Thupil dotna le dawnna ~ Nk Khanno
Ni danglai in ah Kumpi Akbar kici a pilmahmah gam-uk kumpi khat a om hi. Thukhel dot uk mahmah in a gammi te kidem sak zel hi. Khat veivei ciangin a lamdang a nuihzak huai dotna khawng dong thei zel hi. A ma dotna te ahih leh a pil, a ciim, a tei mahmah lobuang in dawnkik theih ding thu hilo hi.
Khat vei Kumpi Akbar in a lamdang le a khel mahmah dotna khat hong dong hi. Kumpipa dotna hangin gammi te cimawh in lungkia in om ngeingai uhi. A gammite a et kawikawi ciangin lukun tawh, lukhuat khuat tawh, khua dakdak tawh Kumpipa dotna ngaihsun in a om ngeingai uhi.
Tua hun laitak in Babel kici khangno khat Kumpipa mai ah hong dingkhia hi. Babel in Kumpipa dotna pen dawngkik zo ding cih amahlemah kimuanna tawh..
“A vanglian Kumpipa aw, hehpihna tawh na dotna khatvei hong gen kik ve, kei mah in hong dawngkik ning.”
“Ih gam sungah bawng bangzah om ahia?”
“Hi hi a vanglian Kumpipa aw, ih gamsung ah bawng vekpi omzah pen tul le zanga le sawmgiat le kua linlian hi.” ci’n themvei zong zekai lo in Babel in hong dawngkik pah hi.
“Babel, na takpi maw? Koi ci theih nahia leh?”
“Avanglian kumpipa aw, na nasemte na sim sak in. A zenzen in bawngte hi zah sangin a tamzawk aaleh tua a val zah pen gamdang aa om a meltheih, tanau te uh ih gam ah hong hawh uh ahih man hi ding hi. A zenzen in a tawmzawk aa leh lah akisam zah pen a meltheih a tanau te kiangah a hawh man uh hiding hi.” ci’n Babel in dawngkik hi.
Kumpipa Akbar in a pil,ciim, tei Babel pen pakta mahmah in kumpi inn ah thudotpi dingin sam pah hi.
Khat veivei ciangin logic bang lianin thu ngaihsutna in na khat peuh a hoih in bawl theilo zel hi. I ngaihsutna te suakta sak in khahkhiat theih ding kisam hi. Maths bangin kician sitset cih a om theilo a ki khelkhel a kipkholo leitung thute ah i ngaihsutna te suakta sak ni.
Pilna, ciimna tawh kidim in hoihtak ngaihsut khinkhai theihna, ngaihsutna te genkhiat ngamna le mukpau kampau siamna in na khempeuh bawlsiam thei hi. Nk Khanno Ref: A wise counting (Thettancho in zong kawllai in let ngei hi.)
Comment piaknop aomleh...