Ih theihsa mahbang in tulaitak Brazil, Rio de Janeiro khuapi sungah leitungbup in Olympics kimawlna pawipi bawlin abuai mahmah laitak ahihi. Hih pawipi kibawlna sungah miginalo, mi lungsimkhel pawlkhatmah nakihelzel a, tuate in pawipi a nawngkaitheihtheih nading in atuamtuam panin mipi te na linglawngsak sese uhhi.
Zanni 10 August Wednesday ni akipan palik te’n Security nasiatak in panla uh a, akigingsa in omden uh cihi. Rio’s International Airport gei ahzong palik te khuasungcing in avak pen thautawh nakikap mawk hi. Tuaban ah Bus khatzong suangtawh amaan kidengtam citciat hi.
Palik te akikapna munpen Olympic pawipi ending in akipaina Highway lamzikpi tungah hi a, Airport leh Olympic Park kikal ah thautawh kap athuak uh ahihi. Hih kikapna panin mi 3 liam in, khatpen huaisia simpian ahih manin, sisan khawng thunbehkul cih thunei te’n genkhia uhhi.
Justice Minister Alexandre de Moraes in agenna ah hihbang gamtatna pen gitlohna leh meidawi gamtat hilel cihsan hi. Hih kikapna panin aki ummawh mi 2 omkhin a, tuate pen Police te’n matding in azon laitak uh ahihi.
Nungkalsung inzong Sweden gammi khualzin mi 3 te bawlsiatthuak kici a, Portugal panin Visiting Education Minister khatzong temta ngatsa in damiah kitaih kici hi. Tuaban ah Equestrian Centre zong thau tawh kikap cihbang in buaina om neunau hi.
Tuesday nitak in Journalists honkhat Basketball kimawlna panin Olympics Media Center ah Bus tawh apailaitak un a mawtaw maan kidensak hi. Passenger te’n thauging kaza uh ci a, ahi zongin Palik te’n thau tawh akikap hilo in, suangtum tawh akideng ci uhhi.
Hihbang in mipi pawibawlna ah nopmawh anasa valval pawlkhat omthei gige a, tuate mahin pawi nawngkaisak thei uhhi. ZD Sawltak #zomidaily
Comment piaknop aomleh...