Nobel Prize pankhiapa Alfred Bernhard Nobel tungpan thalakna

Nobel Prize pankhiapa Alfred Bernhard Nobel tungpan thalakna

Nobel Prize pankhiapa Alfred Bernhard Nobel (21 October 1833 – 10 December 1896) tung panin thalakna

Suang kapkhapna dinga kizang bomb nam khat dynamite kici i theihciat ding lamethuai hi. Tua ciangin leitung a pahtawina leh thupi a kisa penpen Nobel Peace Prize zong i za khin ding hi. Dynamite leh Nobel Peace Prize kizopna bang ci neih hiam cih na enkhawm dih ni.

Dynamite pen kum 1867 in Swedish Scientist Alfred Nobel in a muhkhiat hi a, a phattuamna tampi nei hi. Suangpi kapkhapna bang, kidona ah galte dona ding bangin a phatuam mahmah ahi hi. Dynamite hangin mi tampi in na sihloh bek hi loin gal tampi zawhna in hong kizang a, tua a mukhiapa kithusim leh minthang lua ahih manin tampi kizuak a, Alfred Nobel hauh cihtakin hong hausakpih hi.

Kum 1888 in Alfred Nobel i sanggampa Ludvig hong si a, French gam thukizakna minthang mahmah khat in: Le marchand de la mort est mort (“The merchant of death is dead”) : Alfred Nobel si ci-in a man lo pi-in a mawhsakna uh leh a ngaihsutna uh suaksak uh a; tua thukizakna ah, “Sihna zang a summet bawl mi haupa si hi” cih gelh uh hi. Tua sungah ama thu, “Alfred in cik mahin a kibawl ngei lo manlang takin mitampi sihna ding a vanzat mukhia a, tua a zuakna panin mi haupi a suakpa Cannes khua ah si hi,” ci-in gelh behlap uh hi.

Tua thukizakna Alfred in a sim ciangin a lungphawng mahmah hi. A gelh ten a theikhialh uh ahih hangin ama’n hehna in zang het lo hi. Tua panin, “Mite’n ka sihkhit ciangin hici bangin hong thei ding uh hi maw?” ci-in kingaihsutna lianpi nei hi. Mi ten a sihkhit ciangin mi tampite sihna ding bomb bawlpa ahih leh tua hangin hauhpih hi ci-a a ciamteh ding uh ut mahmah lo hi. Tua sangin a sihzawh ciangin na hoih na pha bawlpa in a theih ding uh lunggulhna hong nei hi.

Tua thu hangin midangte pahtawina dingin pahtawina (Award) manpha mahmah bawlkhiat ding hong hanciam a, November 27, 1895 in a sum neih khempeuh a kipan in 94% (31,225,000 Swedish kronor = Pound £1,687,8371) Physical Science, Chemistry, Medical Science (Physiology), Literature, Peace lamah a sang penpente piak dingin khensat hi. Tu ni dongin leitung in a thupi sim pahtawina sang penpen ci-in ciamteh uh hi.

2001 in Alfred Nobel’ tupasawm (great-great-nephew) Peter Nobel (1931 kum-a piang) in Bank of Swedente kiangah Alfred Noble phawmna dingin Nobel Prize ah Economics siamte pahtawina a kipiakna dingin ngen a, tua khit nungin Economist-te Nobel pahtawina kipia ta hi.

Alfred pen dynamite mukhiapa mi thupi ahihna sangin Nobel Prize leh Nobel Peace Prize hong patkhiatna hangin leitung bupin a hoih lamin thei ta uh hi. A sih khit ciangin mi ten a hoihlam a theih tawntung ding uh deihna hangin hih bang na thupi hong semkhia hi. Tu hun dongin amah na hoih sempa in kithei tawntung hi. Eite zong i sih khit ciangin mi ten hong bang ci theih leh i ci diam maw? A hoih lamin hong kitheih ding i deih leh na hoih na pha sep ding leh hunzat siam ding kisam mahmah ding hi.

Alfred Bernhard Nobel thu tomkim

• A minpi: Alfred Bernhard Nobel
• A pianni: 21 October 1833
• A pianna: Stockholm, Sweden, Sweden – Norway
• A sihni: 10 December 1896 (aged 63)
• A sihna: Sanremo, Italy
• A kivuina: Norra begravningsplatsen,Stockholm, Sweden
• 59°21′24.52″N 18°1′9.43″E
• Nekzonna: Chemist, Engineer, Inventor, Businessman, Philanthropist
• A min a kitheihna: Dynamite mukhiapa leh Nobel Prize pankhiapa

Na sihkhit ciangin mite’n bangci in hong phawkding na lunggulh hiam? (Ruth Messenger Nov-Dec 2015 issue leh Wikipedia panin hong kiteisawn ahi hi). Thang Khan Lian