Nupa ki khenna ~ John T. Hum

Nupa ki khenna ~ John T. Hum

Nupa ki khenna pen zan khat thu a piang ahi kei a, kikhen ding thukim na letmat thuh ni- a piang zong a hi kei hi. Laidal tungah kikhen na ding min thuhna a om ma in lungsim leh kha sungah ki khen na piang khin hi. Ki hopihzia te nuam non lo a, mit zung kila non lo in, kam mal te khum kisak na bei hi.

Thu kikup na om non lo in, amau tuam ciatin tang tat uh hi. Khat zaw in akiang vaneh leh khat zawin peel hi. Lungsim a kikhen ciangin pumpi ah ki khen na piang hi. Nupa pum khat suak I cih te khat leh khat a deih zia uh kitel a, lungsim kipia te ahihi. Alang khat pan itna a om hangin a lang khat in sang kei leh pum khat suahna om thei lo hi.

Thu-um mite nung tolhna zong zan khat thu a hong piang henhan ahi kei hi. Pasian zia leh lampi tawn lohna tamveipi a om tohtoh ciang a hong piang ahihi.

Topa Jesu in a Pa tawh pum khat hi. A lungsim uh, a taksa uh pumkhat hi a, ki tukalh ngei lo hi. thu-um te Pasian tawh pumkhat suahna zong tua bang lian ding aman deih hi.Langkhat pan itna, lunggulhna bek tawh ki ngah lo a, langnih tuak a thukimna a om ciang bek in pumkhat suakna piang hi. (Pasian bek in hong it tawh ki ngah lo a, mi hing in zong it thuk ding kisam hi)

Pasian itna sang kei leeng, ama deih zia tawh ki leh ngatin nung ta leeng, Pasian tawh ki khen na piang thei hi. Aman hong it lo hilo a, ei man nial ih hi zaw hi. Lai Saingtho in muntampi ah warning hong pia hi.

Nungtolh te Pasian in sam kik a, I taai san leh hunlap in zuan kik leeng hong sang hi. Amah in hehpihna leh giitna tawh ki dim a, I lam pialna pan kileh kik ding hong lamen tontung hi.

Tua ahih man in khat leh khat na ki hansuah un (Sawltak Pawllu)

John T. Hum