Nokia te’n 2017 kumsung in Smartphone hong hawmkhia kikding

Nokia te’n 2017 kumsung in Smartphone hong hawmkhia kikding

Nokia Phone pen Smartphone te hongpianma hunkhatlai in aminthang mahmah Company khat ahihi. 1865 kum pekpan in aki pankhia Company khat hi a, Finland te Company hi in, Headquarter zong Finland gam Espoo, Uusimaa ah koih uhhi. Leitung ah Mobile Phone tam abawlkhia penpen inzong aki ciamteh ngeikhat ahihi. Ahi zongin Smartphone te hongpian ciangin Nokia te’n Smartphone bawlkipanlo mawk uh ahih manin, anunung ah Nokia pen hong mangcip dide mawk hi.

Tu in khatvei hongki thakpatsawm leuleu uh cih AFP pan kiza a, 2017 kum kipatlam in Smartphone Market ah hong lutkikding uh cihi.

Nokia pen Smartphone abawlloh uhhang in Telecom Equipment Maker lakah amadawk vevekhat hi a, HMD Global tetawh ki pawlkhawm in Nokia Smartphone hong hawmkhiatsawm ahi uhhi.

“US Tech Giant” akiciliang Microsoft te’nzong 2014 kumin Nokia Brand nalei ngei uh a, ahi zongin metlawhluatna omlo hi. Banghanghiam cihleh Microsoft te’nzong Smartphone hongkipankhia uh a, ahi zongin Company dangte demzolo hi. Tuahangin Microsoft Company te’nzong Finland aom Nokia nasem honkhat khawlsak uhhi.

Nokia Brand te’n amau ii Phone Business pen Microsoft te kiangah azuaklaitak un thukimna khat nei uh a, tuapen 2016 kumbeidong Nokia te Smartphone Business ah lutkik theiloding cih ahihi. Tua hi a, tukum beileh akiciamna uh ahun abei hita ahih manin, 2017 kumsung in Nokia Brand panin Smartphone akipat kiksawm uh ahihi.

Samsung Smartphone te Battery nawngkaina hangin puakkhamthei, meikang thei cih thuthang hongom ciangin nidangzah in ki maingap nawnlo hi. Tua kawmkal ah Apple Company te’n iPhone 7 leh iPhone 7 Plus hongki hawmkhiat ciangin iPhone vive kilei ngeingai hi. Malaysia gamsung bangah iPhone 7 Plus te “Out of Stock” ci’n leiding nangawn omnawnlo hi.

Google Company te’nzong Pixel ci’n Smartphone hoihmahmah hongbawlkhia uh a, iPhone te hongdemto uhhi.

More: Putin in Trump tungah kilawmtatna dingin akhutzak

Maikum ah Nokia Brand te’n Smartphone hong kipankik henla, Smartphone Company tampi hongki demdem in aman hongkiam sakbeek le uh phading hi 🙂 ZD Sawltak #zomidaily