Zomi Bup Lungdamkoh Ni (Zomi Thanksgiving Day)

Zomi Bup Lungdamkoh Ni (Zomi Thanksgiving Day)

1905 February 19 ni-in Dr.East in ukpi Hau Cin Khup le a khuapihte mai Tonzang kongpi lui-ah
Tuitum-te Son Vung le Hen Za Kham tui na phum hi. Tua hun phawkna-in 2005 kum November nipi nunung ni
November 24 in Tuitum khua ah kum 100 cin pawi kikham a mi 1000 aw tawh Helleluijah lapi sa-in Pasian tungah lungdam ki ko hi.

Tua nipi November 24 ni mahin ZIV Laisiangtho apna kinei hi. Tuani-a kipan November Nipi Nunung ni
simin Zomite in a kituakin Lungdamkoh Ni in zang den ni ci-in biakna nam 11 in thukhentatna kinei hi.
Tua ni mah in Zomi Christian Alliance (ZCA) kiphuan hi. Tua zawh ni nih, November 26 ciangin hih kum 100 cin pawi a

Halleluijah lapi sa mi 500 in Tedim a Festival of Praise , mi 3000 val Halleluijah lapisakna ah kihelkik uh hi.
Tua lungdamkoh hun kizom toto hi.

· 2006 kumin Yangon Full Gospel biakinn ah biakna namkim in kibawl hi.

· 2007 kumin biakna namkim in siamsinte tawh AMC Kawlpi ah nuamtakin kibawl hi.

· 2009 ciangin Kaptel khua lawki beina tawh thuahin Kaptel khua le a kim a khuate tawh lungdamkohna kinei hi.

· 2010 ciangin Cope Tedim tun zawh kum 100 cin le CMBC biakinn thak hon tawh kituak in lungdamkiko toto hi.

· A kipat a kipan tuciang dong pawlpi ciatah hih Lungdamkoh Ni a kituakin kizang toto in, tu kum November 29 ciangin Kum 10 cingta hi.

· Tua himanin Ni ciamtehna bawlte in zong Zomi Thanksgiving ding ci-in kum simin suahsak den uh hi.

Tua hi-a hih Lungdamkoh Ni a zangsate le a zang nailote in

tukum November Nipi nunung, November 29 ni-in i pawlpi ciat ah TOPA tung lungdamkoh hunin zang ciat ni.

Lungdamkoh dingte

· A nungta a vanglian Pasian a neite ihihna

· Zomite thupha ngah minam i hihna

· Zomite Topa’n hong lamsangin inn le lo, neih le lam hong piakna

· Pilna siamna lamah hong lapsangna

· I biak Pasian’ thupha hangin leitung ah Zomite I kizelhna

· Internet le e-mail-te nuamtak I zat theih nadingin Zolai hong piakna

· Zomite i tuntunna ah Pasian in Ama nasem dingin hong zatna

· Tuipi galkhat pan Zogam le Zomite hong puah hong zun I mipihte hangin

· Zomi le Zogam hong puah namdang mite hangin

· Khuahun sia hihzah laka TOPA hong kepna

· Leitung mun tuamtuam ah Zomite Topa in hong puakna

· Guahtam luatna hanga dongtuak Zomite khat le khat i kihuhzawhna

· Zomite kipum khatna Zomi Bapstist Churches of America(ZBCA) ah pawlpi 22 kipumkhat zawhna

· 2005 kuma ki ap ZIV Laisiangtho a bubup-a Topa’n hong musakna

· Zomi bup tanga gamthu vai hawm ding Zomi Congress for Democracy(ZCD) gualzawhna*

Ngetdingte

· Zomite I omna peuhah Pasian biakna ah a citakte I hih nading

· A munmun a om Zomite tangzai takin a ki-it a kikhualte I hih nading

· I gam I lei hong puah ding Zomi tampi hong piankhiat nading

· Namdangten a nungta Pasian a theih nadingun Topan hong zat zom nading

· Mai lamah Pasian in Zomite minam dangte tungah thupha hong suahsak nading

· Mai lamah i Zogam i Zolei hong cidamin hong nosuah kik nading

· Mai lamah i pau le i laite suakta takin I sin theih nading

· Lamka kuala i sanggam Zomite lak-a thupiang a sianbaih nading

· Kawlgam kumpi thakte ading

· Khua hun siate hanga gim thuakte ading

· Lamkaa buaina hanga site’ innkuanpite ading

· ZCD makaite ading*

Siate le Makaite Theihding

November 29 ni ma-in makaite in- mipi tung zaksak kholh dingte;

1. Tukum sung Topa tunga na lungdamna na kohnopna zahzah khawhsa, sumngahna, gankhawina, Topa thupha na sanna mun khempeuh pan na phalzah uh hong keng un.

2. Maikum cianga na ciin ding uh khaici namte tawm ciat hong keng un.

Lungdamkoh le nget dingte- nget khat, nget nih, nget thum suah leng hoih hi. Khaici ap hun atuam in neih ding hoih hi.

HAPPY ZOMI THANKSGIVING