Nii a tum ngeilo Zomi Empire

Nii a tum ngeilo Zomi Empire

Hunkhat lai-in, British kumpigam ah niitum ngeilo, “The sun never set on the British Empire” kici liang hi. Leitung kipei ahih lam, a theilo bang hileeng, “a gamtung vuah nikhawl hi”, cih ding a hihi. A tatak inbel, a kumpi-ukna gam pen, leitung nisuahna pan, nitumnagam dong-in, zai’hi, cih a kigen nuam, na hizaw hi. Tuciang dongmah, mangkampaute gamteng’ a thahaatlo omphallo hi.

Gamdang ah, sumbawl paaibawlna masuan-in, a omna uhpan, a innteekte’uh, a mau ukna kumpigam suaksak uh aa, tua ukna-gam tampi a kigawm pen British Empire hong suak hi. Tuhunciang in, colonialgam omnawn phallo a hihhang-in, a pau-a lai un, thugen-lai mahmah a hihi.

Colony gamluite’ khantohna pen, a ukngei Colonykumpi zui-in, ki mu theipah lel hi. Colonial gam veve zong British Colony gam ahi ngei teng leh a dang’gamte, tehkaak-taak mahmah hi. Hong Kongte bang Sengam tawh teh theih ding a hilo kimlai, tu-in a hih leh, Senkumpi Colony nuai ah atungtung hita mawk hi. Khamtung Zogam zong, Britishkumpi Colony sung leh Zogam-ukpi te khutsung pan Kawlkumpi Colony sung ah, a hang tuamtuam tawh, gaalsim kulhetlo-in, kitung-ngiaumawk hi.

Tu-in zong, colonial state a thuapneu khat ih suakbeh khakloh nading-in, tumawh ommawh in, a neu alian Zomi mimal khatciat in, ih kepcing ding, kisaptuak hi. British te’n, “Be careful what you wish for” a cih mahbang-un, mailam saupi ih etkei-leh, tulian-aa deihna-ngaihsutna pen mailam aa ding, hoihkhin lothei a hihi. Thu nungzuih pen ziakaai cihna hi.

Keihang-in khangsawn katu-katate,’ ka mipihte, bangciang suahzo ding ka hiam? ci-in, a kikawk-zawsang omlo-in, kidot ciat ding a hihi. Lampi hoihpen kan niloh-ding’ a hihi. Sum leh Pilna neilo, omkhawmlo, a kicih mahbang in, Pilna lo tawh khuasat in, inn a ki lamlam hang-in, sauvei kimanglo ding a hihi. Christian te-in, Pilna hong paina leh a ngahziading’ ki theitek hi.

Portugal te-in, tuipitung tawn-in, leitung kiimkot masa uh hina pi’uh, Britishte leh Frenchte, hong kidem-in, a nuntaak khuasakna uh, a noptuam na ding lunggulhna-tawh, tuitungmah tawn-in, gampua hong paikhiat tak uhteh, a taang’zai zawdeuh thumuhna hongsuak hi. Vanlei-vanzuak tawh kipankhia a hi lel uh hi.

A hizong-in, hunte hong ki heihei ciang,’kumpi ki-ukna lam, Colonygam a hong suaksak mawk uh hi. Colony pen Zomi-English Dictionary in, “ Kumpigam lian leh haat khat in gamla pi’ aa gamkhat la aa, a gaalpan aa ukna gam; Kigaal-ukna gam, a mau leh a mau a ki-uk lo, a suakta lo gam” ci-in at hi. Hih siksan hileeng, Kawlgam mualtung gamteng aa ding-inzong, Kawlkumpi pen colonial kumpi a hidih zen hi.

A taangpi khiatna inbel Colony a kicih ciang, kipatnagam a kibang teng’, gamdang munkhat-ah, a lom-in omkhawm, teengkhawm, cihna a hihi. Gentehna in, British gam pan USA gam a lal, a lomteente British colony, USA pan France gam lal-in a lomteente’ American colony kici uh hi. Nidang in, Indian colony a kici, ih zangei hi. Sente’n bel China town peuh ci uh hi. Tua hi aa, Yangon Yuzana a kipan, mundang gamdang’ ih tunna ciat ah, a lom-aa teng’ eimite zong, Zomi colony cihding hongsuak hi.

Leitunggam tuamtuam ih tuntunna ah, Zomi Colony te ih hita uh hi. British te bang in, leitung ki-ukna, kumpi-liatna leh paulehhaam tawh hi lo-in, vantungthu tawh a kilam, Emperor Jesu ukna, Zomi Empire ih neita hi. Nidang in, “ Kazaideih aw, valeeng in” ih ci aa, tu-hun ciang-in, tua Zomi Empire sung ah niitum ngeilo in, a nungta Pasian, ki phat tawntung hi.

Zomi te kipum khatna tawh, ih mapan’khopna hang-in, biak Pasian min, thang semsem ta hen. Nantal’suan (Covid hunsung in, leitung bup kitatsat lo aa, thungen te pahtawina tawh)

Ngaihsut laakna:

• 1. Kitatsat lo thu kingen ( London pan kipan gamtuamtuam, leitungbup ah)
• 2.Kazaideih aw, valeeng in (Laphuakte phawkna leh pahtawina tawh)
• 3. Britania (Colonial history)
• 4. Dr. Dal Lian Haokip -Zomi-English dictionary(Colony)
• 5. Oxford Advanced learner’s dictionary (Colony)