Kim Jong Nam suamlupna ah akihel numei 2 te thusitna kineiding

Kim Jong Nam suamlupna ah akihel numei 2 te thusitna kineiding

Malaysia, Kuala Lumpur International Airport sungah abeisa February 13 ni in aki suamlum North Korean gammi Kim Jong Nam sihna vaitawh kizom in numei 2 kiman hi.

Tua numei 2 tepen tuni Thursday (Apr 13) ni in Sepang Court ah thusitna aki neikikding hi a, zingsang 9am hunin Magistrate’s Court ah thusitna kipanding uhhi. Hih numei tepen Sepang Court panin Shah Alam High Court ah kipuak khading uh cihzong kiza hi.

Zingsang 8am madiak in Sepang Courthouse ah anih un tungkhinta cih theStar pan kiza a, Police te’n mawtaw atuamtuak in paipih uh a, Security khauhsak mahmah uh cihi. Thusit athuakding numei nihtepen kum 29 aphakhin Vietnamese Doan Thi Huong leh kum 25 aphakhin Indonesian Siti Aisyah te ahi uhhi.

Vietnamese Doan Thi Huong ii apianna apa zong tulaitak Malaysia ah atanu vaitawh ahawh laitak cih kiza hi. Vietnam-based aom NGO khatin akhualzin nading uh Sponsor pia uh ahih manin, Malaysia azinthei uh ahihi.

Zanni in atanu akikepna Kajang Prison ah hawhkhin a, naikhat sungkhawng atanu tawh kihona neithei uh cihi. Doan Thi Huong in agenna ah ka khasiat suaknawnkei, thuakzo khinta ing ci a, ahi zongin kapa adingin ka lunghimawh, amah ii Safety ding lunghimawh ing ci’n genkhia hi.

Tuni zong Serpang Court thusitna munah apa apaiding phallo in, Vietnam Embassy in kapa hoihtak nakepsak un ci’n ngetna nei cih kiza hi.

Doan Thi Huong leh Siti Aisyah tepen “Section 302 of the Penal Code” tawh Murder ci’n mithat in thu akibawlkhin uh ahihi. Amawhna uh kiciantak in aki muhkhiatleh anih un sihdaan “Death Penalty” kipia theiding cihi.

Hih numei nihte pen agendan uh abatleh North Korea gammi pawlkhat in khutzat in aneih uh hihtuak hi. Amaupen mithatding kisalo in, ciamnuihbawl “Prank Show” bawlin Video akizaihding khawng asa uh hihtuak a, ahi zongin asawlte’n akhutsung ah “VX nerve agent” kici Chemical Weapon piamawk uh ahih manin, tuatawh mithat asuakkha uh hiding in kigen hi.

More: KLIA2 sungah Kim Jong Nam kithahzawh khakhatsung thupiang te

Tuni Serpang Court panin bangciciang thusitna, thukhenna hongnei uhdiam, ngaklai photni. ZD Sawltak #zomidaily