England gamsung ah Accident hangin mawtaw 40 val ki phukha

England gamsung ah Accident hangin mawtaw 40 val ki phukha

Nungdiak in South Korea gamsung ah Motor Accident nasiatak piang a, mawtaw 100 val ki thuap ngekngakliang cih thuthang ih zakhin hi. Tu’n UK gamsung ah Motor Accident omcih kiza leuleu a, mawtaw 40 val ki phukhagawp cileuleu hi.

England gamsung Oxfordshire ah Saturday ni zingsanglam 07:45 GMT in thupiang hi a, hih mawtaw ki phutkhakna hangin mi 1 si cih BBC te’n genkhia hi.

Thames Valley Police te genkhiatna ah tua asipa pen mawtaw ki phutkhakna munah asipah hi a, adang mi khatzong gim mahmah, lamet tamlo cih genkhia hi.

Tualo adang mi 6 zong liamgawp a, mi 50 valbang in liamna tawmkhat tatek ngah uh cihzong kiza hi.

Thames Valley Police te’n hih mawtaw ki phutkhakna ahang akancian laitak uh hi a, banghang cihlian genkhiathei nailo uhhi. Ahi zongin mei kaigawp ahih manin, gamlapi ki mutheilo a, tuahang mah hiding in ummawh uhhi.

Hih buaina hangin lamzikpi te tawlpikhat kikhak cip ahih manin, mawtaw awkcip zihziah hi. BBC Travel te genkhiatna ah mawtaw awkciplua kisa, mawtaw akhawl ngilhngelh bekbekpen Tai 4 bang sau ciliang uhhi. Tusung Accident thu vive ki limzak mahmah ahih manin, ciahna kuanna ah mawtaw hawlte’n ki dopsiam ni. ZD Sawltak #zomidaily