Custom Officers tetawh kipawlsim in guta te’n vankham kikepna pan RM30 Million man gukhia

Custom Officers tetawh kipawlsim in guta te’n vankham kikepna pan RM30 Million man gukhia

Malaysia gamsungah Customs Department te’n guihtheih khamtheih amatkhak te akikepna “Customs Warehouse” khat guta damiah te’n buluhkhia uh cih theSun pan kiza hi. Tua Customs Warehouse pen Nilai, Kampung Jijan aom Anti-narcotics Division Warehouse hi a, Sunday zingsanglam in akiluh ahihi.

Vankham “Drug” kikepna panin akiluhkhia, amangcip tepen Heroin leh Ketamine namte hi a, akigawm in 50kg bang phading kici hi. Tulaitak amanzahding sumtawh akituat ciangin RM30 Million manneiding aki gukhia cihi.

Hih Customs Warehouse ki buluhna thu aom ciangin muanmawh mi 5 ki mankhiapah a, tua mi 5 lakah mi 2 tepen RMCD (Royal Malaysian Customs Department) ah asemlaitak Officer te nahi cimawk hi. Tua Customs Officers mi 2 te tungtawn in vankham kikepna Warehouse panin guta damiah te’n vankham agukhiathei uh ahihi.

Tua akigukhia vankham te lakah pawlkhat pen amitawh kimankik khinta kici hi.

Hihvai tawh kisai in RMCD director-general Datuk Seri Subromaniam Tholasy in tuni in agenkhiatna ah akigukhia vankham “Drug” tepen Box 7 sungah kikoih in, Port Klang aom Cargo Container khatsung pan ki mankhiakikthei cihi.

RMCD Officer mi 2 banah Security Guard asem mi 2 zong kihel uh a, tuaban ah apualam panin khuasungmi Civilian khatzong kihel cihi. Tua akiman tepen ni 6 sung Remand tawh kikemphot dinga, tuakhit ciangin thusitna kineiding hi.

Police te’n vankham agukhia te amatkhit phetin Police Report bawlpah uhhi. RMCD sungahzong nasemte thusitna kineipah in, athu hoihtak akikan ciangin hih guta damiah te nasepna pen Customs zumsung ah nasemte tawh kipawlin akisem cih kimuthei hi.

Tua Officer mi 2 akihel tepen amawhna kician taktak cih akitheihleh nasep kikhawlsak bekthamlo in, thukhun ombangin thu kibawlbeh dinghi.

Tua Warehouse sungah akikoih vankhamte pen akimatzong sawtnailo, zandiak in akimankhia hi a, akimatkhit ciangin Warehouse sungah akikem ahihi. Tua vankham agukhia ami te leh avankham tepen asawtlo in mukik veve, mankhiakik veveding cihpen kakimuang mahmah hi ci’n RMCD makaipipa in genkhia hi.

Tua ahih manin, tua vankham akigukhia te akankhia dingin Tactical Team “Customs Operational Battle Force Response Assault (Cobra)” te panmun kilasak khinta hi. Malaysia gambup muntuamtuam aom Customs Department te ahzong hoihtak Security koihding kizasak hi.

More: Malaysia, Ipoh khuasung innluh guta te lakah palik 3 tak kihel

Hih vankham aki gukkhiat laitak in guta damiah “Robbery Gang” pen pasal Dozen khatvalbang phading kici hi. Tuateng in Security Guards te mancip in, Sunday zingsanglam 3am hunpawl in Warehouse panin vankham agukhia uh ahihi. Security Guards tepen hencip in, vankham tepen Pickup Truck khattawh puakhia vingveng uhhi.

Security Guards te amau leh amau aki hencipna panin aki sutkhiattheih uhciangin amanlangin Police te zasakpah uhhi. Nainih khitzawh ciangin Security Guards te’n Police te zasaktheipan uhhi. Ahi zongin tuazawh asawtlo in Special Task Force te’n guta te lakah khat mankhiakik theipah uh a, tuazawh ciangin akigawm in mi 5 amankhiathei uh ahihi. Police Officer leh Customs Officer tepen damiah tetawh kipawlzel, amau ngiatin damiah taihzel, innluhzel, sumsuhzel, … Sawltak #zomidaily