America leh Australia Kidanna (Distinction) ~ Pa Go Lian Kap

America leh Australia Kidanna (Distinction) ~ Pa Go Lian Kap

Dear Zomi a kuamapeuh, Nuntaak khuasakzia na kikup te uh thupi ka sa mahmah hi. Keizong USA ah omkhat ka hihnatawh tu ciangciang ka theiteng na gensa uh banzop in kong kup-pih nuam hi.

1. Refugee Resettlement

USA gam ah refugee te I tuntakciangin Federal kupi vaihawmna tawh nuntaak khuasak na I ki patsak nadingin sum (resettlement money or welcome money) mimal zui in ong pia hi. Ahizongin, ei a tungthak te in pau leh lai I theihlohman in, kumpi te tawh contract ala agent or nonprofit organization te tungtawn in I khuasaknang ong vaihawn sak uh hi. USA I tuncil a, i inn sungvai teng ong makaih agen tepen eitung veina taktak tawh nasem hilo in sumthalawh veve uh a hilam i telding kisam mahmah a, i welcome money tawh kisai sumzatna te teltak in i dot theih a hilam i telding kisam mahmah hi.

Hih refugee resettlement system ah Match Grant leh Welfare nam nih on hi.

Match Grant program pen inn kuan a tampian lamte’n ki ngah hi; a hizongin, kumpi fund zui in ki khiamkhiam hi. Match Grant program a ngah te i hih leh nasep i muh masiah inn sap ong huhin, khathumsung pen cash assistant ong pia uh a, kum 18 tungsiah te $200 leh kum 18 nuaisiah te $50 ong kipia in, kha 3 sung ki ngah hi. Hih cash assistant pen i welcome money tawh kisailo a hihi.

Ware fare te leuleu pen in tuabang ngahlo in, inn sapding te pen DSHS ( Department of Social and Health Services) an direct kipuak a, income $0 i hihleh inn kuam mimal (family size) zui in cash assistant TANF ( Temporary Assistance for Needy Families) kingah hi. A hizongin TANF a ngah mi i hihleh work class cih nasepzon na class te kahkul a, nasep zon kawmkawm kul hi. Thukhat ah, college kahdingin (full time or part time) TANF ngah na hihleh mawtaw sathau manding or bus ticket ding free ong kipia thuah hi.

DSHS panin i tun a kipan inn kuan mimal zui in, buhsih leh aksa lei nadingin card (Foodstamp or SNAP) kumpi Federal oe State panin ki ngah a, hihbel mikhempeuh tung leh low income inn kuan khempeuh in a ngah a hihi. Refugee leh citizenship ki ddeidanlo a, USA ah legal resident i hihnaak leh ki ngah hi. Ahizongin, kha 6 sim in family income ki up date den hi. Income tam semsem foodstamp ngahzah tawm semsem a hihi.

Resettlement Agency te’n i tun a kipanin kha bangzah hiamkhat (atamzaw bel kha 3 sung) sung inn sungvai thupi akisam teng ong sepsak uh a, a thaman te uh i inn kuan welcome money pan in dok kik uh a, khathum a cinteh a omlai teng check tawh ong pia uh hi. Enbel vakitel lo a hih manin, amawkna onghuh bangin i vatuat a, sumzatna kicianlo nengneng te i vagen ngamkei hi. I welcome money ong kipiak ciangin ei leh agency tepen mangpha a ki piapia lam hi a, inn sungvai 80% pen ei mawhpuak hi ta hi. Ahizongin, kha 3 sungah nasep ong guatzawh kei lailai uh leh, inn sap bel ong huhlai uh hi.

2. Housing (Inn leh lo vai)

Sum i neihnaak leh apartment, condo, town house, leh single home kisaap thei hi. Inn i sapciangin mimalzui in one,two,three, and four bedroom kisap hi. Kumpi tungpanin Section 8 housing om a, low income inn kuan te huhna in a tawm man mahmah in inn sap kipia hi. Tualo Mercy hausing om a, tuabel private housing assistance hi a, inn kuan income zui in kipia hi. Pawlkhat in deih a, pawlkhat in deihlo leuleu hi. Inn zong i ut nana ah ki leithei a, a hizongin i sutdingin thusau a hih manin sutlo ding ci zaw ni. Inn sap leh inn lei na ah kuamah ki deidan theilo a, Equal housing opportunity rules ngat takin om hi.

3. Health (cidamna lam)

Cidamna lah tawhkisai inbek hoih cihtak in hoih mahmah hi. Deihlopi in emergency thukin mahmah om in 911 kisamthei a, i omna tawh a kinai theipen zato pi or ei painopna zatopi ong puak uh hi. Athukin i damlohna hoihtak ong ki khoi masa phot a, zatui man leh kikhoina sum te ong ki nung nget hi. Medical insurance neilo i hihkhak zenzen leh zato pan in income zui in financial assistance program on a, a mau ii ong huhna dungzui in percent or 0% tawh kikepman ong huh uh hi. Medical insurance pen federal kumpi in a koih hangin state khempeuh in a mau private law zui in nei uh a hihmanin, state khat leh khat kibanglo hi.

Gentehna in; tulaitak Obama care pen state tampitak in sanglo hi. Tua a hihmanin, state mun tampi te ah free medical ngahding haksa mahmah hi. Ko omna Washington State leuleu bel hau a hihmanin Medicaid free in kingah thei a, thamlo in dental zong cover a hihmanin mitampitak medical vai ah lungnuam takin zato kah uhhi. Co-pay cihbang omlo hi lai hi. State healt care law pen state khat leh khat kibanglo a hihmanin USA health care program pen hoih/hoihlo cih thei om kasakei hi.

4. Education (Pilna)

Zomi refugee te’n USA i nuntaak na ah pilna thupisim lo in, inn sap tawm na, English pau kizanglo a nasep na leh kumpi’ theihloh sum zon na ki bulphuhzaw a hihmanin, pilnalam a ki kin vangvang omlo hi.

Kumpi sang (public school) pen free hi a, high school ciang free a hihi. American Education level a tut zolo sang inn tampi kumsim phial mah in tampi kikhak hi. High school ah zong state khat leh khat a ki batlohna tampi om hi. Ko omna state, Oklahoma, Tennessee, Indiana polis etc… state pawlkhat inbel low income family te huhnadingin scholarship program a tuam in neu uh hi. Washington State ah ” college bound” ki ci hi. Oklahoma State ah “Oklahoma Primise” ki ci hi. State khat leh khat a milawh kibanglo in, a scholarship piazia bek kibang hi.

Hih low income scholarship program pen i tate taan 7,8,9,10 ciangin ki siau thei hi. I ngahleh, hihpen i tate’n college kum 2 sung sangkahna bup nu leh pa’ sumbeilo in ong huhsak uh hi. Ahizongin sang naupangte in 2.0 or 2-5 GPA a ngakul a hihi. Hihpen high school sang naupang te’ panpihna program a hihi. Tualo, scholarship tuamtuam tepen naupangte’ laihat zawh zahzah zui in tampi om hi.

High school pan college a lut to te hita leh College direct a lut to zo kumciangsa mikhempeuh in kum 2 college kah nading Federal kumpi fund pan in FASA (Free Application for Federal Student Aid) kisiau thei hi. Hih FASA scholarship i ngah zenzen leh kum 2 college i kahnading tuition fee ong huh uh a, hihsum pen loh kik akul-lo huhna sum hi-in zat nuam mahmah hi. Keizong ka nga a, sangsum kapiak khit ten $500-1300) ciangbang vaal lai in, tuapen kei ipsung ah a lut a hihi.

More: America leh Australia Kidanna (Distinction) ~ Pu Zokhai

High school sang naupang pawlkhat in state scholarship a ngah uh pen kum 2 college sangkah na ah zang uh a, FASA zong siau in, tua FASA pan a ngahuh sumpen khol in kum 2 college a mankhit kum 4 degree adding sangsum in zang uh hi. Cihnopna ah, state huhna a kipakleh FASA huhna in kum 4 degree dingzong huhzosuak cihna a hihi. FASA huhnapen kum 2 college bek ah kingah hi. MA, Phd te ah bel scholarship tuamtuam tawh ki namtaak kul cihna a hihi.

High school sang naupang pawlkhat bel High school 4.0 GPA a ngahleh University tuamtuam pan in full scholarship pia uh hi. USA nuntaak zia i kikupna a hihi. Lungdam, Pa. Go Lian Kap (Seattle, Washington State, USA)