Norway gam leh minam ni taangthu

Norway gam leh minam ni taangthu

A gam mun leh mual leh a teeng mite thu – Europe gam sungpan Norway gam pen gam neu hi mah leh a upa mahmah taangthu nei gam khatin ki ciamteh hi. Atlantic tuipi nisuahna tuipikam suk tengah saupi in kikhung suk aa, mual leh guam tawh ki dim hi. Nidang lai-in a gam pen vot mahmah in a vot degree -25C pan -40C ah om tawntung hi kici hi. A gam lu lam khung tengah kha (6) sung bang ni tum lo aa, kha (6) sung nisuak lo-in nivaang bek ki mu hi ki ci hi. A gam bup phial mahin, kha (6) sung vuuk in tuam tawntung hi. A gam pen khenpi (3) in kikhen aa, Saklam Gam (Northern Norway), Gam Laizang (Mid-Norway) leh Khanglam Gam (South- Norway) te ahi uh hi. Tuateng pen Ukna Gamkhen (19) in khen kik uh aa, tua nuai-ah Comunity(Myone) in khen suk leuleu in Community-myone (430) om hi.

Taanglai Mesopotamia, (Middle East), Babylon gamte pan suang tawh kibawl vante a ki zat hunlai-in sabeng mite sabetna munpi hi ki ci hi. Tua taanglai sabeng mite in suangpek tungah a gelh uh lim tuamtuamte muh ding om kawikawi aa, kum 3000 pan 6000 kiim bang upa ding hi kici hi. India gam pan hong pai India minamte teeng masa pen hi kici aa, gam tuamtuam pan sabeng mite’n hong teen behlap zel uh hi kici hi. Tu laitak-in Norway gam sungah mihing million (5) dektak bek teeng hi.

Amau ciaptehna ah, Norway gam panin ngabeng mite gunkuang tawh tuipi tungah gam mangin inn lam a zongkik nonlo tampi mah om hi ci uh hi. England gam London khuapi sunga om veng upa pen pen zong tua a gammang Norway mite tenna mun hi ci uh hi. US gam a om Red Indian a kici te zong Norway pan ki pankhia in, a teengsuak te hi ci uh hi.

A gam mipi ii zat kampau leh lai thu

Norway gam pen mual leh guam tawh kidim ahih manin, nidang hunin mun khat leh mun khat, khua-khat leh khua-khat, ki kawmna haksa mahmah hi ci-in gen uh aa, tu-ma 1960 kiim dong mahin khua khat leh khua khat, a minam uh ki banglo bek tham lo-in, a pau uh leh a aw-kaih dante uh dongin ki bang vetlo hi kici hi. Tuni dongin zong piteek puteek upa lam ten amau khua pau ciat mah uh zanglai ahih manun, norway pau siam taka pautheih ding haksa mahmah citek uh hi. Tuma-in a zawng mahmah gam hi ungh ci in kingen tawntung uh hi.

Norway pau ah Bokmål leh Ny Norsk cih laigelh dan nam (2) banah, pau tuampi khat ahi Sami minam te pau tawh pau nam (3) teng official pau/lai-in nei uh hi. Bokmål pen Denmark kumpi nuaia a om lai 1350 AD hun in Svartedanven a kici siampi khat makaihna tawh aana-a a sinsak uh hi-a, tu-in za-ah(80%) in zang hi. Nynorsk pen, lai-uk mahmah khat ahi Ivar Aasen in gamsung munkhempeuh a om kampau, awsuah leh lai kibang lo khempeuh va zin kawikawi-in va kaikhawm masa kawikawi-a, pau kammal kibang teng lakhawm kik-in a bawl hi-a, tu-in za-ah (15%) kiim bekin zang lai ding hi ci uh hi. Mangpau (English) pen mi za-ah (80%) in siam tek napi-in, amau Norway pau bekmah tawh midangte hong hopih tangtang uh hi. Pau/kammal i siam loh leh i awkaih maan lo te hong nuihsat bawl leh hong ciinbawl hetlo uh-a, hoihtak-in hong hilh kik tanghtangh zaw uh hi.

A gam uh vot mahmah si leh, zawng lai mahmah kawm si ahih manin, gam mipi te 1825 kum pan kipan US gamah na pem kipan uh aa,1846-1934 kikal sung bekbek-in zong, mi 185,000 val USA gamah pemkhia in, a vekpi un mi 250 000 val peem khia uh aa, atam pen te gamlu lam ah tung uh hi ci-in ciamteh uh hi. Tua hun laitak-in a gam uah mipi million 2 val deuh bek om hi ci uh hi. Hih hun sunga US atungte in zong, amau pau leh amau ngeina te a mansuah khak lohna dingun, Norway pau zatna sangte, biakinnte zong din tek uh hi ki ci hi. Galpi nihna hong tun ciangin Germany Hitler galkapte bawlsiatna a thuak zolo Norway gam mi tampi tak mah Sweden, England, Scottland, Shetland, USA leh Canada gam tuamtuam te ah na pemkhia lailai uh hi.

Pau leh lai lam tawh kisai-in zong, lailam lunglut peuhpeuh in amau siam bangbang tek tawh hilhcianna, grammar leh dictionary u cihte a gelh ban uah, taangthu leh laibu tuamtuam tampi a gelh uh muh ding tampi om hi.

Kumpi gam leh biakna vai

Kum 400 sung dektak mah Norway gam pen Denmark kumpi khutnuai ah om aa, kum 100 kiim mah Sweden khutnuai ah na om uh hi. Gam ki veng ahih mah bangin kizopna tampi nei uh hi. AD 500 kiim in vunkaang samkaang/mikaangte (Tuipi tunga misuam pawl Olav Tryggvason leh a pawlte ) gunkuangpi khat tawh lut in, na ki-lalsak mahmah aa, kumpi nasem hih tuak hi. Tua hun pan kipan in, mikaangte tawh na teengkhawm uh aa, AD 900 kiim pawl ciangin gam mipite tungah namsau zangin aana tawh Christian (Roman Catholic) suaksak hi ki ci hi. A kumpipa uh misiangtho St. Olav hun ciangin a omsa Christian upna (RC) pan protestant upna na sangthei ahih manin, laisiangtho siksan in Christian gam na din uh ahi hi.

Trondheim khua ah St. Olav in khuapi na sat in, kumpi inn lam hi. AD 970 kum pawla Kumpi St. Olav ii lam Nidarodomen biakinnpi zong tuni dong mahin muhtheih dingin kemcing uh hi. Tua biakinnpi sungah St. Olav leh Christian makaipi mi 300 valte luang kiphum hi ci uh hi. Biakinnpi sungah i va lut ciangin zong zing ngemngam in lipkhap huai mahmah phial hi. Biakinn kawm khempeuh pen vantungmite lim leh nungzui-pite lim banah Christian makaipite lim tawh ki dim sak zihziah hi.

Christian kumpi gam ahih mah bangin, Christian hihna sungah pawlpi sia (Priests/Pastors)te theihpihna pen kumpi zumpi te ah thupi sak mahmah uh hi. Dan tawh kisai thu ah zong Christian makaite in a theihpihna lo-in thukhensat lo uh hi. Khristian kumpi gam (Khristian Kingdom) a hih mah bangin a gam kumpipa (King of Norge) pen a lutangpi uh hipah hi. Pasian thu lam tawh kisai nasepkhiat na-pen bishop lian pen (Chief of Bishop-Lutherian) ii vaihawmna nuaiah koih leuleu uh hi. Kumpipa in gam ki-ukna lam nasep zong khoihpih tuanlo leuleu-in Prime Minister i vaihawmna leh makaihna nuai-ah koih leuleu uh hi. Kumpi pa in zindo leh mipi vaihawmte thukhensat te minthuhna tawh kipsak bek hi. A gam khen Community (District/Myone) ciatin amau thahatna leh hihtheih na zahtek tawh ki vaihawmna leh ki-ukna thuneihna tuam nei ciat uh hi.

Norway Gam mite Taanglai Upna te

Norway ah Christian upna a na tun ma-in, Norway mite in dawi namkim na bia uh aa, sa sisan leh ganhing meihal biakna tawh kithawihna te na zang uh hi. Misi kha leh dawite tawh zong na ki ho in na tengkhawm thei zel uh banah nabia zel uh danin gen uh hi. Dawi leh kau, dawi nungak leh galkhawhang i cihte zong na lim gen mahmah uh hi. Zomite ii tangthu-a i neih Peng Lam thuciin cih dan zong na nei ve ve uh hi. Dawite sung pan a lianpen pa pen Gammel Erik (Satan/ Magi/ Djevel) ci uh aa, tua Erik in tapa khat nei in a min pen Margido hi ci uh hi. Margido dawimangpa tapa pen leitung tuikulh khat ah teeng aa, ahi zongin tua tuikulh koi ah om hiam cih ki thei lo hi ci uh hi. Dawi mangte lak pan a tha- hatpen khatpa min Trod ci uh hi. Trod in vantung ah kel leng a kaih ciangin vanthuum aa, a galhiam keek leh khuaphe hi ci uh hi. Tuni dongin tua upna anei zong khat leh nih om lai veve hi.

A gam mite nekzonna leh a gam hauhna te thu

Atlantic tuipi ah ngasa tam mahmah aa, Europe gam khempeuh pan ngasa man te ngunkuang tawh tung tawntung uh ahih manin, ngasa tawh sum kizuak sum kilei-na munpi suakin gal tam mahmah na mun suak aa, pasal kisa-a sum bawl khualzinte leh misuam thei (damiah) migilo te kisuam ki thahna munpi suak hi ki ci hi. A gam laizang Røros kiim ah Tausan sik (Copper=Cu) piang ahih manin Europe gamtuamtuam buaina galpi khatna (WW – I ) kiim ah, gam tuamtuamte in galvan thauvui thautang dingin tausan sik a lei na munpi uh zong ahi hi. Tu ni hun dong mahin a galvante uh tawh gamdang pan sum million tampi lalut tawntung lai uh hi. Tua ahih manin, Røros khua pan a nai pen Tuipi dawk kianga om St. Olav kumpi inn lamna Trondheim khuapi ah AD 970 kum pawla kilam Kumpipa biakinn Nidarodomen kiangah a gam hauhna leh a galvan sen na munte uh zong tuni dong mahin muhtheih dingin kemcing lai uh hi. Kumpipa in biakinnpi saklam mualdawn ah galdalna kulhphualpi khat zong thaupi ii pailet zawhloh dingin suangtum tawh lam aa, tua kulh sungah zong a neihsa hauhna leh galvante banah a mipite zong galte khoih phakloh dingin bit takin kemcing hi kici hi.

Ngasa tawh kisai-in Europe gam khempeuhin a leina phualpi ahih mah bangin, ngasa zuakna innte tuipi dawk kam-tengah kizom dimdem in lam uh hi. Gamdang sumbawl mite’n haza mahmah ahih manin tua ngasa zuakna innte halsak sim tawntung uh hi ki ci hi. Tamveipi Trondheim khua sumzuakna innte kang ngei hi ci-in ki ciamteh hi. Saklam Gam Lufuton a cihna Atlantic tuipi kam munkhat pan-aa a mat uh ngasa namkhat (Luktefisk a cihte) pen Leitung saklam tawppen Northpole lam pan kumsim-in a tui dinga hong tuaksuk hi aa, ngasa dang khempeuh sangin lim phadiak hi ci uh hi. Tua ngasate pen kumpi pa inn omna Trondheim khua leh Bergen khuapi te-ah khol-in Trondheim leh Bergen khua te pan-in gamdang mi sumbawlte tungah na zuaksawn zel ahih manin, sum tampi a laklutna leh a gam kivaakna pi khat hi ci-in ki ciamteh hi.

1960 masiah khempeuh, nektheih an piang tamlo banah, sumbawlna lam gamsa leh ngasa bet tawh kivaak pen uh ahih manin, thunei kumpi leh thatang hat zawdeuh mipawlkhat teng a hauh tei uh hangin mipi kial thei tawntung kisa lai-in, zawng na kisa mahmah ngei uh ahi hi. Tua ahih manin gamdang ah a peemkhia tam mahmah ngei ahi hi.

1968 kum ciangin, Italian tangval Massimo (Max) Melli kici kum (28) mikhat makai-in French mi technician khat leh Dutch mi technician khat tawh, namgimtui leh gas piang ding hi cih um ahih manun a etsin uh leh na om takpi hi. Tua namgimtui leh gas te pen Phillips Petrolium Company te nuaiah Franch Geoservices tawh semkhawmin na tokhia masa uh aa, kum (10) khit ciangin, Norway kumpi controlna nuai-ah koih uh hi. Tua hun pan kipan in kumpi gam sumtha hong hat mahmah aa, a ni a ni-in hong khangto thei ta ahi hi.

Kumpi-in sum hau mahmah a hih manin, gamdang khempeuh ah sum put piakna leh company tuamtuam a din kawikawi thei ta uh hong suak hi. Tu laitak dinmun ah namgimtui leh natural gas tawhkhiatna bek pan in zong, nikhat in US$ million(14) man namgimtui leh gas ki tokhia in ki zuakkhia thei tawntung ta hi ci uh hi. Gamlu lam ngasa tamna Lufoton mun tengah leh gam lu dawnzang a om Russia tawh gamgi tuipi nuaiah zong tu-a a tawhna sa mun sanga tamzaw namgimtui om hi cih mukhia uh-aa, a hih hangin tu dinmun-ah gam in haksatna buaina ding lua bangmah neilo ahih manin mipi tamzaw deihna mah tawh siit bawl khinkhian lai uh ahi hi.

Tua a hih manin Norway gam in Atlantic tuipi sunga ngasa teng a bei mateng-in anngawl lo ding aa, namngimtui leh gas a kizuak theih laiteng-in sum ki tangsam lo ding hi cih mihing lampan suutna ahi hi.

Pilna sinna Sang leh Laisinna Lam thu

Norway gama om mi khempeuh in kum (10) sung laisim hamtang ding uh hi ci hi. Thu haksa khat peuhpeuh hangin tua kum (10) sung laisim theilo a om leh, tua mi te-in zong ninpaih, anhuan, innsungkep, sagawh sa-at/sasem, kuangsawp, lokhawh, singpuak, munphiat, limsuaih… cihte a kipan khutsiamna khat peuhpeuh sin teitei ding uh aa, siamsin takpi mah hi, semthei takpi mah ding hi- cih theihpihna lai (diploma certificate) ngah hamtang ding kul hi ci hi.

Norway pau athei lo gamdangmi hong lutte in pausinna sangah ama teltheih pen ding pau khat peuhpeuh tawh a tawmpen in, Gam thukhun Dan Taangpi thu naikal (50) sung sin hamtang ding uh aa, Norway pau leh mipi nuntakkhop dan leh nuntak zia ngeina tuamtuamte zong naikal (250) sin hamtang ding uh hi. Norway pau pen naikal (3000) ciang a ut te’n kum (5) sung a free in sin thei hi. Tua Norway pau sinna a kahlo peuhmah in bang degree sangpen a nei khinphial zongin, Norway gam mipite hamphatna te ngah kim thei lo dinga, zong ki pia ngeilo ding hi ci lian uh hi.

Kum (6) a cing nailo naupangte kepna sang (barnehage) thupi ngaihsut pen aa, kum (6) tungsiah naupangte sang (barneskole) pen (taan 1 – 7) ciang sang tuam khat, taan 8 – 10 ciang naupang sang (ungdomskole) leh, tua ii tungsiah ah adang kum (3) sung subject tuam la-aa kahna (Vidregåendeskole/Pre-University) sang cih bangin nei uh hi. Tua ciang teng pen a kah khempeuh a free in ki kahsak ahi hi. Tua teng hoih taka a zo te University ah amau subject lak tawh kizui-in kum 2/3/4 ciang kah zom kik thei uh hi.

Tua a zawh uh ciangin High School (Høyskole) ci-in kum (2) ki kah kik thei hi. University leh High School (Doctrate / Phd.) kah te in kumpi sum pu thei ta uh aa, laisim nuam laisiamte adingin haksatna omlo takin pilna kisin thei cihna ahi hi. Amau High Scool zo cihte leh ei High School zo cihte dinmun kikhai mahmah hi. Tua hi aa, zum khat kipawlna khat peuhpeuh ah makai lam asem ding peuhmah in tan 10 a zawh khit teh a tawmpen in kum (7) sung ama nasep tawh kisai pilna/siamna lam sinna sang a kah khinsa ahih kul hi. Tua bang ahi zolo mite pen makai in ki koihlo pah uh aa, ama khutsiam leh sepna theihpihna (service experienced) tawh kizui-in nasem khatin zangthei uh ahi hi.

Lai sinlo, lai sim theilo leh lai-at theilo a i om leh set van vive zatna mun ahih manin, innsung na sepding nangawn asem taakding ki hi lo aa, nasep haksa mahmah hi cihna ahi hi.

Gam Kikepna, ki ukna leh ki huutna te thu

Gam leh a mite kepna huutna dingin Dan thupi sak pen hi. Gammi hihna anei kum (18) a cing khangno khempeuh in kum (2) sung peuhmah galkap kisin, ahih kei leh mipi huhna nasem, ahih kei leh gamdang khat peuhpeuh ah missionary kuansak hamtang uh hi. Galkap siamna a sin te’n amau mimal ukna tawh kizui-in gamdang ah UN galkap sem suak thei uh hi. Galkap a sin sungin thau namkim zatdan a sin ban uah, vanleeng, tembaw hawlte dongin leitung tui sung leh vanlam galkap nasep khempeuh sinsak pah uh hi. Tua ahih manin gammi a tamzaw galkap ki sinsa leh asiam sa vive ahi hi. Thau leh hiam tawi ding peuhmah, sabeng nuamte dongin muikap siamna kumpi lam thuneite sittelna leh theihpihna lai a neih kei nak leh thau tawi theilo in, zong lei theilo pah hi.

Tu-a a zat uh Norway gam thukhun Danpi (Constitution) pen May 17, 1814 ni-in hong gelh zosiang ta uh-a, Eidsvoll ah enkhawm in thukimna leh kipsakna bawl uh hi. Ahi zongin tua thukhunpi a zangpah thei hi nai tuanlo uh ahi hi. Tua cibanga Norway gam thukhun Danpi hong gelhzawh hun lai tak mahin Norway leh Sweden pen galpi khatna ah gal hong ki do uh hi. November kha ciangin Sweden gam kumpi pa pen Norway gam ii kumpi pa mah hong suak bek thamlo, gamdang tawh kizopna lamah Sweden ukna makaihna nuaiah hong om hi. Norway gam in amau gam kumpi leh gamsung vaihawm ding mipi kiteelna tawh a tuamin parliment zong a nei uh hong suak hi. Tua lai takin Sweden gamin ahih leh ki-ukna parliament nei lo-in kumpi ukna khat bek nei uh hi.

Tua hun lai tak-in Norway gam pen Denmark gam kumpi ukna khat nuaiah kigawmkhawm in Union khatin om lai ve ve uh hi. Galpi khatna a belpawlpih uh gam Piantit (France) galsiam makai pi Napoleon in gal hong lelh tak ciangin, Denmark kumpi tawh hong kiho-in Norway gam pen galzo pawl ahi Sweden gam khutnuai ah hong piakhia hi. Tua laitak-in Sweden gam pen England gam kumpi tawh ki belpawl ahi hi. Sweden kumpi in Norway gam ii thukhunpi hoihsa mahmah ahih manin, Norway gam mipi te zong Danmark kumpi gam ukna nuai-a om sangin suakta kisa zaw uh aa, nuamsa zaw thamtham uh hi.

Hih kum zalom 18 sunga Europe gam buaina sungah, Norway gam zong kum 500 sung midangte ukna nuai-a om pen haksa genthei kisa mahmah uh ahih manin, amau leh amau suakta taka ki-ukna gamkhat din zawhna ding kul sakna tawh hanciamna lianpi hong nei uh hi. Peter Christen Asjørnsen leh Jørgen Moe te in zong gamsung gampua mun tuamtuam ah zin kawikawi in, thu omdan thuthak khempeuh va kan kawikawi uh hi. Hici bangin a hanciam laitak mahin 1884 leh 1887 kiim pawlin, gam leh minam nasepna ding taklam pawl (Høyre parti ) leh veilam pawl (Venstre parti) ci-in minam sungah party kipawlna nam nih hong dingkhia uh hi. Taklam pawl pen pilna a thupi sak phadiak pawl hi-aa, Veilam pawl pen nasep a thupi sak phadiak pawlte ahi uh hi. Tuni dong mahin hih pawl (2) te mah a hat pen hi-a, tulai takin Veilam pawl (Nasem te kipawlna) in ukna a lak laitak uh ahi hi.

Gam suahtakna leh ki-ukna hoih a neih theihna ding hanciamna ki zom toto pen June 7, 1905 kum tak ciangin, suahtakna picing hong ngah uh ahi hi. Norway kumpi ding atuamin hong vaihawm sak in ci-in Sweden kumpi pa kiangah palai sawlin a va nget uh ciangun, Kumpi pa tapa Carl, a zi England kumpi tanu Maud leh a ta uh Alexander tawh Norway kumpi dingin na pia pah hi. A kumpi min Haakon VII, a tapa min Olav cih bangin phuah uh aa, Kong Haakon VII pen 1957 kumin si hi. Galpi nihna hong pianga, Germany gam in April 9, 1940 ni-in Norway gam hong la-in, hong ukcip tak teh, June 7, 1940 ni-in Norway kumpi innkuan leh gam uk thunei teng England gam London khuapi ah galtai in va om uh hi. Galpi nihna hong bei May 8, 1945 ni-in Norway gam in zong suahtakna hong ngah-a, June 7, 1945 ni-in kumpi innkuan leh gam ki-ukna thunei pi teng amau gam leitang tungah hong ciah kik uh hi. Tua kum mahin UNO kipawlna ah hong lut pah aa, Norway leh gamdang kizawpna minister Trygve Lie in UN Secretary masa pen sem hi.

1949 kumin Norway pen NATO kipawlna ah hong lut aa, 1952 kum in Oslo ah Leitung bup nasem mite kipawlna (Vinter-Organisation of Labour) kikhawppi bawl in innteek sem uh hi. 1969 kum pan namgimtui tokhia uh-a, Norway gam ii sum ngahna lianpi khat hong suak hi. 1972 kum-in Europe gam teng kipawlna (tu-in EU kici ) ah lut ding lutloh ding Norway mipi te in vote hong kilak uh leh, mipi vote a tamzaw 53.5% te ut lo ahih manin, tua pan kipan tuni dong EU kipawlna ah lutlo suak hi.

1975 kum-in mipi teelcing kumpi gamvaihawm te-in gamdang pan pemta mite kuamah sanloh ding ci-in geel aa, ahih hangin a hun tawh kizui-a et zel dingin koih uh hi. 1978 kum-in numei naupaite in haksatna khat peuhpeuh hangin nau a phiat nop uh leh anau paai nipi kal 12 (kha 3) a cin ma-in phiat thei dingin phalna danpi sungah thunlut uh hi. Numei te zong pasal tawh kibang mahin nasem thei, thunei thei bek thamlo in kiteelna ah lut thei ding hi ci-in danpi sungah thunlut uh aa, 1981 kum-in Gro Harlanm Brundtland in State Minister Gam vaihawm makai lianpen dingin, amasa pen teelcing khatin hong om hi.

Kumpi Olav-V pen 1991 kum-in si aa, 1994 kum in Leitungbup nasemmite kipawlna khawmpi Lillehammer (tu-a JKKam te omna) khuaah bawlin Norway innteek sem kik uh hi. Hih kum mahin EU kipawlna ah lut ding lutloh ding mipi vote la kik uh aa, mipi vote tam zaw 52.2% ut nai tuanlo ahih manin, lutlo tosuak phot uh ahi hi.

Tulaitak mipi sung nuntak ki-ukzia leh kei muhdan

Mimal khat leh khat kikal ki lang bawlna, nupa kikal kilem lohna, innkuan sung kilem lohna, vengsung kilem lohna, cihte in mipi nuntak khopna dongin haksatna a tawm a tam-in tun/piangsak ahih manin, hici bang haksatna nei takpi hi cih thu, amau tektek in ahih kei leh a veng a paam, a mu khat peuhpeuh in, report a piaktheihna dingin kipawlna leh kizopna tuamtuam koih uh aa, nakhat semkhial-in i veng i paam khat, mikhat peuhpeuh nawngkai sak kha leng, mun khempeuh kiu khempeuh pan hong ki encik in, palik zumah i tungtang thu khempeuh record sa-in ana tung pahpah ahi hi.

Tua ahih manin zu ne nuam zukham nuam in nethei khamthei aa, khutkhiat genloh awging bek nangawn tawh i veng i paam i innkuanpih i zi i ta khatpeuh i buaisak khak zenzen leh eima mailam khempeuh a bing ding cihna hi lel hi. Thumaan ahi aa thumaan lopi khat ahi phial zongin, midang khat peuhpeuh thu, i zi i ta, i pasal siatna phatna thu nangawn ah, i gen ding nu/i gen ding pa phalna ngah masa lo-in i gen khak leh lampi maan a tawn ki hilo pah aa, dan in phal lo ahi hi. Ei Zomi, Kawlgam mi leh gamdang mite sungah, hih Norway gam leh mipi te ii zuihding danpi leh ngeina thukhunte a zui siam ding ki haksa mahmah lai ding hi ci-in ka ngaihsun hi.

Mihing leh mihing ki-ukna gam hi lo aa, dan ii ukna democracy gam ahih manin, dan nuai-ah a lian a neu, a bu a mang, a zawng a hau, a pil a siam, numei pasal cihdan-in ettuam, guptuam, paihtuam nei lo-aa, ki pawlneihna ki langbawlna omlo ding cih ahi hi. Dan tawh ki-ukna ah, kumpi pa nangawn a thumaan kei aa, a gamtatna ki lawmlo hi, khial hi ci-a amu oma, a lungkim kei nak leh thu a bawl thei hi zen hi.

Mi khatpeuh in a maan lo pi-in thugen/thubawl i hihkhak leh bel, ama tungmah ah hong ki tusak kik dinga, amahmah a thuakding hipah hi. Tua ahih manin, tu-in leitung ah nuntak khuasakna a nuampen, mite a suahtak na pen, a gam mipi tawh kizui-in a haupen gam suak aa, mihingte ngahding hamphatna leh nuntak bitna, daihna, lungmuang khamuang taka nuntak theihna, human rights tawh kisai dante cingtak aa a ki zattheih penna gam zong hong suak thei ahi hi. Muslim Hindu leh Buddhist a kipan biakna tuamtuam te’n zong suakta takin amau upbang sanbang tek un bia thei uh ahi hi.

Zomi te in i ciin mahmah ahi, ei deih mikhat/biakna khat peuh i pumphat ngawpna, ei deihloh mikhat/ biakna khat i pum gensiat ngawpna te zong tualthahna/min kithahsakna hi-aa, leitung mihing te ii ngahding hamphatna suahtakna human rights i palsatna a hih lam i phawkding deihhuai mahmah hi.

Tua hi aa, Zomi ten i gam i minam dinmun leh cisa tawh nasep malaak nading te ah i etteh theihding tampi om kha ding hi cih ngaihsutna tawh, phattuamna khatpeuh a om khak leh ci-in, hih lai hong gelhkhia ka hi hi. A kicing lo leh laimal laingual gelhkhialh na cihbang a om khak leh, hih mun ah gelhkhial kha ai ve maw ci-in, nomau laisimte mahin a maan pen dingin na puahphat sak zaw mai un.

Rev. Thang Khan Thawn Suante
(Pastor Solomon Thawn)