Update: Japan gamsung ah khua lumlua mahmah ahih manin kalkhat sungin mi 65 si

Update: Japan gamsung ah khua lumlua mahmah ahih manin kalkhat sungin mi 65 si

Japan gamsung ah khuahun lumluat, satluatna hangin kalkhatsung bekbek in mi 65 takin sihlawhliang ahih manin, Japan Government Officials te’n hihpen tuahsiatna lianpi “Natural Disaster” hi ci’n tuni Tuesday (Jul 24) ni in genkhia cih AFP pan kiza hi.

Fire and Disaster Management Agency te’n Statement akhahkhiatna ah kalkhatsung bekbekin khuahun lumluatna hangin misi pen 65 phakhin a, tuabek thamlo Heat Stroke hangin athazawm acinatlawh mi 22,647 te zato ah kipuak uh cihi.

2008 kumpekpan akipan Summer hunsung khualumna aki ciamtehtoto te lakah tukumpen khuasung alumpen, asapenpen hi ci’n Fire and Disaster Management Agency te’n genkhia uhhi.

July kha kipat akipan khuahun lumluatna hangin misi akigawm in 80 phakhinta a, zato ah akipuakzong 35,000 bang phakhinta hi.

Tuabangin asi te lakah sangnaupang kum 6 khatzong kihel ahih manni, hihbangin khuahun alumsuaksuak laileh sangnaupang te kepcingding kisam hi ci’n Top Government Spokesman Yoshihide Suga in Tuesday ni in Reporters te tungah genkhia hi.

Tua ahih manin Japanese Government inzong hongtungkikding Summer alapding in sanginn khempeuh ah Air Con thuahsakding, sumbei akisamteng piaksakding in genkhia uhhi. Tulaitak Japan gamsung aom Public School khempeuh ii alangkhawngbek Air Con kithuahpan hi.

Monday ni inzong Kumagaya City sungah khuahun salua mahmah in, asatna Temperature pen 41.1 Degree Celsius tak phaliang ahih manin, Japan gamsung ah khuahun asa penpen National Heat Record asang penpen in ki ciamteh hi.

More: Tokyo khuapi ah abeisa kum 48 khitzawh khua avotpen in kiciamteh

Japan gamsung pen tukumsung mahmah inzong khuahun kinakkhel mahmah hi. Abeisa January khasung in Central Tokyo sungteng ah khuahun avotna pen Temperatures 4 Degrees Celsius ah kiasuk ahih manin, abeisa kum 48 sungah khuahun avotpenpen in kiciamteh hi. Tuazawh asawtlo in khua lumlua mahmah leuleu a, leitung khuahun ki naklaih mahmah “Climate Change” cihpen kimuthei hi. Sawltak #zomidaily

Japan ah khualumluatna hangin mi 30 in sihlawhkhin, mi 12,000 zato kipuak

Japan gamsung ah Heatwave in nawkin khuahun salua, lumlua mahmah in atawmpen mi 30 peuhmah in sihlawhkhin a, adangzong mi 12,000 bang zato ah kipuak uh cih AFP leh Euro News pan kiza hi. Tuapen July kalnihsung in thupiang hi a, tuni Sunday ni inzong Japan gamsung aom khuapi tuamtuam ah khualumna pen 40 Degrees Celsius tungtodek hi.

Anunung Report akizakna ah July 15 ni ciangciangin Heatstroke in anawkna hangin asipen 12 hi a, tuakhitzawh asawtlo in zato ah akikem adang mi 3 sihbeh leuleu cihi.

Japan Fire and Disaster Management Agency te genkhiatna ah July khalai “Mid-July” sungin khualum thuaklahlua in zato akipuak pen mi 9900 valbang pha ci uhhi. Abeisa kalsung in 2700 hi a, tuazawh tampitak khualum thuaklah in zato akipuak ngeingai ahihi.

Khuahun “weather” pen hoihlam manawh zawlo in, khuahunpen tunidongmah lummahmah laihi.

Kyodo News Agency te pulakna ah Saturday nikhatsung bekbek inzong mi 11 takin sihlawh uh a, asi atamzaw pen kumtamkhin piteek puteek vive hizaw in, khualum “heatstroke” thuaklahlua in asi uh cihi.

Video: Japan’s citizens have been urged to take precautions against soaring temperatures as the country remains in the grips of a heatwave that has killed about 30 people. Thousands have sought hospital treatment for heat-related conditions over the past two weeks as temperatures in central Japan peaked at 40 degrees celsius.

Saturday nikhatsung bekbek inzong Tokyo City sungah cinapuakna mawtaw “Ambulance” 3091 kizangin khualum thuaklah cina te zato ah kinawn ziahziah cihi.

Kyoto City sungahzong khuahun khualumna “temperature” pen kiamcih omvetlo in, ni 7 sung akizom in temperature 38 Degrees Celsius tuangsiah ah omcipden cimawk hi.

Japan’s Main Island sungteng atamzaw ah khuahun lumlua “extraordinary high temperature” ahih manin, Weather Agency te’n khuasung mipite kidop siamtheih nadingin Warning piakna tangkokhia uhhi.

Heatstroke pen lauhuailai mahmah ahih manin khuasung mipi te’n tui tampipi dawnding leh innsung ah Curtain leh Air Conditioning te zangin kikemsiamding zaksakna nei uhhi.

More: Japan ah guahtui tamluatna hangin tui khawnggawp, mi 38 sikhin in 50 val mangcip

Tuaban ah Japan Education Ministry inzong sanginn thunei te zaksakna nei uh a, hih khualumluat hunsungteng sangnaupangte apualam ah Outdoor Activities kimawlpih lohdingin thupia uhhi. Abeisa kalsungin sangnaupang kum 6 aphapan khatzong sanginn apualam ah kimawlpihna hangin khualum thuaklah in sihlawhkhin hi. Sawltak #zomidaily