Global Zomi Alliance (GZA) khawmpi 3 veina kibawl ~ Zomi Times

Global Zomi Alliance (GZA) khawmpi 3 veina kibawl ~ Zomi Times

Zomi Party ZCD, Zomi CSO, Zomi Media leh Zomi biakna namkim kipaikhawm, makai thak kiteel – Yangon khuapi, Tedim Baptist Church – Yangon (TBC-Y) pawlpi biakinn ah November 24-27 sungin 3veina GZA – Global Zomi Alliance (Leitungbup Zomi Kipawlna) khawmpi thupi takin kibawl a, GZA central committee, GZA Kalaymyo, Tedim, Yangon leh gamdang Malaysia, Singapore, USA leh aphualphual a makaite, Zomi party ZCD, Zomi CSO, Zomi media leh Zoki pawlpi atuamtuam panin ahithei zahzah in pawisim pai uhi cih thu kiza hi. November 24 nitak hunpi ah Rev. Suan Khan Lian (Zomus – Yangon) in hunuk a, Rev.Dr. Smith Ngul Za Thawng in vaimuakna thugenna leh Rev.Dr. Do Suan Mung (GZA-GS) in thugenna nei hi.

November 25 ni zingsang lamin GZA President Rev.Dr. Samte Pau Khan En in GZA mailam kalsuanzia ding thusunna neiin Rev Dr Man Hau Cing in hun makaih a, Thusunna nihna ah Rev Dr Nang Sawm Piang in hun makaihin Khangno (Youth) leh Numei (Women) tawh kisai thusunna omin dotna leh dawnna, kamkup khawmna nitaklam ah om a, nitak hunpi iah GZA Tedim local commmitte in hun makaihin Rev. Go Za Nang in thugenna nei hi. November 26 ni zingsang lamin GZA mailam nasep Ding geelna : Rev.Dr. Go Cin Zam leh nitaklam GZA makai thak ding teelna, Zomi uliante tawh kimuhna leh nitak hunpi – Rev.Dr. Go Cin Zam; Nov.27- Biakinnn tuamtuam ah kikhopna leh nitak mahialna ah Hunpi – Rev.Dr. Ngul Khan Pau leh makaithak apna – Rev.Dr. Pau Khan En nei hi.

Hih 3veina GZA khawmpi nimasa ni 2 (November 24-25) sungin GZA nasepnasate leh GZA malam k alsuanzia ding kigen a, apawlpawl akhawkkhawk kikhenin kamkupna leh thupulakna nei ziahziah uhi. November 26 nitak lamin GZA makaipi ding teelna kinei a, Nomination Committee ah Convenor – Rev. Khoi Lam Thang (GS-BSM), Rev.Dr. Man Hau Cing (Senior Pastor – Tahan), Prof. Joseph Hang Khan Pau, Prof. Dr. Nang Suan Kham, Sia Kam Suan Mung (ZYA-GS), Sia Kap Suan Pau (Mihau) leh Sia Pau Khan Suan (Singapore) kiseh a, amau pulakna ah Patron makaisa 4te leh President – Rev.Dr. Do Suan Mung leh GS – Rev.Dr. Go Cin Zam leh adang member 7 seh uhi. Akiteel ciangin aluite mah angeina bangin kihelin behlap zaw leng cih thu hangin aluiteng amau mun ciat mah ah kikoih a, akibehlap pen Legal Advisor, sumkem leh member 5 kibehlap hi.

GZA makaite leh MP, kumpi uliante tawh holimna hun khat kiteel khit ciangin kinei a, tu amun ah hun uk – Rev.Dr. Smith Ngul Za Thawng in semin Rev.Dr. S. Pau Khan En in kamhonna ah John F. Kenedy in thukikupna ah Pasian nasemte asapna ahang pen USA pen Pasian ukna nuai hihen cih ka deihna hi ciin apulak bangin Zomi politiciante zong Pasian it Zomi makaite ihihna ding hanciam ding leh minam aa dingin hangsan takin nong pan uh leh note nung ah hong kidinpih ding hi ciin gen hi. REv.Dr. Do Suan Mung in GZA tangthu tomkim agenna ah 2011 Cope kum 100 cin pawi a kiphuan hi a, amin pen Singapore ah makaipi 5 kiteelte phuah hiin Rev.Dr. JM Ngul Khan Pau pen kinung behlap hi. GZA min tawh khatveina khawmpi Kawlpi Agape AG biakinn ah kibawl a, panmunlen tampi kiguang hi.

GZA nihveina Tedeim ah kibawl a, 914- Zomi gelh ciat ni cih kitangko a, nasep lian khat kisem kha suak hi. thumveina Yangon TBC-Y biakinn ah kiteelna kinei hi ciin gen hi. Pu Cin Sian Thang in GZA leh ZCD mapankhop loh aphamawh hi a, NLD kumpi nangawn in amau deih bangin bangmah sem thei nailo ahih manin ZCD MPte nong hawmthawh phial zong un tawmvei hong ngak lai unla, hong phat nailoin hong gensia nai kei un, ahun ngak lai ni ciin gen hi.

Pu Gin Kam Lian in England kumpi gualzawhna pen missionary Pasian nasemte panna thupi mahmah hi. Biakna pawlpi tawh mapan khoploh hitheilo hi. Khantohna committee myone kim ah kikoih a, teelcing MPte Chairman kisemsakin Tedim ah Pu Gin Kam Lian leh Tonzang ah Pi Cing Ngaih Mang ahih manin nidang sangin MPte in thuneihna tamzaw ta ding hi. Chin state Political Dialogue ciangin azo party ZCD, NLD , USDP leh CNF kihel ding hi.

Common language (pautang) ding pen atampente pau kizang ding hi ciin linguistic mipilte in gen a, Zomi atampen ihi hi. Khua leh tui ah akisam leh athucing MPte tung ah hong puak le ucin Innpi ah ka gen ding uh ko tavuan hi. Federal state ngah masaklohin Zomi vai pen haksa ding hi. Minam party din hamphatna in NLD party tawh ideihnate dinkikim mun ah kigen thei hi ciin gen hi. Pi Cing Ngaih Mang in Innpi ah gen tektek bek tawh akingah hituan lo a, khatvei genin ngah kei leng, kigenkik theilo sangin mimal kimuhna tawh tu-in Nakzang lei, Tuisawm lei leh adang khat kingah kipan ta hi. Pi Suh Kyi in Pupi it mahmah ahih manin ZCD pen NLD leh kumpite mai ah kimaitang hi. Numeite limbawl leng igam khangto ding hi ciin gen hi.

Planing sum Dy.Director General Pu Thang Do Cin in Kawlgam tulaitak MPte pen thunei omlo a, gamdangte kumpi uliante sangin thu nei zaw hi. 1970 laiin Kawlgam mipil lak ah Rakhine mi tampen a, anihna Zomi hi-in Chin (Zomi) sung ah mipil 5 lak ah eimi 3 kihel hi. ZCD dinpih ngam lel l eng iminam party omsun ahih manin ihampha zaw ding hi. Bangbang hileh ulian ding pen kumpi nasem tampi omin azalian mun ah i om ding kisam hi ciin gen hi. LKK (ZT-MMK) Zomi Times