A zungpan in kal khia in ~ Dim Lun Zam

A zungpan in kal khia in ~ Dim Lun Zam

Mat leh zet a zudawn khangno khat thungetsak ding in ong sam uh a, a neu a ki pan a pian zia ong gen uh hi. A nu in a ta a suah zawh nai nih khit teh a pa in tenpih lo ding ci ahih man in apa tawh nusia vingveng hi. Hih naupang a nu nawizu tawh khang lo, nu itna ngah lo a hih man in, a lungkim thei lo hi. Tua thu ka zak ciangin, Khasiangtho in, ong makaiha hih bangin ka hopih hi, “lawm aw, na nu na pa te zong nang bang mah a mawhnei hi a, a ut pen uh hi lo hi.

Ong it lo zong hi lo hi. Amau Pasian thu thei lo ahih man uh hi. Maisak in, ka cih leh khitui tawh a nu mawhna maisak in, tua a ki pan a zu dawnnawn lo hi. Tu in zong kokiang ah disciple ding in ong zui hi. A mah Hakha te ahihi. Kha guk sung ka pattah khit uh teh ciah kik a na sem in lungnuam tak in om hi.

A zung banghiam cih kan zo le hangh a bul ki longh khia thei a, agah ngei gah thei nawn lo pah hi.

Natna tawh kisai in zong, mawh thum na nei in, mi a hencipna te uh mai sak masa le uh, alen cip dawi mang pa thupia in, ama mawhna mai zo, Zeisu sisan in sawpsiang zo hi, a mah kisikkik zo hi, dawi mangpa aw, hih na seppih teng tawh hih mi pa tung ah thu nei thei nawn kei uh teh pu suak un, ci le hangh tai khia diamdiam uh hi.

Na buaina te atungtham pan phisian sawm ken la, a zung pan in kal khia le cih na lawhcing baih zaw ding hi.

A pualam i muh theih natna leh mawhna sung ah kikhih cip na te in mit muh theih agah te hi a, tua te in singkung bang in zung nei hi. I vuntung a om muh theih meima khem peuh a tungtham hi den lo a, a hanghang in ong piang khia na hi thei hi.

Khamtheih guih theih,zu leh na dang te pan a pusuak zo lo te a duh a deaih uh tawh ki gamla sak le hangh tawl khat sung ong ki mang thei uh a, ki mu kik le uh sem kik veve uh hi. Meima pen a hang kan lo in, a tungtham bek zatui nuh in, sil pong leng damtuan lo in a sung lam ah na thuk lut mah mah thei hi. Mi khat heh den keii cih zong a zung pan in kan in tua pan in kal khia zo le hangh tua heh na te om nawn lo ziau hi.

A zung i kan tel theih nading Kha Siangtho bek in ong makaih thei a hih man in, a mah tawh ki thuah in Laisiangtho sim na lungngaihna leh amah kiang mah ah ong pholakin ci in ngetna aphamawh masa pen ahihi.

I neulai a i tuahkhak thu te in theihlohkal in sunglam liamma ongpia a hih man in i ma kinawt theih loh nading in,nate (things) leh mi te kihtakna lau na leh maizumna cih te ong piangsak hi. Neulai meima(Childhood trauma or wonded past) in i sunglam picing sak thei lo a hih man in, naupang te itna tawh makaih a kep siam mahmah ding kisam mahmah hi.

1. Nute pate in hamsiat leh phuisam zang lo in, a khialh hun nangawn un, thuhilh na na neih a, dan na piak khit teh na it na lak tawntung in la, kawi in nam in om den ding ki sam hi.

2. Thapia in, ‘ Nang pen mi thupi suak ding, Pasian in ong zang ding hi’ cih te nisim in citang tang ding hi hangh.

3. A mel a sa in ko na kam mal te zang kei in la, a lawm te leh a sang gam te tawh zong teh kha kei in.

3. A u nau lak ah lai lam a nang pen a hih leh zong, Pasian in lampi tuamtuam tawh thupha hong pia a hih na leh Pasian mikim a ding ngimna nei cih te gen tawn tung in.

Na kampan in lamet na pia tawn tung in.

4.A lungsim cidam te akhan dan uh hoih hi. Pasian thuman thutak tawh pantah in la, lungkia kei in. Mi thupi te tangthu te genpih den in.

5.A mau tawh amau uk ki mawlna te ki mawl pih zel in. Nu leh pa tawh limtak a khang to a, Pasian thu tawh ki pantah naupang te a zawn uh hang in nikhat ni ciang in makai pi ong suak ding uh hi.

6.A hih theih lai teng, na naupang te mi kep ding muang kei zaw in la, nang mah in kem in, pantah in.( Mi ka cih ciang in na sanggam, na inn kuan pih dang te na ngawn a ci ka hihi). Bang hang hiam cih leh a mau te in a it uh hang, a mau te a nu uh a pa uh hi lo hi.

I deih loh lungsim meima ong om loh na ding, hih te in zung a khaak ma in tu in, ki dal ki kem khol thei ding cih na hi.

1.Hih pa a neu lai a atuah khak thu, a hunlap in ki ngaihsak hen la, ki thupi sim leh hih lungkim lohna te piang lo ding hi.

2.Naupang te pen, ‘no naupang te’ i cih pen man lo hi. I ta te thugen limtak ngai in thusim in, a mau tawh ki thuah hun tampi la ding ki sam hi.

3. Hih bang lungsim natna a neih loh na ding inn kuan nuam a suah na ding antang thunge ding leh lai siangtho mah tawh pattah ding kasam hi.

4. A mau khansachet(feeling) thei lo in mawh saksak in taitai kei in la, nang na mawh leh thum ngam in. Dim Lun Zam