Tonzang vai ngaihsut ding pawlkhat
Tonzang aa ih sanggam nu kawl palik zineisa nih in hong buansak ni pen tukha 11 ni hi aa apa in thu abawl nipen 20 ni hi.
Angeina ah palik len (police station ) ah kha 1 sung akikhum theihna ding in thukhen zum in palikte’ tung ah remand apiak kul ahihi. Tonzang aa te zong piakhin hi. Tua khit ciang in gilbem (thong) ah kipuak ding hi. Tonzang bel thong omlo ahih man in thuneu nono ahih leh thu kikhen khit dong Tonzang palik len ah kikhum ding hi.
Ahi zongin tutung aa ih vai pen thulian ahih man in Falam puak kul hamtang ding hi. Thulian peuhmah pen Township level in lenlo aa, District level in alet kul hi. Township level in thukhen theihna power kum 7 ciang bek nei hi. Thulu khat ah asang penpen kum 7 ciang bek Township level thukhen zum in dan piathei bek hi.
Tedim district ih ngetnget hang ngahzo nailo ih hih man in tulaitak aa ih district ahi Falam puak kulding hi.
Ih misok tegel pen tulaitak thulu (article) nih bek tawh khih uh hi. Tua thulu nih lak ah alian penpen in art. 376 ahihi. Thulu khat pen palik/vuanthan(gov. Staff) thukhun palsat cih hilel aa palik pan khawlsakna hong hilel khading hi. Art. 376 pen kum 10 khawng hong hilel khading hi.
Tua ahih man in athu aliatna ding ih lunggulh leh hih anaui aa teng tawh ih khih zawhding thupi ding hi.
1. Numeino nupen ih palik te’n kidnap (ျပန္ေပးဆြဲ) – thatang tawh taiikhiat pih- ahih man in tua thulu khat hong behlapna ding
2. Abuan pen mi nih ahih manin mihon tawh buan (အုပ္စုလိုက္မုဒိမ္းက်င့္) cih thulu tawh hong khihsakna ding
3. A kum 14 hipan ahih man in kumcing nailo buanna (အရြယ္မေရာက္ေသးသူအား မဒိမ္းက်င့္မႈ) tawh hong khihsakna ding
Atung aa teng thum tawh khihzo leng atawmpen sihdan thuak ding uh hi.
Tua teng tawh khihzawhna ding akisam thute
1. Numeino nu thukhen zum ah thu akisit teh ama’ kam mahmah pan atung aa teng alut theihtheihna ding aa gen ding
2. Teci teng in zong atung aa thu 3 tawh matzawh theihtheihna ding aa gen ding
3. Teci lakpan athupi penpen ah a unu’ pasal (ih makpa) ahi hi. A ma’n “hih tegel ka naunu alading in sawl zenzen keng” (asawl sawmvei phial zong in) hong ciziau leh thu khempeuh akizo hiziau hi.
4. Siavuante’ recommandation letter (ေဆးေထာက္ခံစာ) zong thupi mahmah ding hi. Ei’ gente tawh hong ki tukalh lohding thupi ding hi.
Falam dong kipuak ding ahih man in ih thu pen a kum in hong sawt ding aa sum le hun tampi ih beilawh ding hi. Hih misok tegel akithat phial ahizong in ih naunu’ thuakna dam tuanlo ding ahih man in hoihtak thukhualna tawh ngiahsut huai kasa hi.
Deihsakna bek tawh
Thangboi
Zangkong
Comment piaknop aomleh...