Kawlgam ah H1N1 Flu natna tawh asi mi 13 phakhinta

Kawlgam ah H1N1 Flu natna tawh asi mi 13 phakhinta

Kawlgambup ah H1N1 natna hangin asi mi 13 phakhinta cih Myanmar’s Ministry of Health and Sports te’n nung Wednesday ni in tangkokhia uhhi. Wednesday ni ciangciang Kawlgambup ah tuapsung damlohna “respiratory tract infections” hangin zato alumpen mi 284 phakhin ci hi.

Tua tuapsung damlo in zato alum mi 284 te lakah mi 99 tepen H1N1 natna angah ahihlam kiciankhin a, tualak ah mi 13 asikhin cihi. H1N1 natna angah te ii Fatality Rate pen 4.5% kici hi.

Ministry of Health and Sports te’n Kawlgambup ah H1N1 natna akilawhloh nadingin Control Measures aseptheih bangin limsep mahmah uh ci a, August 1 pan August 2 kikal inzong cina mi 39 bang H1N1 Virus angahkha hiam ci’n sitcianna Test kibawl cihi.

Yangon khuapisung aom Waybargi Infectious Diseases Hospital ah H1N1 natna angah cina mi 19 kikem in, tuaban ah Yangon General Hospital ahzong H1N1 natna tawh cina mi 4 mah kikem cihi. Tuciangciang H1N1 natna tawh adamlo cina te tungpanin zato nasem te akilawh cihbang omnailo cihi.

Irrawaddy Region sung aom Pyapon General Hospital ah makaipi asem Daw Sein Sein zong H1N1 Virus kilawhkha cih kiza hi. Ahi zongin cina te tungpan in akilawh hilo hi ci’n Public Health Department Officials te’n genkhia uhhi.

Tuavai tawh kisai in Dr. Than Htun Win in DVB te tungah agenkhiatna ah Daw Sein Sein pen cina te akepna hangin cina te tungpan H1N1 Virus akilawh hilo hi. Amahpen tawllua, gimlua mahmah ahih manin Immune System thahatlo a, tuahang in H1N1 Virus angahkha hizaw hi ci’n genkhia hi.

Daw Sein Sein pen Waybargi Hospital ah zatui kibawlding in kipuak a, bangmah huaisialualo kici hi.

H1N1 Flu Virus pen Swine Flu ci’n zong kithei a, vok leh ak te tungpan in kilawhthei kici ahih manin, tulaitak Kawlgam ah voksa leh aksa kine ngamlo hi. Tuahang in atamzaw in ngasa bekbek kine ahih manin, ngasa pen mantam semsem kici hi.

Chin State sungahzong July kha akipatlampawl akipan H1N1 Flu natna angah mi 10 kimukhia in, tualak ah mi 1 in sihlawhkhin cih Irrawaddy te’n pulakkhia ngeikhin uh a, ahi zongin cina zatolum te maban bangmah kizakbehna omnawnlo hi.

Related: Myanmar, Rakhine State sungah Dengue Fever angah mi 1400 pha, mi 16 sikhin

Yangon khuasung aom mipi tezong H1N1 Virus kilau mahmahtek ahih manin muktuam “Mask” kithuah ngeingai cihi. Yangon bek hilo, mundang aom tezong kidop theihding thupi mahmahding hi. Adiakdiak in Chin State sungahzong H1N1 Virus angahkhin tampi kimu cimawk ahih manin, State dangdang leh Region dangdang te sangin alauhuaizaw hongsuak mawk hi.

Hih natna thuthang atheikha nailo, a zakha nailo Zogam aom ih meltheih tanau te gensawnding leh aki doptheih nadingun zaksakding nanglehkei in mawhpuak nei hihang sanggam! Sawltak #zomidaily