I thuphate sim dih ni, guai! ~ Rev. Khup Za Go

I thuphate sim dih ni, guai! ~ Rev. Khup Za Go

I gam i lei haksatna, i minam ginatlohna leh kicinlahna, tuahsiatna leh gentheihna i sut ciangin gui cing mahmah cih thei ciat hang. Tua kawmkalah kei pumpi mahmah tawh Chin State, Mizoram State, Manipur, Assam, Nagaland, Meghalaya leh India gam mun tuamtuam ah ka zin suk ka zin tohna panin leh i minampihte tawh ka kithuah, ka kikholh leh ka holimna panin ei Zo suante pen a hampha, a kampha, thupha a ngah minam khat hi gige hang ci-in ka ngaihsutna, ka muhna khat om hi.

I tenna, i giahna leitang kimat, kizom diudeu hi. I pu i pate pen China gam pan Kawlzaang ah lal masa hi. Pawlkhat Kawlzaang ah om denin, pawlkhatte pen khat khatin nitumna lam khamtung gam, mualtung ah lalin Mikang kumpi hong khan ciangin tu-a i omna Chin State pan India nisuahna gam leh tu-a Bangladesh gam sunga Chittagong Hill Tract kici leitang dongin i lal hi. Kumpi uk thum – Kawlgam, India leh Bangladesh ci-in i gen daudau hi. Kawlgam sungah zong Thayetmyo, Magwe leh Sagaing Division leh Chin Hills ah i teng hi.

India gamah zong uk khatin om loin Mizoram, Manipur, Nagaland, Assam, Meghalaya leh Tripura State te ah i kikhen hi. Tua bangin kumpi uk tuam ah hong kikhen tham loin uk khat sungah zong state tuam leh district tuamtuamah a kikhen zelzul bang i hih hangin gamlim sungah en taktak lecin i leitang luahna gam pen a kizom diudeu, a kinai ciltel hi cih na tel pah ding hi. Tua bangin uk tuam leh state tuamtuamah i om hangin i gam i lei kizom, kipeh, kinai kawikawi bilbel a hih manin minam khat i hihna mang loin, ci khat nam khat i hihna kitel mahmah hi. Kihawh kikawmna baih hi. I lal kawikawi hangin i minamte omna mun mahah i lal veve hi.

Tua banah khanglui lai hun bang nawn loin tu hun ciangin mawtaw, tembaw, vanleng, meileng lampi hong hoihzawta hi. Gentehnain tu ciangin India gama Zomite omnateng pha kawikawi nuam hang ci lehang vanleng tawh zong Imphal (Manipur) pan Aizawl (Mizoram), Silchar, Guwahati (Assam), Dimapur (Nagaland), Agartala (Tripura) leh Shillong (Meghalaya) pai theih kawikawi hi. Bus tawh zong kipai thei kawikawi a, meileng tawh zong a kipai theihna mun tam mahmahta hi. Kawlgam sung bekbekah zong Tedimte pen Shan State ah, Hakate pen Karen State ah, Falamte Mon State ah, Matute pen Kachin State ah cih bangin i gam kipeh loin tang ten kawikawi kha zen peuhmah hi lehang tu sangin i zawmzaw lai ding hi.

India gamah zong Luseite West Bengal ah, Hmar te Punjab ah, Paite Tamilnadu ah, Thadou Kerala ah, Marate Madhya Pradesh ah, Zoute Kashmir ah cih bangin mi nam dang kawmkalah kikhen zelzul peuhmah hi lehang tu sangin i kituam-etzaw tham lai ding hi. Tuin teng khawm diudeu i hih manin khawmpi pai khawm thei, sang kah khawm thei, zum kah khawm thei i hih manin kimuh nawhin nungak tangval zong kingai-in, zi leh tain kilain, sung leh puin kiman ciltel i hih manin Zo suan i hihna kip semsem hi.

Leh gen ni cilehang mawtaw, meileng, vanleng, tembaw cihte zang sese loin Pasian hong bawlsaksa i khe, i keng tawh Kawlgam pan India kitung thei ziauziau lel a, Mizoram pan Bangladesh Chittagong Hill Tracts pen khe mah tawh i kawm ziauziau thei lel hi. Gunkuang leh tembaw tawh Kikkoman zong kumpite in a sawt loin bawl ding hi ci-in i za hi. Ngaihsunsun lehang a hampha gige hi hang a, Pasian’ thupha hi cih lohngal gen ding peuhmah om lo hi.

I minam ngeina leh gamtatzia leh nuntakna kibang hi. Minam khat i hihna tawh i tenna i giahna leitang kizom a hih manin uk tuam, state tuam leh district tuamtuamah i kikhen hangin i inn bawlzia, i lokhawhzia, i puansilh leh gamtatzia kibang kawikawi hi. I an huanzia, i meh bawlzia kibang hi. Tang laiin mim, tang, leh vaimim cih khang a ne ngei ciat i hi hi. Tu khang ciangin buhsih vive mah i ci hi. Zo suante pen Kalate banga puri/roti an-a heng i om kei hi. I tangthu, i tangla, i minam pawi leh laamte kibang hi. Khuado, Pawl Kut, Chavang Kut cih bang kinei kawikawi hi.

Lusei, Thahdo, Hmar, Simte, Gangte, Vaiphei, Falam, Halkha, Kom, Biate, Hrangkhol, Chiru, Lamgang, Ngawn, Mara minam sungah Peng Lam tangthu, Gal Ngam tangthu, Dawikungpu, Lian Do leh Thang Ho, Cing Khup leh Ngam Bawm tangthu cih bangte i nei kim ciat hi. Kawl, Karen, Shan, Assamese, Bengali, Punjabi cihte khawng in hih tangthute na nei het lo uh hi. I tangthu, i tang la leh i thuciin hong kibat ciangin minam khat i hihna kilangin i ki-itna, i kingaihna zong hong khangsak hi.

Khanglui biakna, upna, kithoih kipaaina a kibang i nei khawm minam i hi hi. Asho, Khumi, Tedim, Khalkha, Falam, Kanpetlet, Lusei, Hualngo, Hmar, Ralte, Biate, Komrhem, Mara cih bangin a mun leh a gam zuiin kampau leh awsuah paulamin i kituam gen teitei hangin i biakna, i upna, dawi leh kau cihte i ngaihsutna kibang kim hi. Tua a hih manin nitumna gam panin Khristian biakna thu, Gospel khuavak a hong kipuak ciangin zong i sang thei pah leuleu hi. I kiim i pamah minam tamzaw tham Buddhist, Muslim leh Hindu cihte in hong lawhkha lo hi. Tua bangin khanglui laiin upna biakna nam khat sungah om khawm i hih manin biakna hangin nawngkaina leh buaina kituakkha ngei lo hi. Tu hun khang ciangin zong i minam leh gam buppi phial maha Khristian upna, zuihna leh Lai Siangtho khat len khawm diam leuleu i hihna hangin ki-itna, kilomkhatna lianpi piang hi.

Biakna dang Buddhism, Islam, Taoism cih bang a zui i om kei hi. I gamah Lai Siangtho siam i siate Pasian thu peuh hong kisel theih ciangun a kilem lo, a kituambawl peuh i sak leh tua na hi deksuai loin Lai Siangtho a theizaw ding, a telzaw ding a kidem peuh na hi lel uh a, Lai Siangtho thu nutsiat sawm lam na hi peuhmah lo uh hi. 1960 pawlin Zangkong ah ka om laiin Hindi film khatah Muslim upna leh Hindu upna tawh kituak lo thu kihelkha a hih manin Kala leh Kala mah nakpi-in hong huai henhan uh hi. Minam khat hi napi biakna upna a tuamna hanga kisia hi dih zen uh hi. Zomite pen i veka lawki a hi kimlai Khristian biakna ah a kilumlet khin phial bang hi leuleu i hih manin i kamphatna lian hi. Pasian mahmah vaihawm siam sa zungzung ing a, a phunphun, a nuaknuak dingte hi loin Topa a phatphat ding bek mah hi mawk hang.

I kammal zat pen kihualin, i kampau kinai mahmah hi. Khalkha khua, Aizawl khua, Lamka khua leh Haflong khua-a khangkhia Zo suante pen ni nih, ni thum om khawm, tengkhawmin, kikhawl peuh leh kampau kitel pah lel uh hi. Tanglaiin kampau nam khat a zang ngeisa hi hang a, tu-a mual leh guam in tawmtawma a hong halna hanga kilamdang lel i hih manin i om khop ciangin olno takin i pau i ham i kitel pah lel hi. Khanglui lai hun bang nawn loin tu khang ciangin kikawmna kimatna hong tamta hi. Lampi hong hoih, kikawm kiphakna hong olzaw, hong tamzaw, laipai sim thei ciat kihi simta hi. Tu hun khangnote pen Kawlkam, Kalakam leh Mikangkam nangawn a siam pian vive hong hi ta a hih manun Zopau khat peuhpeuh pen olsa mahmah lel uh hi.

Nidang hun banga r lo thei lo, f lo thei lo, g aw ngah lo cihte pen om nawn lo hi. Tua bang a siam lote pen a khing lua kici lel hi. Ka zin kawikawina lamah Tedim mi Halkha pau siam, Falam mi Lusei pau siam, Hualngo mi Ngawn pau siam, Hmar mi Thadou pau siam, Vaiphei mi Paite pau siam, Gangte mi Simte pau siam, Biate mi Darlong pau siam, Cho mi Asho pau siam cih bang ka mu kawikawi hi. Delhi-a ka lawm Ning Ki bangin Tedim pau a siam bek hi loin Saizang pau nangawn a siam lai hi. Hih bangin khat leh khat Zopau kithei tuah, kizang tuah thei kawikawita i hih manin kampau vaia buaina cihte pen a hun tawh kituakin hong bei lel ding hi. Ka meltheih ngei Lusei khat Lalbuaia kici in Tedim pau siam lua kisain zo la, zawlna awi thei a, dawithoihna phuisamna teng zong thei khin hi. Hnahlan khua Paite tangval nih vai ciah zong khua mual a tun ciangun Lusei pau vive tawh kiho ahih lam uh thei pan uh hi ci-in kigen hi.

Khanglui lungsim kipua nawn loin tu hun khangthakte in Zo mi khat leh khat pen pau kisin tuah ding a kulna kitheita hi. Khristian lungsim man tawh a ngaihsunte in lah Pasian hong piak kampau khawng kisimmawhsak, kideidanna peuh suahsak cih pen Khristian vai lo lua, kha vai lo lua kisa ciatta hi. Mi piang thak ahi Mikang misawnarite i Zogamah hong pai uh a, i Zolai, i Zo pau hong puahsak uh a hih mah bangin ei zong Jesuh Khrih sungah a piang thak, Kha Siangtho tawh a dim hi’ng a kicite in pau khat peuhpeuh pen theih sawm ding, siam sawm ding kisam hi. I siam loh pen zumhuaizaw bek hi. Pentekoh ni bangin suakta takin zat ziahziah ding hi lel hi. 1960 pawlin Halkha mi Sia James Sangawi in Zangkong khuapi panin Tedim pau, Lusei pau leh Halkha pau tawh Nipi sim thukizakna khat hawmkhia ziahziah hi. Hih bang lungsim pua thei ciat lehang Zo suante in tang kam i cihcih pen hong piang pah ding hizaw hi.

I minam buppi in Mikang laimal nam khat zang i hih manin hamphathuai lua hi. Kawlgam, India leh Bangladesh gam dong takin laimal kibang Roman Alphabet zang i hih manin kampau i zat ngei loh nangawn zong Lai Siangtho leh la bu pen laimal kibang tawh kigelh, kikhen a hih manin i sim thei pah lel hi. Kawlgamah Zomi Baptist Convention pawlpi sungah kampau nam tampi kizang hi. Ahih hangin gambup khoppi vaihawm ciangin lasak dingteng Halkha, Falam, Tedim cih bang tengkhia uh a, tua pen kisa thei ciat lel hi. I kiho pah thei loh hangin la pen kisa thei pah lel hi.

Minam khat a hih hangun Bodo minamte pen Assamese laimal a zang pawl leh Roman laimal a zang pawl ci-in pawl nih kisuah uh a, nakpi takin kisia ngei uh hi. Tu nai diakin Meiteite zong Bengali laimal leh Meitei Mayek a deih pawl cih bangin pawl nihin kikhenkha uh a, kumpi vaihawmte nangawn in haksatna tampi tuak uh hi. Zosuante in Roman laimal Zolai suaksakta i hih manin tu huna computer a hong kibawlkhiat ciangin zong nawngkaina om het loin USA, UK, Japan leh Thailand a om Zo mite leh Zogama omte pen manlangin lai i kikhak ziauziau thei pah hi. Zo suante pen innkuan khat i hih mah bangin laimal nam khat zang i hih manin a hampha lua hi hang.

Lai Siangtho nei minam i hi pha diak hi. Leitungbup Lai Siangtho Nasepna lam a saite in leitung kampau khempeuh tawh Lai Siangtho tei ding a hanciam uh hi. Tua pen Pasian thu in leitungbup a zelh baih nading ngaihsutna hi. India gamah kampau 1652 val om ding hi ci-in ki-ummawh hi. Kampau khat a zang mihing tulza tampipi a pha nangawn in amau pau tawh Lai Siangtho a ngah zawh loh laitakin Zo suan sungah kampau khat zang tulsawm ciang khawng bek a pha kampau nangawn tawh Lai Siangtho bup kitei a, kikhen hi. Zopau sawmnih val tawh Lai Siangtho kitei a, kikhen khinzo hi. Pasian in Zo minamte pen Ama gam nasem ding, misawnari nasem dingin a hong puah nuam diak khat a hi ding hiam cih hong ngaihsunsak hi.

Laipil minam i hi hi. Tanglaiin Zo mite in lai nei ngei a, tua pen savun tawh kigelh a hih manin ui in tuah mangsak hi ci-in tangthu kigen hi. Mikang kumpi hong khan tawh kitonin nitumna gam mah panin Pasian nasem misawnarite hong tung pah hi. Amaute tung panin tu-a i zat Roman laimal pen i ngah hi. I ngahna pen a sawt lama i gen ciangin kum za khat cing pan hi. Tua hi napi-in Zo minam pen laipil, lai siam minam cih theih ding zahin lai lamah mai i nawt hi. Mizoram pen India gamah lai sim thei, lai gelh thei ciangciang ciamtehna ah nambat nihna hi kici hi. Tua bangin Chin State zong lai pil a tamna, sang lam a khangto gama kigen khat hi zel hi. Manipur gam mualtunga om Zo minamte zong lai lam a hahkat, lai pil minam kisuak a, tua hangin kumpi nasepna Manipur pua Shillong, Guwahati, Kolkata, Bangalore, Mumbai, Delhi cih bangah tampi tak i om hi. Thupha ngah minam i hi gige hi.

Hih bangin i ngaihsut ciangin thupha ngah minam i hihna pen gen ding tam semsem hi. Nasep silbawl a hahkat, a citak, a takkhah, a phincil, “hawm sem nungta, nebum si” ci-a a cingh, “zuau in a khap tawn” ci-a zuau a gen nuam ngiat lo, thu manpha leh la manpha a kemcing ngiat minam i hi hi. Tua hi a Topa in leitungbup ah Ama khuavak a tangsak dingin Israel minamte a teelkhiat bangin Zomite zong Ama vangliat nading leh minthan nadingin a hong teelkhit minam khat hi ding hi hang ci-in ngaihsut theih hi. Pasian in a hehpihna tawh Israel minamte a teel hi a, amau a piltuam, a siamtuam cihna hi lo hi. Ahi zongin Israel minamte in a kisaktheih ciangun Pasian in a zat theih loh bangin ei minamte zong Pasian hong hehpihna phawk lo-a ei leh ei khawng kingik, kitawng, kigensia-a i om khak loh nadingin thungenin i kidop ding kisam hi. I thuphate sim dih ni, guai! Khup Za Go