizang papi khatin kum 5 aphapan atapa temtawh satlum

Malaysia, Puchong ah zatuizang papi khatin kum 5 aphapan atapa temtawh satlum

Malaysia, Puchong vengsung aom guihtheih khamtheih azangzel pasal khatin atapa kum 5 aphapan khatpen temta tawh satlum cih NST pan kiza hi. Puchong Permai aom amau teenna Flat innsung ah zanni Monday sunlam in asatlup ahihi.

Tua papipa pen kum 35 aphakhin khat hi a, atapa pen lengnakhan “living room” ah aluplaitak, a ihmut laitak in temta tawh asatgawp ahihi. Naupangno ii alu pen 3 veitak satsak in, tuaban ah akhutngawng taklam “right wrist” zong temtawh satsak kici hi.

Tua papipa pen guihtheih khamtheih azangzel khat ahih manin, alungsim pen mantaklo, alungzinggawp hiding kici hi. Atapa asatliam, asatlup khitciangin atapa pen innpualam ah atapa ii aluanghawm pen koihkhia hi. Tuakhit ciangin amahleh amah innsungah lutkik in, kongkhak kikalhcip bikbek hi.

Atapa ii aluanghawm sitawh akidim zihziah in amukha khatin nitaklam 5:45pm hunpawl in Police te zasak hi. Aluanghawm pen inndawl 4th Floor ii apualam ah akoihkhia ahihi.

Athu akikanna ah tua buaina apianhun laitak in innsung ah apa leh atapa bek aom kici hi. Hih buaina ah akizang temta zong kiman in, kikem hi ci’n Subang Jaya district police chief Assistant Commissioner Mohammad Azlin Sadari in Statement ah genkhia hi.

Naupangno ii aluanghawm pen Serdang Hospital ah kipuaksak a, tualai ah Postmortem kibawlding hi. Apa pen zatui azangdenkhat hi a, Methamphetamine azatlam asi akisit ciangin kimukhia hi. Tuaban ah guihtheih khamtheih tawh kizom in Criminal Record aneikhatzong ahihi.

Tua atapa athatlumpa pen a innsungmah panin kimanpah a, ama genna ah awging khatin hihbangin satgawp in ci’n hongsawl ahih manin, katapa asat kahihi ci’n genkhia cimawk hi. Tuapa pen Petaling Jaya Court ah tuni in thusitna kineiding cih kiza hi.

More: Naupangno khat inndawl 20 pan kiasuk, anuaidawl ii sikzawn pomkha bilbel in nailang khitciang ki honkhia

Hih buaina apianna Puchong Permai vengsung ah aomkha avengte khatin agenna ah hihte nupa pen akitotlam zong katheihngei kholloh hiven. Atapa uhzong aki bawlsiatna cihbang omlo ci a, tuaban ah tua naupangno pen anuihpen amaitai mahmahden khat hi ci’n genkhia hi. Guihtheih khamtheih khatpeuhpeuh azang limlimte pen hunkhatciang alungsim, akhuat uh siacipthei in lauhuai mahmahmawk uhhi. Sawltak #zomidaily