Aki khenkham saptuam (Pawlpi) tungpan akizelh Pasian lungdamna thu
Thumasa
Kawlgama om Zomiten’ Pawlpi cin’ Lamka kiima-om Zomiten’ Saptuam ci hi. Hongpiankhiatna Kammal i-etciang [ellysia] call out from the world to God [Leitungpan Pasian Sapte] leh Saptuam kinaizaw ahihman in hiai ah Saptuam ci in kazangzaw hi.
Zeisu suah’ sih’ leh thawhkikna in Leitung mihingte mailam hong kilaihsakhi. Thuciamlui lai-in akilam dangahi, Pasian teeltuam Israelte leh Gentiles tetawhzong hong kibangsakta hi. Tua ahihman in Thuciamlui lai-a Israelmite [old Israel] pen thukham lahzuizo tualo ahihman un Zeisu lotawh ahihtheihlohna Paul leh Peter ten’ teltak in kipsak uhi.
Sawltak alian nihna pan in Saptuam hongpiangkhia hi-a, kammal dangin New Israel [Zeisu hanga Israelmite] hongpiang khia hi kici theihi.
Kumtulnih a-upa Saptuam thu atomkim in ama, kikhenna leh athuaknate uhpan Pasian in ama lungdamna thu azelhzia ih ending a, Zomi Saptuam adiakin Gampua a omte omzia tawm ihgen ding hi.
Saptuam Tangthu Atom in
Sawltak 2: 1- cf sungah Peter thuhilh napanin mi tulthum [3000] in kikhelna ngaha tuani mahin tuikiphum uhi. Tuani akipanin Saptuam hongpiangkhia ahihi.
Ithulu ah ‘akikhenkham saptuam thutawh kisai ahihziakin Saptuam pianzawh buaina hangin akikhenkhapna te leh bawlsiatna apiang athupideuh te tawmkhat ih ensukding hi. Hih Saptuam hongpiankhiatzawh alianpi kikhenna [5] ngavei vilvel omkhin in tua te in:
- 1. AD 50s Jews leh Judaized Christian Or Gentile Church leh Jewish Church kikhenkham – [Council of Nicaea]
- 2. AD451s Mainline Orthodox leh Monophysites [Council of Chalcedon] Or Nesterion-Monophysites leh Western Orthodox kikhen kham
- 3. AD1054 Eastern Orthodox leh Western Orthodox Catholic kikhenkham
- 4. AD1517 Protestant Reformation leh Catholic Or Catholic doctrine tul[lui] asa’ Protestant ten’ Catholic taisan
- 5. AD2000 Southern Christian in’ Modern Western Church [Saptuam] kalsuanzia deihlo in kikhen, Or Saklam Christian [Global South Christianity] leh Nitumnalam Christian [Christian West] kikal ah Saptuam hongkhan zia kilamdang hi. Kum zanga simin Saptuam ngeina [tradition] thak hongsuakzel a tua in kikhenna piangsak toto hi.
AD 70 kumin Rome in Jerusalem susia ahihman in, Jerusalem pen Christian Center ahihnapan in Jews thu-ummite hongkitheihthang’a Jerusalem pualamah Lungdam nathu hongtung theisuak hi. Rome in Jerusalem hongzawh hangin Jerusalem bangin Christian te’ Center hizo ngeinai lo hi. Tua hun AD 70 akipanin Antioch [Paul mission field] leh Alexandria [Mark mission field] te Christian Center pi in hongom hi. Christian upna hong kipat akipan alangpangden te in Islam, Barbarian [Mingongtat], teleh Christian sung ah khatleh khat kidemnopna tehangin hih thupithum te-in Saptuam hongnawngkai sak toto hi.
AD70 pan in Rome Empire hongkhang mahmah hi. Banghanghiam cihleh Khuaneupan Rome Khuapi alute Roman Catholic upna sunglut uh hangin, thu-um mi khanpi in hongkhang hi. AD100 ma’in Bishop Soter ciapteh na-ah thu-um telak ah Jew minam sangin Jew mi ahilo thu-um tamzaw ta hi ci hi. Tua ahihman in 3rd century ciangin Roman Empire sung Lungdam thu in zelkhin hi.
AD 500-AD1000 sungteng in Islam leh Barbarian [mingontat] te in thu-ummi te amuhmuhna vuah bawlsia in that uh a, Muhammad thu-umte ten’ Christian gamteng zokhin uh hi. AD 622 in Islamte Center, Mecca pan Medina ah hongtuah uha, AD 638 in Jerusalem, AD 641 Caesarea, AD 650 in Persia, Palestine leh Syria leh Alexandra, Egypt te AD642, AD 715 Spain leh France, AD 846 Rome, AD 902 in Italy Nitumna lam abanban in Islam ten susia tozihziah uhhi.
Hih atunga te hangin Christian upnapen kum AD1000 ciangzong kimu nawnlo ding, Leitungah Christian upna mangthang dinghi cin, Dionysius in na ciamteh hi. Ahizongin Dionysius ciaptehna diklomawk hi hih dark age [khuamialhun] sungin Pasian geelna lianpi na omveve lai hi.
AD500-1000s Dark Age Hun Nung
Muslim upna leh alunglut huaithu tampitak hih Dark Age [Khuamialhun] sungin hongpiangkhia hi. Hih hunsung Pasian zatmite’ thu avekin genzolo ding ihih manin nihleh thumte nuntakna enpak ni.
St. Patrick 389 in Britain ahsuak in, kum 16 aphat in Irish migiloten sila dingin man uha, kum guksung Irish te tuucingin om hi. Barbarian [mingongtat] te tamlua ahihman in zanin ihmu lo in thu ngenngen ahihman in Pasian alamdang in hopih ahihmanin, Pasian in sila a-akimat napan apaikhiatzia ding hilh in Britain [England] tungkik a ahizongin amah amante a veiluat manin missionary in vapai kik hi, St Patrick asih ma in Iceland gam thu-um [Christian] gam in kiciamteh khin hi. Tuucing kawmin Pasian kiangah nikhatin thu zavei ka ngen ci hi.
Winfret of Credition, Boniface [680-754] pen hih Dark Age sung, the greatest missionary,’ in kiciamteh hi. Asuah na atellian omlo a, amahpen the Apostle of Germany cin’ kithei hi. Kum 40 sung Pasian na asepna ah, Pasian vang akilat napenpen in, Dawibia ten’ abiakuh Tawsawkung [Oak] phuktansak in, German ten awi hehlo uhi. German te’ upna ah biakna khatpeuhpeuh asimmawh te tua pasian in dawmlo hi ci uha, Boniface in ahihleh, nabiak uh singkung kiphukkhin a, keizong bangmah ci lo hi-ing Boniface Pasian alianzaw ahihlam namuzo uh hi ci in mite lamdang samahmah uhi.
Hihbangin Pasian in ateltuam pawlkhat te Patrick leh Boniface tehangin Lungdamna thukizom tothei bektham lo in, Christian alangpan, Muslim honpikhat kikhel lawh in Christian hongsuak ahihman un, Christian upna abeidingzah donga a upmawh uhpen nasia tak in hongnungta kik leh hongtang zaito zawlai hi.
AD1600-1787 Hihhun sungin Roman Catholic leh Jesuit te in vang [power] tawh Saptuam tungtawnin nakpitak in nahongsem to uh a, Roberto Nobili [1577-1656] Italy pan India hongtunga , India te hongpianthak theihna dingin India mikasuah kul ding ci hi. Acih nopna ah India Hindu te annek, puansilh, kizepzia zui in hongkhawsak kul cihna hi. Tua hileh kathugen abilsungvuah luttheipan dingci hi.
AD1552-1721 Matteo [Matthew] Ricci Sengam a missionary in 1582 invatunga, Sen Buddhist monk te puantawh akibangsilhin Senmite bangmahin kizem ahihman in Chinese Empire, Kang Hsi inthupi sa ahihmanin Matteo tawhkimuh ding hoih sa a kimuthei uhi, hihpen Europemite leh Chinese Empire akimuh masakpenna hipah hi. Senpausiamin, Mathematics, Maps tampi publish hi. Pawlkhatten contextualize lua ahihman un anungsangvuah anasepna lawhcinglohi acizong omhi. Hih tegelpen atumdangdeuhin mission nasep nei-uh ahihman in missionary tampite lakah kongtel ahi hi.
Saptuam Nasepna leh a ma, Tang’ thuthak 19th cent +
Saptuam tangthuthak kacihna ahangin tuhun [modern] mission nasepzia athakin kikalsuan ahihziak ahihi. Roman Empire in political power tawh Christian upna hong tangkociangin Rome mite’ ngeinaleh kalsuanzia tawh gamdang, ngeina kibanglo tekiangah mission asep hangun lawhcinglo ahihman in Pasian kammal eimau pautektawh simtheih ding hoihkisa ahihman in William Tyndale bang hongsih lawhliang hi.
Pentecost Ni in minam kampau tampiten’ Gospel [lungdamna] thuhangin, kikhawlkhawm, annekhawm, neihsatezuak in akikim inhawm uh hi. [Sawl 2:44-47] Topa Zeisu hongsuahmasiah vun-akna, Sabbath tan’nate suangin Jew mitebek Pasian saptuam hi cin’ hangsantakin pulak uhhi. Topa Zeisu hongsuahma Pasian mihihtheih nadingin Jew tethukham zui-in Jew [proselyte] misuahkul hi. Ahizongin Topa Zeisu in Jerusalem, Judea, Samaria leh Leimongdong ah ka teci nahiding uhi acihpen [centrifugal] mission nasepzia hongkilaih khin ahi hi.
Atunga, ih genmahbangin AD70 in Rome in Jerusalem hongzo a, damdam in Roman Empire tekhutnuai ah Christian upna kumzalom tamsim hongom ciphi. Leitungbupah ka teci nahiding uhhi cih kammal tawh hongkilehbulh ahihman in Leitungvangliat natawh ahumcipsawm hangun Pasian gelna in pailetveve a, Pasianmipil, mihangsan tetungtawn in Laisiangtho Leitungmikim simtheihding in reformation hunsungin hongkitei khia a tuniciang dong namneu [tribal] te adingin kiteitei lai hi. Hihnasep pen centrifugal kici hi.
Centrifugal cihpen asunglampan pusuahna ahikeileh, alaizangpan kithehthang cihna hi. Centripetal cipnopna leuleu pen apualampan alaizang or sungah lutding cihna hi, acihnoppen Christian ihsuahnadingin vun atna, Sabbath tanna leh thukham zuihna ding cihna hi.
Edinburgh 1910: Leitung thu-um Roman Catholic leh Protestant te upna bulpi leh mission nasepziate kibanglo ahihman in 1910 kum in Edinburgh ah Jesu asang Biakna khempeuh sam uh a, angim nabulpi ahihleh, Pasian nasemte leh Biakna dang azui mite akimuh khakciang buaina lianpite bangcileng lemtuah theihding cih ahihi. Hih 1910 in Roman Catholic leh Greek Orthodox te kihelzo nailo hi. Hih conference pi ah Christian lote tawh mission nasepna bangcileng buaina omlo ding cih ahihman in mipil ten hoih sa uh a, ahunhun inneih zawhding hanciam uhi.
1928 ciangin Jerusalem ah conference kinei kika, athulu uhpen Christian te’ message leh Biakna dangte kizopzia hong hileuleu hi. Lungdam nathu bangci leng kimleh pamin hongtheih pih semsemding cih ngimna hi a, hoih kisa tektek hi. 1938 ciang leuleu in Tambaram [India] ah hih conference pi hongkizomto thei a, hih tungtangah, Pasian nasepna ah upna dangte [other faiths] te simmawh tuanloin Pasian thuman’ thudik bangcileng kiholim [dialogue] thei ding cih hongmu toleuleu uhi. Whitby [Canada] ah 1947 in kinei a ahizongin Galpi nihna hangtawh Christian upna cih term kizang ngamlo in partnership [kilawmtakna] cih thulu in nei uhi.
Athupi penpen conference Willingen Germany ah 1952 in hongnei tothei uha, hih conference pan in missio Dei [Pasian nasep] term hongzangkhia ta uh a, athupi zawkan lai-in New Delhi ah 1961 in hongnei to uhi. Hihlai munah Roman Catholic, Orthodox, akipan Christian khempeuh kipawlkhopna IMC [International Missionary Conference] leh WCC Evangelism cihte Vatican II akipan khukilet asepkhop ding in thukimna leh sepkhiatna hongnei ta uhi.
Saptuam Tangthu hongkilaihsak laiding thute:
Ama tangthu i-etciangin thu-ummite kibawlsia semsem leh Pasian upna kitawhsuah sak ahihman in Christian thu-um mi khang zel hi. Tu 2013-15 Leitung paizia enpak leng zong kimu thei hi. Middle East gam Syria, Iran, Iraq, Palestine, Afghanistan te-ah Christian mite kigawl at ziahziah genkul lo in mu hihang. Amun lian ah vapai zokei mahleng News pan ihthei ciangin Christian thu-um mite abeiphial dingtawh kibang hi. Ahizongin Pasian geelna beiphial cihthadah, thu-um mikhang semsem hi.
1910-2010 sung Leitung ah Christian upna akhan’ [growth] penna mute
- Nepal 12.13 %
- Saudi Arabia 10.60 %
- UAE 9.33 %
- Oman 9.18 %
- Kuwait 7.39 %
- Qatar 7.28 % leh
- 2000-2010 Christian upna akhangtopen [fastest growth]
Afghanistan 19.01% leh abeisa kum 140 sungsangin abeisa kum 14 sung Iran gam ah Christian asuaktam zaw ci hi.[1]
Atunga Christiankhantohna munte enpak leng Christian thu-ummite akigawtna munte ah Christian upna percentage zui-in a khanpenpen mun hizaw hi. Iran pastor khat teci panna Islam [IS] ten honglangpan kilau in thukingak ngetsemsem a kikhang semsem hi ci hi.[2]
Saptuam tangthu kilaih dinghi ihcih pen akilaih khinna zaw a, abei sa in Christian saptuam thu ihngen ciangin Western tawh kikhentheilo zahdongin in omhi mahleh tu’ 21st century ciang Pasian Saptuam tangthu none-western ah kibulphuh zawta hi.
Zomi leh Saptuam Paizia
Kawlgam ah Judson July 13, 1813 in hongtunga tua akipat damdam in Kawlgam sung ah missionary te hong lut semsem in, 1908 pawlin Zogam hongtung zopan hi.
Ihpu ihpa te biakna [ancestor worship] panin Christian Pasian upna manlang takin kisangthei ahihman in Zomi tetu’ 21st century ciangin 90% bangin Zeisu kisang hi. Cope topa ten’ ih Zongeina leh ih Zogam tawhkituak dingin Laisiangtho hongletkhia uh hi. Tuciangciangin Zokam tawhbek hilo in Kawlkam leh Mangkam tetawhzong ihsim thei ta hi. Kawlkam Mangkam te atheibek hinawnlo in Kawlgam Manggam te ah pemta [refugee] in ih om ciangin ngeina-nih [dual-culture] kikal ah ihkhuasak takciang Saptuam sung ihkalsuan ziate Zogam a om saptuamte tawhkibang nawnlo hi.
Banghang kibang nawnlo hiam? Zogam a om Saptuam memberten’ Pastorte it,zahtak, panpih in sihna nopnate ah ihmuan ihsuan Siampite ahi uhi. Pastor ihlak [recruit] ciangin zong Laisiangthosang akahkhin leh Saptuam constitution tetawh kizui in kila hi. Zogam sung ah ih-etciang Khuakhatsungah AG Biakinn nihlehthum, Tuiphum Biakinn nihlehthum omnai samlo a ihkhuate aneuman zonghituan loin kikhawmkhawm liailiai laisamhi hang.
US ah pemta-a om Zomite tenna Khuate ih-etciangin u-pa sepnopna, pastor sepnop na, leh pastor [saptuamkem sia] te deihloh manin Saptuam kikhen tozihziah a, thangah huaibangna pin, namdangte muhna-ah zumhuai hi. Strategy [sepzia] khatdiklo ahihman in akuamah ciat Laisiantho tawh kituak Saptuam ahizawh nading in Laisiangtho sim ciatni. Pastorte case-worker khawng asa tampi omlaimawk hi. Kipiatkhiatna tawh pastor in ahuhzawhleh hoihsema, ahizongin job description ihih sakciangin Laisiangtho tawhkituak nawnlo hi.
A etteh huai pemtate:
Zomi te keineu laiciangciang [1980] Gunkhawm khen khua aomlaidiam acilaipawl ihih samhang’ AD1435 in Nicoto di Conti Bago city ah nahawh khin a, khali omhi. Vasco de Gama in 1498 in Burma-India paining Tuilam [sea route] mukhia hi. Portugal te’ a country of emigrant[3] ciki a, America pen a country of immigrant[4] kici hi. Portuguese te 16th century akipat Europe gam, France, Germany etc leh Brazil the ah vapem [emigrate] uha nasep hahkatin angah sumte uh agamvuah cihpihtektek in inn hoihpipi lam uhi.
A etteh huai pemta te khatin kiciamteh hi. Ahangpen, kum tampi gamdang ah vapem in nasem tamah leh Portuguese [amaupau] leh ngeina [culture] te kemcingin bekthamlo-in atha lawh uh sumtetawh agam uhpuah uh hi. Hihbang Gammi tamlo hi anthropologists ten ciamteh uhi. Tuaban ah apaipai navuah abiakna uh tonpih uh-a Biakinn lam pah uha pastor, [chaplain] neipah uhi.
Gamthupi GTN, Chinese, Japanese, te-ih-etciang amaupau leh ngeina te kemcing in akhang akhangin hilhsawn uhi. Chinese, Japanese ansaite leh biakna [temple] te lampah uhi.
Tuma kum 20 nungsiah Zomite zong Gamkhatna [first country] te ah, pilnatawh [professional] apai ih omsam hang, atamzaw pen pemta [refugee] tawh ihihman in adiakin US atungten’ American ngeina [culture] lahzat theih taktak loh leh, Zomi ngeina [culture] lah kizang theinawnlo cihbangin ih omciang Biakpiak nasungah zong nakpitak in sukha hi. Saptuam tangthu ihtel lohban ah Laisiangtho zong sim manlo ihihman in apil ahai cih omlo, ikhasum kibang ahihman in mite sangin niamzaw nuamtuan lo ihihman in theita keileng makai ki-ut tek a tu in Saptuam kumsim phial in kikhenkham sak hi. Gam dang pemta khempeuh Saptuam kikhen ihsakleh nahi samlo-a, Indianapolis a om Falam leh Haka te ahihleh Saptuam member tulnih [2000] kim phamawk uhi. Zomi te bang virus in hong vatkha hiam? Tua virus banghiam diagnose kisam kha in ka um hi.
Thukhupna
Ihthu lu, akikhenkham Saptuam tungpan akizelh Pasian lungdamnathu tawhkizui in enkik pakleng Zeisu hun akipat Saptuam akikhenciangin, Zomite’ masiah, Pasian lungdam nathu kizelh zaw hi. Islam ten Saptuam beisakding hangciam in mithatnatawh a hizongin, bawlsiatna tuamtuamte sihnadong tuakta mahleh uh Pasian thu thangsemsem hi. Ei Zomi [US] te eleh Saptuam [biakinn] atamziak in Pasian lungdam nathu akizelh semsem diam cih ihngaih sut dingin hun kasa ta hi.
Rev. Pau Do Lian
- [1] 2014 class lecture ‘History of Christianity’
- [2] Asbury Doctoral Seminar
- [3] Emigrant cihciangin eimau pianna Gampan in Gamdang ah a vapem khiamite cihna hi. GTN: Kawlgam pan refugee tawh apaikhiate pen Kawlgam adingin, emigrant hipah hi.
- [4] Immigrant akhiatna in Gamtuamtuam pan in pemta in hongpai atengsuakte hi. GTN America pen Leitung minamkim, African, Asian, Indian, Chinese, leitung bup kisuttuah na hi a, a country of immigrant kici hi.
Comment piaknop aomleh...