Ngeina Puan Silhthei Khempeuh Minam Vei Kicitheilo

Ngeina Puan Silhthei Khempeuh Minam Vei Kicitheilo

Puan cihte, ngeina vanzat cihte pen sum leh pai tawh ki leithei hi. Veina leh itna pen kam a pauthei khatpeuh in genkhia thei aa, ih sepzia-in a zuihloh teh lungtang sung aa veina ahih loh lam kitel lua zel hi.

Hih atung aa thulu kammal pen leitung tukpeng (bawhlung) tangthu-ah aki mangngilh thei ngeilo ding khat ahi Portugal te kimawl siam minthang Luis Figo (Kum 39) in tuma kum sawm lai pawlin a genkhiat kammal ahihi.

Na asa tam simsim ding ci le’ng, banghang in tuabang kam pau thei hiam? Tuabang kam pau ngam hiam?

Portugal minam Figo pen, ama kimawl siamluatna leh a kimawlna Team te gualzawhna hang tawh, kum 2000 lai-in Europe gam khempeuh pan Tukpeng Kimawl Siampen pahtawina ngah aa, a kumkik 2001 ciangin Leitungbup Tukpeng Kimawl Siampen pahtawina ngah hi.

Kum 2003 hong tun’ teh, Brazil gam aa suak Anderson Luis de Souza (Kum 34) kici, tukpeng-leitung ah Deco cih min tawh a minthang pa pen Portugal gam aa ding kimawl dingin Portugal coach pa-in teelta hi. Portugal gam aa ding kimawl siam tul tampi om lak pan Deco teelkhia cih zong pen, a Deco zong 2006 kum bangin Club khempeuh ii midfielder (alaii) kimawl siampen pahtawina ngahzo ciang khat na hihi. Tukpeng uk ngei peuhin theikim ding hi.

Deco pen Portugal gam ah kum guk bang tukpeng kimawl kawm aa a ten’na pan Portugal mi hihtheihna ngah khat hi aa, ama aa dingin Brazil gam aa ding lah kimawl thei, Portugal gam aa ding lah kimawl thei hi.

Portugal te coach in a teel tak ciangin, tua laitak aa Portugal captain pa Figo in, dotna leh upzawh taktak lohna tampi tak pulak khia pah hi. Deco kimawl siam leh siamlohna agen hizawlo-in, Deco in a veina leh a itna pen Portugal gam aa ding hizo ding hiam, cih ahihi.

Media te-in zong, hih thu pen leitungbup muh dingin khah pah zihziah uh aa, kha tampi mah buai veve uhhi.

Figo in a pulakna-ah, “Portugal tukpeng puan cihte, vanzatte pen sum tawh ih utna peuh pan ki leithei aa, ih utna munmun ah kisilh thei hi. Tua puan a silh khempeuh minam it taktak kici theilo hi. Portugal gam ii lapi zong Portugal pau athei khempeuh in sathei lelding aa, a sak simin minam it leh vei takpi ki citheilo hi. Mi khatpen a kivakna/siamna hang tawh ih minam tangmi dingin ih teel/sap hangin ih minam it taktak ding cih kitheilo hi.” cih bangin thupi tak leh a veina tak tawh pulak khia hi.

Ki ngaihsut huai leh thu muhzia tampi hong lak hi. Figo in atawpna ciang, “Deco lampan Portugal minam aa ding a siamna pen, a deuhdeuhin minam dangte tung a lahkhiat zawh ding kisam hi.” ci hi.

Ngeina puan, ngeina vanzat asilh leh azang khempeuh minam vei hipah samlo, ci. Minam vai, minam thu kamtawh a genkhia thei khempeuh zong a sepkhiatna kisam na ci leuleu! A siamna, a pilna khatpeuh hang tawh minam vai a semding muan pah ding hilo na ci kawikawi!

Puan pen silhhun om aa, ih ut leh ki laihthei lel mah hi. Kampau zong ih paunop hun om aa, paudah ning, icih hun zong omthei lel hi. Figo’ gendanin, veina leh itna tak teh utteh suahding, utteh silhding hilo, na ci hi.

Kimawl/nasem kici nuam veve, kua aa ding sem? Ih pam aa te-in Brazilian hong ci-in, ih gei aa te-in Portugese hong cihhang phamawh salo ki-om hihtuak! Tg. Kham