Ka nak sunga Tangsiat ~ Hau Za Cin

Ka nak sunga Tangsiat ~ Hau Za Cin

Laklawh tak veh aw… Tua sanga laklawh zaw khat om, nungakte biang ah om tangsiat (pimple)! Nungak hinapi ‘tangsiat’ nei himawk hi. Tua bek hikei lai e, nupite tangsiat… bangcih ding… ‘tang’ + ‘siat’ hinapi nungak melhoih pipi biang khawng, a tal khawng, a nak gei khawngah om, po, san lihleh hi… laklawk thong taw. ‘Tangsiat’ cih ciang tangval hoih ding kimlai a siasak, a mel ngeina a siasak, a niinsak, a buahsak, etc cihna hileh kilawm tak hi. Tangvalte ading hidiak ahih leh banghanga nungak tungah a om ciang ‘liasiat’ cilo a ‘tangsiat’ mah cilai veve i hiam!

Tangval cihna Tang, a tomlak in Tg. ahi nailo khangno kum 12 te khawng zong tangsiat neita mawk uh hi. Tulai khang kinawh kici a, naupang cikcik zong lianpipi pha henhan in a kum tawmlai napi a pumpi gol ta uh hi. Khualumna ah singkung lopa khang a kicih bangin global warming hangin mihing zong khanghat hiding hiam cih bel research finding om nai tadihlo hi inteh. Ahi zongin nidang sangin mi khanghatzaw, lian baih zaw, a kum tawm napi a pumpi lian mahmahta cih tam hi. Tua bangte tangval ahihma, kum 13 a phakma, English te cih dan leh Teenager a hihma in tangsiat khawng nei gawpgawp ta uh hi. Tangval nailo a ‘tangsiat’ nei… tang hinailo a ‘tangsiat’ nei..!

Papi pawlkhat zong ‘tangsiat’ nei uh hi. A tangval nawnloh ciang nei nawnkei pah leh kilawm hiven, a nei lai veve om hi. Zi neih ciang tangsiat bei pah cih bang a om diam ka thei kei a, pasal neih ciang a tangsiat teng bei pah cih zong a om tam ka thei kei a, ahi zongin a papi khit, a nupi khit ciang a nei lai om hi. A nei ngeilo a nei saan cih bang a om tam maw. Leitung pen a lamdang mahmah hithong hi. Nitumna lam khawng ‘saklam’ a ci veve pawl om theih hi.

Theih ciang khek ding hileh kilawm tak hi. Siapipa i cihcih khat pen ama min tua na hilo thei hi. Sangmangpa i cihcih zong ama min tua na hilo thei hi. Ama min taktak na om khinkhian thei mawk hi. Khamtungmi i cihcih zong i minam min hilo thei a, a dikzaw khat na om lingleng thei tak hi. I theih ciang a dikzaw tawh laih ding hileh kilawm tak hi. Tua ahih kei leh Lamka lamte’n, ‘a laklawh geigoi tel’ acih uh hong phawksak mahmah ding hi.

Tangsiat pen nakvang sungah om in, biang ah om in, tal ah om taleh ‘tangsiat’ mah hiveve mawk hi. Kimu in kimu kei taleh tangsiat hi a, numei tung, pasal tung, khangno tung, khangham tungah hita leh tangsiat mah na hiveve hi. Ka nakvang sungah tangsiat pen kua mah in hong muhpih lo hi. A nat mahmah hang zong hong kitheihpihlo hi. Ahizongin tangsiat ahihna kiam tuanlo hi. Hau Za Cin