Numei leh Chemical vanzat te ~ Daniel Sum

Numei leh Chemical vanzat te ~ Daniel Sum

Thupatna
Numei te nuntakna pen Pasalte mah bangin gamthu, sum zuak sum leina, nopna dahna ah zong buaipih mah mah khat hihna tawh lungnuam ding kisam mah mah hi. Numei te pen innsung ah nekding avaihawm inn nupi asem om aa, cina kem siavuan, sang siamah, setzong ah sem, lokho nasep cih bangin mun tuam tuam ah zong sem uh hi. Tua bek thamlo in, zumpi leh company ah mun lian pi pi ah nasep uh zong om hi.

Numeite pen Chemical vante tawh sukkhakloh phamawh zah dongin nisim in kisawh kha uh hi. Hih chemical van te hoihtak in zat kei leh, kidawm kei leh damlohna ong piang sak thei cih lam thei uh leh chemical pan ong piang damlohna, natna leh cidamloh na khempeuh kidal thei ding hi.

Numeite pen pasal te sang chemical pan ongpiang damlohna pen thuak zaw uh hi. Tua in numeite bek thamlo in, naungek te dongin thuak ding ahih manin chemical vanzat tawh kisai in theih ding kisam hi.

Khuapi leh khuano aa om nasepna mun tuam tuam ah sem numei te ban ah nisim nek ding vaihawm den ahi inn nupi te zong nisim in chemical van tawh kisawh kha den in, chemical vante pan kingah thei cidamna ah nawngkaisak theih te theihkholna in chemical pan damlohna, natna te apaing theihloh na ding kidal khol thei ding hi.

Chemical zang leh chemical sawh na pan in akibawl khia akhal, atui, ahu, avui te zong chemical vante mah in kiciamteh hi. Hih te in lokho na ahzat ahi lungnosih theihna, lei hoih za, sikvanzat leh datkuekhan aa zat chemical tuam tuam te, Inn aazat, zato leh zatui sai pan zatui te, nektheih tung ah kizut color te, sawt kikoih theih ding zatui, sapiang vui, sapiang tui, ninkiatna tui, thoza cih bang inn sungzat, Zeenan leh zeenan pan zong chemical kihel hi.

Chemical in pumpi tung aa khuak, thagui, tuap, lutang, siip, kal, vun te susia hi. Sigui leh naupaai theih nate zong susia in cancer natna tuam tuam zong piangsak hi.

Numei leh pasal pen pumpi pian zia, nutakna thagui ahi tui kisap leh Inzain pianzia, leh protein om ciah cih te pawl kilam dang mah mah hi.

Numei te pen Nu gilsung ah omlai, suakcil naungek, naupang gual, nungak cil hun, nungak hun( kum 10 gual), naupaai hun leh nau nawipiahun, uh ham hun leh teekhun ah chemical bangzah tawh bangtan vai kisawh kha cih tawh cidamna susiat theih cih kimu thei hi.

1950 – 60 kum pawlin Tarlimodize( nau paai te aa ding chemical kihel zatui) in khut leh khe omlo naupaung suak cih bang om hi cih mu uh hi.

Battery naspe, Khe (lead) nasep ah akizang pha diak ahi khe (lead) le datsi le lungnosihna zatui ah kihel Binzin chemical hangin naupaaite aa ding sitawmna piangsak hi.

Naupaai laitak in kha 3 masa ah numei gai pumpi sungah chemical alut leh naupang tungah pumpi damloh na piangsak hi. Naupaai laitak kha 3 nihna leh thumna ah chemical tawh kisawh khak na hangin nau ii gol zia pen zekai thei hi. Numei agai laitakin za zuut nasep ahi puan tung leh leibel, inn za, cih chemical vanzat te kisawh khak na hangin naupang tungah Lungtangnatna ngah thei hi.

Chemical vante pen hu, tuikhu leh avui cih bang atuam tuam pan huih dikna pan in pumpi sungah lut thei hi. Zatepna pan zong tuap sungah tung thei hi. Tua ahih ciangin chemical vanzatna ah nasem na hih leh nasepna ah an nekna, zatepna cih te zang hatlo ding hi. Nasepna ah an ne leng chemical pen pumpi gilpi pan in gilzang sungdong tung zo hi.

Chemical te mihing vuntawh kisawh khak ciangin vuntungpan in pumpi sungah lut thei-in I civun pen dup thei leh zong thak thei hi. Chemical van namkhat pen sauvei zatna in zong tua chemical tawh ki tuaklohna hangin I ci thak thei hi. Tua ciangin I cidam lohna ong paing sak chemical mun ah adang khat tawh laih ding thupi hi. (Gentehna in ci ong thaksak savan vui sang adang savan vui zatna)

Guza
Mi, ganhing, an teh theipuam, mihing zat vante zusa, tho, lungno cih te pawl om theihloh nang in dalna, lopa sih theih nang, singkung lian sak nang, sing gah singteh ahoih theihnang, hun cing ma in kungtungpan kiat loh nangin guza kizang hi. Hih guza ah chemical tampi tak kihel hi. Kawlgam ah zoto kah milak pan in guza tuak mite sih atam zaw pen guza pan hi cih mukhia uh hi.

Nasepna ah guza thuak khak na hangin nasep gimna mel pan in ci vun, mit, gilpi, khuak leh lungtang, huihdiik na lampi te siatna piangsak zo hi. Guza te pen nasep hunsung zatna pan in adang hunte ah ban theihloh nangin limtak in koih ding kisam hi. Guza kihel vankoihna ahi bung, ip, thawl hawm te I paih takciangin limtakin paih ding hi. Guza pen limtak tuam, zuak, zatna pen I gam ah guza thukhun tawh kituak in hoihtak in zui leng guza ngahna pan in kidal zo ding hi.

Innsung zat zatui
Tuhun ciangin gamsungah innsung zat zatui te sumbuk khempeuh ah kingah ta in I deih hun, I deihna mun ah noptakin ki lei thei hi. Hih bangin noptak in lei theihna pen a hoih zong om a, ahoih loh lam zong om hi. Zatui khat peuh peuh I nek caingin mawk neklo in, athei siavuan khat tawh kikum in nek ding hi.

Innsung zat zatui pen tomno khat sung I natna pan ong phatuam sak in, hoih tak in zang thei leng I natna gui thei kha lo in, anasiat ciangin ki theikhia pan thei hi. Innsung zat zatui pen lamhilh sangin tam zaw leh hunsau khat sung nek ding hoih loh hi. (Gtna- Para zatang leh sungpai za). Natna nei lai ahi zongin, athak natna a om aa leh apil siavuan te tawh kilak ding kisam hi.

Zatui koihna bung, thol, te tung kiat laite limtak sim khit-teh zat ding hi. Ciangtan hun bei khinta, zatui mel kisia te hoih tak in paih ding hi. Zatui khempueh naupangte batloh na mun ah hoih takin kep ding hi.

Numei te’n nau paai lai leh nau nawipiak hun sungin zatui nek ding aneih leh asiam siavuan te tawh kilak in zat ding hi. Ei ma thu tawh zanglo in siavuan te cih bangin zat ding hi. Zatui lei tak ciangin kumpi theihpih zatui zuakna ah li in, Kawlgam ah register kibawl zatui te hoihtak sit-tel in lei dinghi.

Innsung nektheih te
Tuhun ciangin nektheih khempeuh sawt koih nop man leh neklim theih nangin color(zaa) leh limzawk theih nangin chemical kizang ta hi. Gentehna- zaa(color) zuut ahi guatuai, ngasa, kaikuang, zasan cih te a kipan aksa bang zatui sutna nei uh hi. Nahtang bang a minbaih theih nangin zatsun in um cih bangin I zak ngeihloh te kiza ta hi.

Hih bang chemical vante namtuam leh akituah zah thukhun bangin I zat ciangin a nete(consumer) damlohna pan hong kidal sak hi. Apiang tawm aa ahilo a kibawl tawm singteh singgah te guza leh leihoihza akihel singteh singgah I nek khak ciang sungpai, lua, lutangna, khuaknatna, naupaina siasak leh cancer natna piangsak thei hi. Numei te bang hih bangteng theih kul hi. Chemical tawh akihel lo nektheih te telsiam in lei aa zat ding thupi hi. Mehzaa zong inn nupi in ankam limsak lua acih hangin ei leh innkuan pih te siatna kipatna cih lam theih ding kisam hi.

Innsung Chemical vanzat
Numei agol aneu cih theih lo avek in kizeem leh kipuah nuam tek uh hi. Numei omna peuh ah kizepna om kim cait hi. Kizepna tea hi main uh, powder, muhsanza, mai nuhna, mitkhu nuhna, khutcin khecin zutna, mai nuhna cream, pumpi powder cih te ah lead leh mercury te kihel in cidamna tawh kituak lo hi. Samzutna, sam hoihna za cih te ah chemical kihel hangin tomkal sungin zong gu kingah thei hi. Samza I vulhkhak ciangin gilsung ong haal sak thei hi.

Sam zuutna ah huihtha aa kizang chemical te upmawhloh I dik khak ciangin lungtang khawl, si vat thei cih bangin piang theihi. Khau tawh kikai dailengna, kisilna buuk ah kizang ninkiatna zavui leh zatui te ah chemical gu hangin damlohna kingah theihlam ki kep kul hi.

Ih dawn tui te
Neulai sangkah na ah tui siangtho in, amel, agim neih lo hi cih I sin kha hi. Tui sungah sik, lead, florid, zin, cihbangteng tawm ta kihel hi. Tui sungah guza ahi lopa thatna, zusa thatna, singkung za cih te, nasepna phualpi, pan apaihkhiat chemical tawh kihel tui te hih leh dawnding hoihlo hi.

Tui pen hoihtak aa kihuan tui minsa dawnna in ahoih pen hi. Tuivot(ice) pen cidamna tawh kituak lo ahih manin dawn ding hoihlo hi. Tuhun ciangin tuisiangtho bung tawh kizuak te pan natna ngah cih media lam te in gen thei uh ahih manin tui siangtho cih zong lung muang om theilo hi. Kumpi theihpih etkhiatna masak mun pan thukimpih lai akihel tui siangtho te bek dawn ding hi.

Lead gu lau huaina
Innkuan pawlkhat in battery bawlna inn huangsung ah sum zonna in nei uh hi. Hih innkuan sung leh a kiim aa om innkuan pan numei leh naupang te tungah lead gu om cih kimu thei zel hi.

Lead tawh nasep sem te lead gu lau hauina nei thei uh hi. Adiak in battery leh lead huanna, leibel bawlna, lead nasep geiah om kimmkuan tung, naupaai numeite, nawipia nupi, suakcil naungek pan kum 12 nuaisiah naupang te lead gu lau huaina nasia takin piangsak thei hi.

Innsung huih niin te
Innsung meiphual pan in sing leh meihol zatna, innsung zatepna, thoza, amwe tang(gim namtui), inn gei ah ak, vok khawina tawh kinai ah teng na in, carbon namtuam tuam pusuak om hi.

Hih te hangin numei leh naupangte tungah khantawn huihdik nat, bil natna, mit natna te piangsak thei hi. Numei te in innsung leh anbuk ah midangte sangin sawt tu zaw uh ahiman in huih niin te hangin natna pan ngahloh nangin inn sungah tawlet te huih lut leh huih paikhia theih nang in bawl ding, thoza leh gim namtui te aki khak cip innsung ah haal na pan kidawm ding hi.

Thukhupna
Hih bangteng hangin damlohna ongpiang loh na ding al in in, inn sungah nisim nuntak zia cidamna ding tawh kituak in hoih tak in I nek, I dawn ding, nasepna phual aa om nasem te zong nasep ma in cidamna sit tel in, a hun zui in zong cidamna sit tel kul ding, damlohna a neih leh ahun lap in kivelna, cidamna tawh kituak nasep phual ahih theih na ding nasep nei pa leh thu neite in vaipuak lak ding kisam hi. Tua ciangin numei ten inn leh nasepna phual te ah cidamna tawh kituakin lungmuanna nasep phual leh innkuan nop ngah thei ding uh hi. Daniel Sum