Ngeina leh Christian Upna (5) ~ Rev. Fr. Damian Dal

Ngeina leh Christian Upna (5) ~ Rev. Fr. Damian Dal

Upna picing i neihtheih nadingin Ngeina thu theih loh phamawh hiam cih thuzong angaihsut huai thu ahihi. Ngeina thu theilo in, Christian upna picing kinei theilo dinghiam? Upna in vantungam hongtun thu hi a, Ngeina in vantunggam thutawh bangkisai zenzen hiam cihnophuai hi. Tua bang aci mitampi zong na om takpi hi. Ngeina thu theilo in, Christian upna kinei thei lo cihna hi lo a, ngeina thu theihna in vangam tunpih hi zong i ci hetkei hi. Ahizong in, bangbiakna bangbiakna hi te leh, minam khat ii upna leh minam khat ii ngeina akikhen ngeiloh na thu leitungpian cil pan kipan in tuni dongciang nialtheih loh aman thukhat ahih thuzong atheih huai mahmah thukhat ahihi.

Christian upna in “lampi, thuman thutak leh nuntakna” (Jn 14: 6) ahi Topa Jesu nungzuihna ahihi. Amah in lampi ahih mahbangin ama paina lampi ipai kul hi. Amah in thuman ahih mahbangin ama gen thute tungah kiniamkhiat natawh mangin, inuntakpi kul hi. Amah in nuntakna ahih mahbangin, ama totlampi zui in, ama gen thuman nuntakna ineih leh, amah tawh tawntung nuntak angahding te ihihi. Christian upna in, mihingte nisim nuntakna ah apai nading uh lampi, apau agen, ahuam leh anuntakpi dinguh thuman ahihi.

Minam khat ii ngeina i cih inzong, tua minam in, atot lampi, amau te adingin, thuman leh thutak te kikepcingna, leh amau te nuntakpih uh ahihi. Ahi zongin, minam khat ii ngeina sungah, ngeina gamtatna, ngeina nuntakna, ngeina kizopna, ngeina nasep na tampi te in Christian upna tawh kilehbulh omthei hi cihthu zong phawktawntung ding khat ahihi. Ngeina khat ii sungah Pasian thutawh akituak lo, akilehbulh thu tampi na om thei tawntung hi.

Banghanghiam cihleh, khanglui pupa te hunlai in, amau te in amau te upna leh amau te ngeina pumkhat nasuaksak in, amau te nisim gamtatna ah nanuntakpih uh ahih man ahihi. Hih thu hangin, Christian te in, pupa pan a i luahsuk, i ngahsuk ngeina te i kep, i puah na te ah, ngeina ii khiatna theihloh aphamawh thu ahihi. Ngeina sungah thu le la, gamtatna pawlkhat te in pupa huna dawibiakna ngeina tawh nakizom hi. Hih thuhangin, ngeina pen Christian upna tawh ihsianthosak ding hi a, Christian upna hangin ngeina susia in paaikhia ding cihthu hilo hi.

Christian upna in ngeina puahin, siangthosakding a, khangcingsak in, tua ngeina neite ading leitungthu vantungthu te ah, amau te ading lampi, thuman leh nuntakna asuak ngeina asuaksak ding ahihi. Tua in, ‘vantungah nadeihna akicin mahbangin hihlei tungah zong kicingta hen” (Mt 6: 10) cih Topa honghilh thungetna ii khiatna zong ahihi. Mipawlkhat te in ngeina pen akipuah theilo, akizem thei lo, akisuthei nawnlo, pupa te piakbanglian, sepbanglian, genbanglian in kepcingdingin ngaihsun thei uhhi.

Ngeina in akipuahtheih kei a, aki zemtheih kei a, akibeplap theih kei leh tua ngeina pen asi ngeina ahihi. Asi ngeina cihciangin, pupa te hunlai bek a akizangthei, amau hunlai bektawh akituak amau te nuntakzia bek tawh akizom ngeina suak hi cihna hi. Ahi zongin ngeina cihciangin, ahuntawh kituak in, akipuahpha thei, aki zem thei, akhiatna leh adeihna mangsak ngeilo in, tua te ahoihzaw, asangzaw, atangzaizaw leh hun le muntawh kituak a akizangthei, akinuntakpi thei ngeina cihna ahihi.

Laisiangtho siamte in bangna ci hiam cih leh: Pasian in minam te ii ngeina sungah ama pilna guan in, tua ngeina te sungah thuhoih thupha tampi te nungta saka, tua ngeina thuhoih te hangin, mite in Pasian atheih nading un lampi te ahonsak hi, naci uhhi. Christian upna nei mi peuhmah in, “amau te minam ngeina, amau te pau le ham, amau te silh le teen nek le dawn ngeina te akipan, amau minam tawh kizopna te khempeuh paaikhia in khuatuam gamtuam satin, paunam tuam pau in, ngeina tuam bawlin nungta thei lo uhhi.

Hih thu hangin, Christian upna nei mi in, ama minam ngeina sungah anungta agamtang khat ahih manin, ama Christian upna in, ama minam te ngeina tawh kizom den hi ci in, Pasian thulam ah mipil theologian minthang khat ahi Dr. Alexander P. Zatyrka P. SJ in nagelh hi. Rev Fr Damian Dal