Zogam khimzing ~ Sia Do Khup

Zogam khimzing ~ Sia Do Khup

Tulaitak hun kanin Zomite’ zingvai hawm a kul hun om nawnlo kha thei ding hi. Kipawlna tuamtuam pan makaipi teng kimuhkhop hun lua hi.

A HAI NAMTOM LUNGSIM NEI TENG DAI PHOT DING

Tulaitak khuahun sia mahmah ahih manin kei a kipan a hai teng pau loin om phot ni. I minam sunga kipawlna makaite, a pilte, thu sau khualte tu khawm sakin i minam maban ding kikup hun lua ta a, a zekai khin lam hita hi.

Buaina pen a sem taktak, a pia taktak, a thuak taktakte hang hiloin gam adingin bangmah sem lo, pia lo, thuak lopi a online khutthak ommawh kitulmawh teng hang peuh hi thei zaw hi.

SISAN A MAWK LUAN KHAK DING

Minam dang khempeuh in a beina uh a supna uh a sihna uh thaman omsak ciat uh a, si ngam takpi uh hi.
Online bekah kiphin, kisutuah kitawngsak kitelkhialsak a i om leh ei leh ei sisan kisuahin tampi si ding hang a, minam dangte ciamnuihna suak lel ding hihang.

Tampi in sih lawh napi bangmah lawhtaak neilo gulsih thaamsih a si ihih khak ding dah huai lua hi. Ei leh ei kithatin tawm semsem ding hang a, phu kilak nopna, thangpaihna lian semsemin kipawlna picing om theilo semsem ding hi.

Tua hun ciangin Chin State sunga pau kibang mimal a a tam penpen Zomite i kipawl theihloh manin ei sanga tawmzawte’ ukna nuai ah i om den kha ding hi.

More: Sisan, sisan luang ~ Sia Do Khup

MAKAITE HONG MUANG UNG

Moses bangin thu sau khual, a lungduai, a maisak thei makai muan vive hi dingin kong lamen uh a kong muang mahmah uh hi.
Pasian leh makaite hangin lungmuang galmuang in ka om ciat uh hi. Lunghimawhna kiu khat pan; Evan. Langh Do Khup (Khuata mipa)