Oklahoma Zomi National Day 2015 lawhcing takin kibawl zo

Zomi Innkuan Oklahoma
Board of Directors
Thu pulaakna : Zomi National Day 2015 lawhcing takin kibawlzo

Dear a zahtakhuai Zomi Innkuan Oklahoma kipawlna huamsunga om Zomi teng aw’
A beisa hun sawtpi pekpana kipan i ngaklah mahmah kum khat a khat vei bek i neih leitung minam tuamtuam te laizangah minam picing khata i dintheihna ciaptehna( mark )khata hi Zomi Nam Ni ( Zomi National Day 2015) pen Zomi Innkuan Oklahoma kipawlna vaihawmna/ inntekna tawh February 20, 2015 ni-in Tulsa khuapi sunga om Hotel lian mahmah khat a hi Marriott Hotel ah picingtak leh nopcitak in kibawl zo hi. hih ni pen Tulsa khuapi sungah khuahun hoih hetlo huih leh guah kithuah in khuavot mahmah himah leh Zomi te minam itna lungsim khauh mahmah a hihmanin khuahun siatna te in daltan zolo in ong kipai ziahziah hi.

Hih hunsungah Tulsa khuapi sunga om pawlpi tuamtuam panin Zomi ngeina lam tuamtuam leh Zomi leh Zogam ngaihna la hoih nono tampi Zomi khangthak nungak tangval tengin ong lamziahziah, ong saziahziah uha mipi in tha kingah mahmah hi. Zomi Nam Ni bawlna hun sungah thugenpi dinga a kisam zin mangpi Pu Pum Khan Pau, Ph.D. inzong Zomi te khantoh nading thumanpha tampi onggenkhia thei hi. a diak in Zomi khangthak te a ding pilna a thupitzia ong limgenpih mahmaha mipi in thupi kisa leh tha kingah mahmah hi.mipi ong paikhawm pen khuahun siat kawmkal panin 1200 pan a tungsiah phadingin makai ten thu ongpuak uh hi.

Hih hunsungah Zomi khangthak te sungpan gam leh minam a vei Zomi numei te ong lamsang leh vaang ongpia laisiam bek hilo in Tulsa khuapi sung leh Oklahoma state sungah kipawlna tuamtuam ah makaihna mun tampi ah a len leh zan deuh mah New York khuapi a UN Head quater ah ZIUSA kipawlna taangin Youth Forum khat a vakah lia Dim Sian Mang @ Mangnu zong thugenna hunkhat kipia in New York khuapi UN Head quater sunga meeting ( Youth forum ) a vakahna sunga thupi a sak leh a thangahna a diak in numei leh khangno te a thupitna Zokam leh mikang kam in kiciantak in onggen setset a mipi in tha kingah in ki angtanpih mahmah hi.

Hipawl hunsungah Zomi tebek hilo in namdang te a diak in Zomi sangnaupang tampi te sangkahna Jenks Public High School pan sangsia/ siamah te a hizongin, Glenpool sangpan in sangsiapi te leh Zomi tampi mah nasepna Company lian mahmah leh Tulsa khuasunga Zomi te nasepna Company te lakah khasum a hoihpenna a hi Bus Plan panin zong lia Cingbawi makai na tawh u lian pawlkhat ong paikhawm thei uh a, hih i lengla zahtak tengpen a mau khutsunga om i Zomi te khualna leh a mau vangpiakna tawh Zomi ngeina van tuamtuam letsong piakna zong kinei thei hi. mailam ah hisanga a kimzaw, a picingzaw sem a vaihawm zawh nading ngimna kineilai hi.

Hih pawi hunsungah bitna lam tavuan onglaksak dingin Zomi pasal 15 tawh a kilam Security group khat leh zin leh leng te vai ong dawnsak, ongmuaksak dingin nungak tangval 15 tawh a kilam Usher group khat zong kiphuan khiazo hi. sum leh paai ngahna a hihloh banah a hun neihsa, a sum a pai uh iksik hetlo a minam a itman a ong kipia khia a tunga i khangthak Zomi te zahtak huai kaai thei mahmah uh hi. a kilawmsakna leh ciamnuihbawlna dinga kiphuankhia hilo in minam lian minam picing te neihdinga kilawm leh a kisam ngeina zia leh tong te i neih nadinga kivaihawmkhia, a kihanciam a hihi.

A lamdang mahmah khat ah hun mandong mah mipi kuamah kiciahlo in hall dim phitphet in ki omlai hi. Tulsa khuapi sunga om Pasian nasem siapi tengzong ongkim phingpheng banah kipawlna min tawh a kicial/ a kiseh panmun te tavuan zotakin ong semto diamdiam uh a hihmanin a vaihawm makai te ki lungkim ngaungau hi. himah hi. Zomi Nam Ni cih pen mimal, innkuan, khua leh tui khat, beh leh phung khat, pawlpi khat peuh bek tawh kisai hiloin Zomi hing a kici khempeuh, Zomi bup tawh kisai thu a hihmanin hibanga i paikhop, i pankhop liailiai pen etlawm, namtui leh thupha sanhuaikai mahmah hi. Zomi te mailam ding lawphuai leh limci semsem hi cih kimuthak thei hi. gen toto leng ong tam semsem incin a sawtlo in hih hunsunga hunzatna khempeuh video tawh kong khahkhia ding uh hi. Zomi te i biak Pasian in thupha pia in ong makaihto den ta hen!

Lungdamna lianpi tawh
Zomi Innkuan Oklahoma
Board of Directors
Tulsa, OK
February 21, 2015