Coronavirus Stimulus Relief pan huhna sum $2000 i ngah laidiam

Coronavirus Stimulus Relief pan huhna sum $2000 i ngah laidiam

COVID-19 Alert XI: Coronavirus stimulus relief pan akipia “direct check payment” huhna sum vai (azom): dotna pawlkhat leh second payment sum $2000 i ngah lai diam? Huhna “stimulus direct check payment” tawh kisai hong kidong thu pawlkhat:

Dotna #1: Ka Nu/Pa/Teknu/Tekpa ten huhna direct check payment angah thei lai diam? Bang hang ngah lo uh hiam?

– Social security benefit leh Retirement (pension) cih te ngah in Tax return ah dependent in kua man a guan (claim) kei leh direct check payment pen direct deposit or check tawh ngah pah ding uh hi. Ahi zong in khat peuh peuh in amau Tax return bawlna ah dependent in a guan (claim) uh leh ngah nawnlo ding uh hi. IRS te website ah zong kician tak in kingelh hi.

Dotna #2: Ka lawmpa/lawmnu tawh Tax return pen Joint filling account tawh bawl khawm ung. Tun ko omkhawm nawnlo in ka lawmpa/lawm nu ii bank account sungah sum lut khin ta, ken atuam in ka siau thei lai dia?

– Sum pen Tax return bawl lai dan aa bank account sungah lut suak dingaa, atuam in adang kisiau thei nawnlo hi. Sum pen akikim in na hawm uh kul kha ding hi.

Dotna #3: Ken huhna sum ngah lo in IRS website tung form ka phih (fill-up) in ka submit leh ki ngah kei veh aw, abang ci ahi tam?

– Na personal information (social security, date of birth, address) leh tax return information man lo hi thei ding hi. Tax return na bawl lai aa na income, refund sum na ngah zah leh na liau kik (owe) sum amount te kician tak in ngelh kul hi. Tua hi kei leh ki submit thei lo ding hi.

Dotna #4: Kei kum 17 cing khin in Tax return atuam in bawl, huhna sum ka ngah thei diam?

– Kum 17 cing khin in Tax return atuam na bawl leh direct payment sum pen na income tungtawn in atuam in kingah ding hi. Kum 17 cing khin ten tax return atuam aa abawl kei uh leh ngah nawnlo ding uh hi.

Dotna #5: Ken direct deposit bawl lo, check tawh ngah nailo, cik ciang ka ngah tam?

– Stimulus check pen nung nipi sung pawlkhat IRS ten khak khia khin uh ci aa, tunipi sung pawlkhat in ngah dingin kilamen hi.

Dotna #6: Ko ta 4 nei, 2 ai bek hong lut, adang 2 ai te bang aci ahi tam?

– Hi dan atuak mi tampi om uh hi. IRS te ii system pan khial kha uh ahih man in IRS website (https://www.irs.gov/coronavirus/economic-impact-payments) ah pai in tualai ah na ta te ii information (dependents) pen “non-filers” acihna ah na phih kik kul ding hi. Pawlkhat ten tua bangin bawl kik uh aa ngah kik uh hi. Angah kik lo ten mai tax return ciang ngah khawm ding uh ci hi.

Dotna #7: Adang second stimulus payment sum $2000 ngah kik ding aki cih pen a maan takpi hiam?

– Second round stimulus payment $2000 ngah kik theih nang Bill pen Congress ah nung kha bei lam in kikum (introduce) khin uh aa, ahi zongin kikum suak nai lo uh hi. President Trump in belh Congress in a pass leh ka ngaihsun ding hi ci hi. Ahi zongin akhat veina direct payment tawh belh kibang lo ding aa, kha sim mi khat ciang $2000 leh Ta khat ciang $500 ta (Ta thum ciang) kum bei dong ngah ding in geel uh hi.

Ahi zongin 1) US citizen 2) Permanent resident (green card) 3) Kum 16 a cing nailo ten bek in ngah thei ding in geel uh hi. Tu ciang ciang House leh Senate ah kilunglut pha lo in kikum kik nailo ahih manin hih second round payment ngah ding belh lamet tam khol lo hi. Ahi zongin hong kipia kik leh belh akua mapeuh ki lungdam tek ding ahih manin thu ngetna ah phawk tek ni. Thomas On Sian Mung (Thomas Mung Guite) Washington D.C